Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Paano Ko Atubangon ang Trahedya?

Paano Ko Atubangon ang Trahedya?

Ang trahedya mahimo maeksperiensiahan sang tanan. “Indi pirme ang madasig ang nagadaug sa palumba, ukon ang makusog ang nagadaug sa inaway,” siling sang Biblia. “Ang wala ginapaabot nga hitabo nagakatabo sa ila tanan.” (Manugwali 9:11) Ang iban nga pamatan-on nakaeksperiensia man sang trahedya. Paano nila ini gin-atubang? Binagbinaga ang duha ka halimbawa.

 REBEKAH

Nagdiborsio ang akon mga ginikanan sang 14 anyos ako.

Ginapapati ko ang akon kaugalingon nga ang akon mga ginikanan wala nagdiborsio, kag kinahanglan lang sang akon amay nga magpatawhay anay. Palangga niya ang akon iloy—ngaa abi biyaan niya sia? Ngaa biyaan niya ako?

Nabudlayan gid ako mag-istorya sa iban parte sa nagakatabo. Indi ko ini gusto istoryahan. Wala ko gid naintiendihan nga naugot gali ako. Sobra gid ang akon kabalaka, kag indi ako pirme makatulog.

Sang 19 anyos ako, napatay ang akon iloy bangod sa kanser. Best friend gid kami ni Mama.

Ang pagdiborsio sang akon mga ginikanan masakit, pero mas grabe ang kasakit sang napatay si Mama. Wala ako gihapon maumpawan. Mas labi nga indi ako makatulog, kag nabalaka gihapon ako.

Pero sadto nga tion may nakabulig sa akon. Halimbawa, ang Hulubaton 18:1 nagpaandam nga indi naton pag-ipain ang aton kaugalingon, gani gintinguhaan ko nga sundon ini nga laygay.

Kag bilang Saksi ni Jehova, ginatinguhaan ko nga basahon ang amon base sa Biblia nga mga balasahon nga makapabakod gid. Ang isa nga nakabulig sa akon sang nagdiborsio ang akon mga ginikanan amo ang Questions Young People Ask—Answers That Work. Nadumduman ko gid nga ginbasa ko ang isa kapitulo sa Volume 2 nga may tig-ulo “Can I Be Happy in a Single-Parent Family?”

Ang isa sa paborito ko nga mga bersikulo para maatubang ko ang akon kabalaka amo ang Mateo 6:25-34. Sa bersikulo 27, nagpamangkot si Jesus: “Sin-o sa inyo ang makadugang sa iya kabuhi sing bisan isa lang ka maniko * paagi sa pagkabalaka?”

Kita tanan makaeksperiensia gid sing malain nga mga hitabo sa aton kabuhi, pero natun-an ko sa akon iloy nga importante ang aton paagi sa pag-atubang sini nga mga kabudlayan. Grabe gid ang iya inagihandiborsio kag dayon ang malala nga balatian—pero positibo lang sia gihapon kag matutom sa Dios asta sa iya kamatayon. Indi ko gid malipatan ang mga gintudlo niya sa akon parte kay Jehova.

Hunahunaa: Ngaa ang pagbasa sang Biblia kag base sa Biblia nga mga balasahon makabulig sa imo nga maatubang ang trahedya?Salmo 94:19.

 CORDELL

Sang 17 anyos ako, nakita ko gid sang nabugtuan sing ginhawa ang akon amay. Ang iya kamatayon amo ang pinakamalain nga natabo sa akon kabuhi. Grabe gid ang akon kasubo.

Pamatyag ko indi sia tuod nga napatay, kag indi si Papa ang ila ginatabunan sang habol. Ginpapati ko ang akon kaugalingon nga magabugtaw sia buas. Indi ko kabalo sang akon himuon kag daw wala na pulos ang akon kabuhi.

Ako kag ang akon pamilya mga Saksi ni Jehova, kag daku gid nga bulig ang amon kongregasyon sang napatay ang akon amay. Ginpakaon nila kami, gin-updan, kag wala ginpabay-an—indi lamang sa malip-ot nga tion. Para sa akon, ang ila suporta ebidensia nga ang mga Saksi ni Jehova matuod nga mga Cristiano.Juan 13:35.

Ang teksto nga nagpabakod gid sa akon amo ang 2 Corinto 4:17, 18. Nagasiling ini: “Bisan pa ang kapipit-an nga ginaatubang namon umalagi kag mamag-an, ang padya nga batunon namon wala sing katapusan kag labaw gid sa tanan; samtang wala namon ginatuon ang amon mga mata sa mga butang nga makita, kundi sa mga butang nga indi makita. Kay ang mga butang nga makita umalagi lang, apang ang mga butang nga indi makita wala sing katapusan.”

Ang ulihi nga bersikulo nakabulig gid sa akon. Ang pag-antos sang akon amay umalagi lang, pero ang mga saad sang Dios sa palaabuton wala sing katapusan. Sang napatay si Papa, napamalandungan ko kon ano ang ginahimo ko sa akon kabuhi kag kon paano ko bag-uhon ang akon mga goal.

Hunahunaa: Paano ang trahedya nga imo naeksperiensiahan makabulig sa imo nga mabinagbinag ang imo mga goal?1 Juan 2:17.

^ par. 14 Ang maniko isa ka takus nga mga 45 ka sentimetro, ukon mga 1.5 ka pie.

Magtuon sing Dugang Pa

Ano Gid ang Ginatudlo sang Biblia?

Matuod Gid nga Paglaum Para sa Imo Napatay nga mga Pinalangga

Napatyan ka bala sing pinalangga? Posible bala nga makita mo sila liwat? Hibalua ang ginatudlo sang Biblia parte sa pagkabanhaw.