Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Ngaa Likawan ang Pornograpiya?

Ngaa Likawan ang Pornograpiya?

 Masarangan mo bala ini likawan?

Kon mag-Internet ka, paabuta nga posible gid nga makakita ka sang isa ka sahi sang pornograpiya. “Indi mo na ini kinahanglan pangitaon pa,” siling sang 17 anyos nga si Hayley. “Kay ikaw ang ginapangita sini.”

Bisan ang mga determinado nga maglikaw sa sini mahimo nga masulay sang pornograpiya. “Siling ko sa akon kaugalingon, indi gid ako magpasulay,” siling ni Greg, nga 18 anyos. “Indi ka gid makasiling nga indi ini matabo sa imo.”

Subong, ang pornograpiya mahapos na gid matigayon. Kag sa paglapnag sang sexting, madamo nga tin-edyer ang nagahimo kag nagapalapta sang ila mismo pornograpiya.

Ang punto: Mas mabudlay subong sangsa panahon sang imo mga ginikanan ukon kalolohan. Ang pamangkot amo, Masarangan mo bala likawan ang pornograpiya?Salmo 97:10.

Ang sabat huo—kon gustuhon mo. Pero una dapat kumbinsido ka mismo nga malain ang pornograpiya. Binagbinagon naton anay ang ginasiling sang iban kag kon ano gid ang matuod.

 Kon ano ang ginasiling sang iban kag kon ano ang matuod

Ang ginasiling sang iban: Ang pornograpiya indi makahalit sa akon.

Ang matuod: Ang epekto sang pornograpiya sa imo hunahuna pareho sang epekto sang sigarilyo sa imo baga. Ginahalitan ka sini. Ginapakanubo sini ang butang nga ginhimo sang Dios para magpabakod kag magpasuod sa duha ka tawo. (Genesis 2:24) Sa ulihi, magahimo ini sa imo nga indi sensitibo sa kon ano ang maayo ukon malain. Halimbawa, may mga eksperto nga nagasiling nga ang mga lalaki nga regular nga nagatan-aw sang pornograpiya indi apektado sa kapintas nga ginahimo sa mga babayi.

Ang Biblia nagasugid parte sa mga tawo nga “wala na sang tanan nga igbalatyag.” (Efeso 4:19) Kabalan na ang ila konsiensia amo nga wala na sila nasakitan kon maghimo sila sing malain.

Ang ginasiling sang iban: Ang pornograpiya makatudlo sa imo parte sa sex.

Ang matuod: Ang pornograpiya nagatudlo sa imo sang kakagod. Ginapagua sini nga ang mga tawo daw mga butang lang kag nagaluntad lamang sila para mapun-an ang imo kaugalingon nga mga handum. Indi katingalahan nga suno sa isa ka pagtuon, ang mga adik sa pornograpiya mahimo nga wala sang seksuwal nga kaayawan kon magminyo na sila.

Ang Biblia nagasugo sa mga Cristiano nga maglikaw sa “pagpakighilawas, kahigkuan, kailigbon sa sekso, makahalalit nga handum, kag pagkamahamkunon”—ang tanan nga butang nga ginapadaku sang pornograpiya.Colosas 3:5.

Ang ginasiling sang iban: Ang mga nagalikaw sa pornograpiya may makitid nga pagtamod parte sa sex.

Ang matuod: Ang mga nagalikaw sa pornograpiya may mataas nga pagtamod sa sex. Naintiendihan nila nga isa ini ka regalo sang Dios para pabakuron ang relasyon sang mga mag-asawa nga nagsumpaanay sa isa kag isa. Ang mga may amo sini nga pagtamod mas makatigayon sing seksuwal nga kaayawan kon magminyo na sila.

Ang Biblia prangka parte sa sex. Halimbawa, ginasugo sini ang mga bana: “Magkalipay sa asawa sang imo pagkapamatan-on, . . . magpabihag ka sa gihapon sang iya gugma.”Hulubaton 5:18, 19.

 Kon paano likawan ang pornograpiya

Ano ang himuon mo kon nabudlayan ka gid nga batuan ang pagsulay nga magtan-aw sang pornograpiya? Ang worksheet nga “Kon Paano Likawan ang Pornograpiya” makabulig sa imo.

Makasalig ka nga mabatuan mo ang pagsulay nga magtan-aw sang pornograpiya. Matun-an mo man nga untatan ang pagtan-aw sang pornograpiya kon nasugdan mo na ini. Takus gid ini himuon.

Binagbinaga si Calvin nga nagsiling nga natun-an niya ang pagtan-aw sang pornograpiya sang mga 13 anyos sia. “Bal-an ko nga sala ini,” siling ni Calvin, “pero nadaug gid ako sang pagsulay nga magtan-aw. Pagkatapos sini, kalain gid sang akon pamatyag. Sang ulihi, nadakpan ako sang akon amay, kag sa matuod lang, nahaw-asan gid ako! Kay man, mabuligan na ako nga mag-untat.”

Natun-an ni Calvin nga likawan ang pornograpiya. Nagsiling sia: “Ang pagtan-aw ko sang pornograpiya daku gid nga sala kag asta subong nagabayad pa ako sini kay nagabalikbalik ini sa akon hunahuna. Kon kaisa, ginasulay gihapon ako nga mamensar kon ano abi pananglitan matan-aw ako sang mga butang nga indi ko dapat tan-awon. Pero ginapensar ko gid dayon ang malipayon, matinlo, kag masanag nga palaabuton kon ginahimo ko ang mga butang sa pamaagi ni Jehova.”