Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Ngaa Dapat Ko Buligan ang Iban?

Ngaa Dapat Ko Buligan ang Iban?

 Duha ka sekreto nga wala mahibaluan sang madamo

Sekreto #1: Kon mahinatagon ka, mahimo gid nga mabalik ini sa imo!

Matalupangdan gid sang iban nga maalwan ka. Gani, mangin maalwan man sila sa imo. Ang Biblia nagasiling:

  • “Ugalia ang paghatag, kag ang mga tawo magahatag sa inyo. . . . Takson man nila kamo suno sa inyo pagtakus.”Lucas 6:38.

  • “Pagatakson kamo sa talaksan nga ginagamit ninyo.”Lucas 6:38, Biblia sang Katilingban sang mga Kristiano.

Sekreto #2: Kon ginabuligan mo ang iban, ginabuligan mo ang imo kaugalingon!

Ang paghimo sing maayo para sa iban nagapabakod sang imo respeto sa kaugalingon kag nagapahalipay sa imo. Ang Biblia nagasiling:

  • “May kapin nga kalipay sa paghatag sangsa pagbaton.”Binuhatan 20:35.

  • “Kon maghanda ikaw sang sinalusalo, agdaha ang mga tawo nga imol, mga baldado, mga piang, mga bulag; kag mangin malipayon ka, bangod wala sila sing ibalos sa imo.”Lucas 14:13, 14.

 Mga pamatan-on nga nagaulikid

Madamo sing pamatan-on nga nagaulikid sa iban! Binagbinaga ang pila ka halimbawa.

“Kon kis-a, gusto ko lang magpulupatawhay kag magtan-aw sing TV. Pero ginadumdom ko gid sanday Nanay kag Tatay nga ato pa sa ulubrahan, kag kapoy na sila pagpauli nila. Gani, ginapanghugasan ko dayon ang mga pinggan, naga-vacuum, kag nagapangtrapo. Mahilig sila magpangape, gani ginatimplahan ko man sila. Pagpauli ni Nanay, nagasiling sia, ‘Katinlo sang aton balay ba! Kag kahamot pa. Salamat gid Day, ha!’ Nalipay gid ako pirme maghimo sini para kanday Nanay kay Tatay.”—Casey.

“Ginasuportahan gid ako sang akon mga ginikanan, kag ginahatag nila ang tanan ko nga kinahanglan. Gani sang naguba ang ila salakyan sang nagligad nga tuig, ginhatagan ko sila sang kuarta halin sa akon sinuptan. Ginbalibaran nila ako, pero ginpilit ko sila nga batunon ini. Kulang pa gani ini, kag nalipay gid ako kay may nahatag ako sa ila.”—Holly.

Nahibaluan mo bala? Madamo nga pamatan-on nga mga Saksi ni Jehova ang nalipay sa pagbulig sa iban paagi sa pagtudlo sing Biblia. Ang iban nagsaylo pa gani sa mga pungsod nga nagakinahanglan sing dugang nga manunudlo sing Biblia.

“Halin sa Estados Unidos nagsaylo ako sa Mexico para magbulig sa pagtudlo sing Biblia. Wala ako sing sarang, gani wala ako sing mahatag nga kuarta ukon pagkabutang. Pero natun-an ko nga ang paggamit sang akon tion kag kusog sa pagwali mas ginaapresyar sangsa materyal nga mga butang.”—Evan.

 Paano ko mabuligan ang iban?

Gusto mo man bala mabatyagan ang kalipay sa pagbulig sa iban? Ari ang pila ka suhestyon.

Buligi ang imo pamilya:

  • Manglampaso, manghugas sing pinggan, ukon maninlo sang imo kuarto—bisan wala ka ginasugo

  • Magluto

  • Maghimo sing kard para pasalamatan ang imo mga ginikanan

  • Buligi ang imo utod sa iya homework

Buligi ang indi miembro sang imo pamilya:

  • Hatagi sing kard ang nagamasakit

  • Tinlui ang ugsaran sang inyo tigulang na nga kaingod

  • Bisitahi ang mga indi na makahalin sa ila balay

  • Regaluhi ang isa mo ka kilala nga ara sa mabudlay nga sitwasyon

Tip: Magpamensar sing iban pa gid nga ideya. Dayon himua nga tulumuron nga may mabuligan ka nga isa sini nga semana. Sigurado gid nga malipay ka!

“Kon magbulig ka sa iban, malipay ka. Mabatyagan mo nga may nahimo ka, kag ginaapresyar ini sang iban. Maga-enjoy ka sa paghimo sini, bisan pa nga sa primero daw wala mo ini ginapensar. Daw ini pa gani ini matawag nga sakripisyo, kay ang matuod ikaw ang nanginpulos sa sini.”—Alana.

 

Magtuon sing Dugang Pa

Ang Pinakamaayo nga Kabuhi

Gusto mo bala mangin malipayon? Pamatii samtang ginaistorya ni Cameron kon paano sia nangin malipayon sa malayo nga lugar.