Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Ngaa Dapat Mangin Bunayag?

Ngaa Dapat Mangin Bunayag?

 Ngaa indi bunayag ang iban?

Subong, daw pierde ka gid kon bunayag ka. Kay man, ang iban mahimo magsiling:

  • ‘Kon indi ako magbinutig sa akon mga ginikanan, silutan gid ako nila.’

  • ‘Kon indi ako mang-ilog sa eksam, basi indi ako makapasar.’

  • ‘Kon indi ko ini pagkawaton, kinahanglan ko pa ini suptan.’

‘Kay ti, ano gid ang malain?’ mahimo ipamangkot sang iban. ‘Indi bala tanan nagabutig man?’

Ang sabat sa sina nga pamangkot, indi. Madamo nga tawo—lakip na ang madamo nga pamatan-on—ang nagapati nga maayo gid ang resulta kon bunayag ka. “Kon ano ang ginasab-ug sang tawo, ini man ang iya anihon,” siling sang Biblia. (Galacia 6:7) Buot silingon, may epekto gid ang aton ginahimo—maayo man ini ukon malain.

Halimbawa, binagbinaga ang pila ka malain nga resulta sang pagbinutig.

“Nagbinutig ’ko kay Nanay parte sa pagpakig-istorya ko sa isa ka lalaki. Bal-an niya nga wala ’ko nagasugid sing matuod. Sang ikatlo nga beses nga nagbinutig ako parte sini, nangakig na gid si Nanay. Duha ka semana nga indi ako makalagaw kag isa ka bulan nga indi ako makagamit sang cell phone ukon makatan-aw sing TV. Sugod sadto wala na gid ako nagbinutig sa akon mga ginikanan!”—Anita.

Binagbinaga ini: Ngaa madugay pa kag nakuha liwat ni Anita ang pagsalig sang iya iloy?

Ang Biblia nagasiling: “Karon nga ginsikway na ninyo ang pangdaya, ang kada isa sa inyo maghambal sang kamatuoran sa iya isigkatawo.”Efeso 4:25.

“Nagbinutig ako sa akon mga ginikanan kag abi ko nakalusot na ’ko. Pero sang ulihi, ginpaistorya nila liwat sa akon kon ano ang natabo. Indi abi matuod ang akon ginsugid ano pa indi ko na madumduman ang mga detalye sang akon ginhimo nga istorya. Pero kon matuod lang tani, wala gid problema!”—Anthony.

Binagbinaga ini: Paano kuntani nalikawan ni Anthony ina nga sitwasyon?

Ang Biblia nagasiling: “Ang mga butigon makangilil-ad kay Jehova, apang ang mga bunayag kalahamut-an sa iya.”Hulubaton 12:22.

Ginapasobrahan niya kag ginadugangan ang istorya. Nanamian ako sa iya kag wala ko na lang ginaserioso gid ang iya ginahambal. Pero kabudlay gid sia patihan kag saligan.”—Yvonne.

Binagbinaga ini: Ano ang mahimo nga epekto sang pagpasobra sang istorya kag “diutay” nga binutig sang amiga ni Yvonne sa iya reputasyon?

Ang Biblia nagasiling: “Luyag [naton] magkabuhi sing bunayag sa tanan nga butang.”Hebreo 13:18.

Ang litik sa pundasyon makapahuyang sang bilog nga bilding; amo man ang pagkadibunayag, makaguba ini sang imo reputasyon

 Ngaa maayo nga mangin bunayag?

Binagbinaga naman ang pila ka maayo nga resulta kon mangin bunayag ka.

“Nahulog ang kuarta sang babayi nga nagauna lakat sa akon. Gintawag ko sia kag ginbalik sa iya ang kuarta. Nagpasalamat gid sia. Nagsiling sia: ‘Kabuot gid sa imo. Diutay na lang ang tawo nga pareho sa imo ka bunayag.’ Kanami gid batyagon nga natalupangdan ka kay nakahimo ka sing husto!”—Vivian.

Binagbinaga ini: Ngaa nakibot gid ang babayi nga nangin bunayag si Vivian? Ano ang maayo nga epekto kay Vivian kay nangin bunayag sia?

Ang Biblia nagasiling: “Malipayon ang mga . . . nagahimo sing husto sa tanan nga tion.”Salmo 106:3.

“Ang trabaho sang amon pamilya amo ang pagpanglimpyo sa mga bilding. Kon kaisa, kon magpanglimpyo kami sa opisina, makakita kami sing sensilyo sa salog. Ginatungtong namon ini sa pinakamalapit nga lamesa. Daw naugot na gani ang isa ka empleyado kay tama sa amon ka bunayag—‘Dies sentimos gid lang ’na!’ siling niya. Pero ginasaligan niya gid kami.”—Julia.

Binagbinaga ini: Ano ang mahimo nga epekto sang pagkabunayag ni Julia engkaso nga kinahanglan niya sing rekomendasyon kon mag-aplay sia sing obra?

Ang Biblia nagasiling: “Himua ang imo bug-os nga masarangan nga ipresentar ang imo kaugalingon nga kalahamut-an sa Dios, isa ka manugpangabudlay nga wala sing ginakahuya.”2 Timoteo 2:15.

“Ginbayaran ako para sa 80 ka oras nga obra imbes nga 64 ka oras lang. Daw nami man tani nga indi ko na pag-ibalik, galing indi ko gid ini mahimo. Ginpakita ko ini sa accounting manager, kag nagpasalamat gid sia. Daku ang kita sang kompanya, pero indi ko masarangan kuhaon ang kuarta nga para sa akon kinawatan.”—Bethany.

Binagbinaga ini: Ang pagpangawat bala sa korporasyon indi tanto ka malain sangsa pagpangawat sa isa ka tawo?

Ang Biblia nagasiling: “Ginakangil-aran ni Jehova ang mga malimbungon, apang nagapakig-abyan Sia sing suod sa mga matarong.”Hulubaton 3:32.

Tan-awa Man

Magtuon sing Dugang Pa

Ano ang Himuon Ko Kon May Nalapas Ako nga Pagsulundan?

Hibalua ang dapat mo himuon para indi maglala ang isa ka sitwasyon.

Responsable Gid Bala Ako?

Ang iban nga tin-edyer mas may kahilwayan sangsa iban. Ano ang rason?

Paano Ko Atubangon ang Akon mga Sala?

Ang tanan makahimo sing sala, pero indi tanan nagatuon sa sini.