Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Paano Ako Makapakighambal sa Akon mga Ginikanan Parte sa Ila mga Pagsulundan?

Paano Ako Makapakighambal sa Akon mga Ginikanan Parte sa Ila mga Pagsulundan?

Ang kinahanglan mo: Ikasarang sa pagpakigkomunikar

Ang komunikasyon isa ka importante nga kasangkapan nga

  • makabulig sa iban nga maintiendihan ka.

  • makabulig sa imo nga maintiendihan kon ngaa wala ginapasugtan ang gusto mo.

Kon gusto mo nga trataron ka subong isa ka adulto, dapat nga tun-an mo man kon paano makigkomunikar sing maayo. Paano?

Tun-i nga kontrolon ang imo balatyagon. Ang maayo nga komunikasyon nagakinahanglan sing pagpugong sa kaugalingon. Ang Biblia nagasiling: “Ang buangbuang nagamitlang sang iya bug-os nga kaakig, apang ang tawo nga maalam nagapugung sini kag nagapalinong sini.Hulubaton 29:11.

Gani, likawi ang pagreklamo, pagkumod, pagpusdak sang puertahan, kag pagpudagpudag. Kay kon himuon mo ini, mahimo nga madugangan lang ang pagsulundan—kag indi ang imo kahilwayan.

Tilawi nga hangpon ang pagtamod sang imo mga ginikanan. Halimbawa: Indi ka pagpasugtan nga matambong sa isa ka pagtinipon. Sa baylo nga makigbais, mahimo ka mamangkot:

“Ano abi kon mapaupod ako sa isa ka hamtong kag masaligan nga abyan?”

Mahimo nga indi ka gihapon pagpasugtan sang imo mga ginikanan. Pero kon nahangpan mo ang ila ginakabalak-an, mas daku ang kahigayunan nga makahatag ka sing rason para pasugtan ka nila.

Tigayuna ang pagsalig sang imo mga ginikanan. Imadyina ang isa ka tawo nga may utang sa bangko. Kon regular sia nga nagabayad, matigayon niya ang pagsalig sang bangko kag mahimo nga pautangon pa sia liwat sa ulihi.

Pareho man sini sa puluy-an. Dapat mo tumanon ang imo mga ginikanan. Gani, kon pirme mo sila ginasupak, indi ka matingala kon indi ka nila pagsaligan.

Pero, kon masaligan ka bisan sa gamay nga mga butang, mahimo nga magadugang man ang pagsalig sang imo mga ginikanan sa imo.