Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Ang Oral Sex Bala Pag-sex Gid?

Ang Oral Sex Bala Pag-sex Gid?

Suno sa report sang U.S. Centers for Disease Control and Prevention, halos katunga sang mga gin-interbyu nga 15 asta 19 anyos ang nagahimo sang oral sex. “Kon mag-istorya ka sa mga tin-edyer [sang parte sa oral sex] daw wala lang ini sa ila,” siling ni Sharlene Azam, ang awtor sang libro nga Oral Sex Is the New Goodnight Kiss. “Ang matuod, para sa ila indi ini sex.”

 Ano sa banta mo?

Sabti ang masunod nga mga pamangkot sing huo ukon indi.

  1. Mabusong bala ang babayi paagi sa oral sex?

    1. Huo

    2. Indi

  2. Makahalit bala sa lawas ang oral sex?

    1. Huo

    2. Indi

  3. Ang oral sex bala pag-sex gid?

    1. Huo

    2. Indi

 Ano ang matuod?

Ikumparar ang imo mga sabat sa masunod nga mga sabat.

  1. Mabusong bala ang babayi paagi sa oral sex?

    Sabat: Indi. Amo ina ang rason kon ngaa nagapati ang iban nga ang oral sex indi makahalit. Pero nagsala sila.

  2. Makahalit bala sa lawas ang oral sex?

    Sabat: Huo. Ang isa ka tawo nga naga-oral sex puede malatnan sang hepatitis (A ukon B), genital warts, gonorrhea, herpes, HIV, kag syphilis.

  3. Ang oral sex bala pag-sex gid?

    Sabat: Huo. Ang bisan ano nga buhat nga nagadalahig sang kinatawo sang iban—pati ang pag-sex, oral sex, anal sex, kag pag-masturbate sa iban—pag-sex gihapon.

 Ngaa importante nga mabal-an ang parte sini?

Istoryahan naton ang mga bersikulo sa Biblia parte sa sini.

Ang Biblia nagasiling: “Amo ini ang kabubut-on sang Dios, nga . . . maglikaw sa seksuwal nga imoralidad.”1 Tesalonica 4:3.

Ang orihinal nga lenguahe sang tinaga nga gin-translate nga “seksuwal nga imoralidad” nagapatuhoy sa tanan nga porma sang seksuwal nga mga buhat sang indi mag-asawa, pati na ang pag-sex, oral sex, anal sex, kag pag-masturbate sa iban. Makahalit gid ang resulta kon ang isa ka tawo nagahimo sang seksuwal nga imoralidad. Kag malala pa gid kay madula niya ang iya maayo nga relasyon sa Dios.1 Pedro 3:12.

Ang Biblia nagasiling: “Ang padayon nga nagahimo sing seksuwal nga imoralidad nagapakasala batok sa iya kaugalingon nga lawas.”1 Corinto 6:18.

Ang oral sex makahalit sa imo lawas kag sa imo relasyon sa Dios. Makaapektar man ini sa imo emosyon. “Bisan pa ang pag-sex ginhimo sa iban nga paagi, natural nga mabatyagan sang isa nga nagamit na sia, basulon niya ang iya kaugalingon, ukon maluyahan,” siling sang libro nga Talking Sex With Your Kids. “Ang tanan nga kasakit nga mabatyagan sang isa bangod nakig-sex sia sa indi eksakto nga sitwasyon amo man ang iya mabatyagan kon maghimo sia sang bisan ano nga klase sang sex sa sala nga sitwasyon. Kay ang bisan ano nga pag-sex, pag-sex gihapon.”

Ang ginasiling sang Biblia: “Ako si Jehova nga imo Dios, ang nagatudlo sa imo para sa imo kaayuhan.”Isaias 48:17.

Nagapati ka bala nga ang kasuguan sang Dios parte sa sex para sa imo kaayuhan? Ukon pamatyag mo bala estrikto ini? Para masabat mo ini, pensara ang masako nga dalan nga may mga karatula para sa speed limit, traffic signal, kag stop. Para sa imo ina bala nga mga karatula nagadumili ukon proteksion? Ano ayhan ang matabo kon ang mga karatula balewalaon mo kag sang iban nga drayber?

Ginalimatehan sang mga kasuguan sa trapiko ang imo kahilwayan, pero proteksion mo ini. Amo man sini ang kasuguan sang Dios, ginalimitehan ka sini, pero proteksion ini sa imo

Pareho man sini ang mga prinsipio sang Dios. Kon balewalaon mo ini, sigurado gid nga anihon mo ang imo ginsab-ug. (Galacia 6:7) “Kon amat-amat mo nga indi pagsundon ang imo ginatuuhan kag mga prinsipio, kag maghimo sang mga buhat nga sa pamatyag mo daw indi gid eksakto, madulaan ka sang respeto sa imo kaugalingon,” siling sang libro nga Sex Smart. Pero kon ginasunod mo ang mga prinsipio sang Dios, mapakita mo kon ano ka gid nga klase sang tawo. Kag indi lang ina, mangin matinlo pirme ang imo konsiensia.1 Pedro 3:16.

Magtuon sing Dugang Pa

Ano ang Ginasiling sang Biblia Parte sa mga Agi kag mga Tomboy?

Ano ang pagtamod sang Dios sa homoseksuwal nga mga buhat? Ang tawo bala nga may homoseksuwal nga mga handum makapahamuot sa Dios?

Sala Bala ang Pag-sex Antes sang Kasal?

Hibalua ang ginasiling sang Biblia parte sa pag-sex antes sang kasal kag sang iban pa nga porma sang seksuwal nga buluhaton.