Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Ano ang Dapat Ko Mahibaluan Parte sa Makahulubog nga Ilimnon?

Ano ang Dapat Ko Mahibaluan Parte sa Makahulubog nga Ilimnon?

Wala ginadilian sang Biblia ang pag-inom sing haganhagan kon legal ini. Pero ginadilian sini ang pagpahubog.Salmo 104:15; 1 Corinto 6:10.

Pero ano abi kon ginapilit ka nga mag-inom bisan wala ka pa sa legal nga edad, ukon sa indi insakto nga tion kag lugar, ukon indi pa magpasugot ang imo ginikanan?

  • Pamensara ang matabo sa tapos ka makainom

  • Magdesisyon

  • Ang ginasiling sang iban

Pamensara ang matabo sa tapos ka makainom

Para sa iban mo nga kaedad, ang pag-inom sadyasadya lang. Pero ano ang posible nga matabo sa tapos sang pag-inom?

  • Manabat sa kasuguan. Depende sa inyo lugar, kon mag-inom ka sing makahulubog nga ilimnon nga wala ka pa sa legal nga edad mahimo multahan ka, kasuhan, kuhaon ang imo driver’s license, pahimuon ka sing community service, ukon prisuhon pa gani.Roma 13:3.

  • Maguba ang reputasyon. Kon nakainom ka daw indi mo makontrol ang imo kaugalingon. Gani mahimo ka makahambal ukon makahimo sang mga butang nga hinulsulan mo sa ulihi. (Hulubaton 23:31-33) Bangod popular subong ang social media, ang imo mga ginahimo puede makaguba sang imo reputasyon.

  • Mas madali makahimo sing sala. Kon nakainom ka, mahapos para sa iban nga abusuhan ka ukon luguson. Madali ka man magpati sa ginasugo sa imo, gani posible nga makahimo ka sing delikado ukon ilegal nga mga butang.

  • Mangin palainom. Suno sa pila ka research, kon mas bata ka nagsugod sa pag-inom, mas daku ang tsansa nga mangin palainom ka. Mangin batasan mo ang pag-inom kon na-stress ka, nasubuan, ukon nagabatyag nga ka-boring. Kag mas mabudlayan ka nga untatan ini.

  • Kamatayon. Sang nagligad lang nga mga tuig, isa ang nagakapatay kada 52 minutos sa United States bangod nakainom ang drayber. Kag may tion man nga sa sulod sang lima ka tuig, sobra 1,500 ka tawo nga wala pa mag-21 anyos ang nagakapatay kada tuig bangod naaksidente kay nakainom ang drayber. Bisan pa wala ka nakainom, daku ang imo risgo kon magsakay ka sa salakyan nga nakainom ang drayber.

Magdesisyon

Malikawan mo ang delikado kag indi maayo nga mga resulta sang sobra nga pag-inom kon nakadesisyon ka na nga daan kon ano ang himuon mo.

Prinsipio sa Biblia: “Makita sang tawo nga maalamon ang katalagman kag nagapanago sia.” (Hulubaton 22:3) Indi gid maayo nga mag-inom kon madrayb ka ukon mahimo sang butang nga kinahanglan ang konsentrasyon.

Desisyon: ‘Mainom lang ako kon sa legal na ako nga edad kag sa insakto nga tion kag lugar.’

Prinsipio sa Biblia: “Mga ulipon kamo sang isa nga ginatuman ninyo.” (Roma 6:16) Kon mag-inom ka bangod nagainom ang mga kaupod mo, ginapasugtan mo nga kontrolon ka nila. Kon mag-inom ka kay ka-boring ukon na-stress ka, indi mo matun-an kon paano atubangon ang imo mga problema sa insakto nga paagi.

Desisyon: ‘Indi ko pagpasugtan ang akon mga barkada nga piliton ako nga mag-inom.’

Prinsipio sa Biblia: “Indi ka mag-upod-upod sa mga tawo nga palainom.” (Hulubaton 23:20, Maayong Balita nga Biblia) Ang indi maayo nga mga barkada makaguba sang imo desisyon. Mabutang ka man sa alang-alang kon nagaupod ka sa mga nagapahubog.

Desisyon: ‘Indi ako magbarkada sa mga nagapahubog.’

Magtuon sing Dugang Pa

Ano ang Ginasiling sang Biblia Parte sa Makahulubog nga Ilimnon? Sala Bala ang Pag-inom Sini?

Ginasambit sa Biblia ang maayo nga epekto sang alak kag iban pa nga makahulubog nga ilimnon.

Ang Pagtamod sang Biblia sa Pag-inom sang Alak

Hibalua ang mga prinsipio sa Biblia nga makabulig sa imo kon paano tamdon ang pag-inom.