Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Mauntat Bala Ako Eskwela?

Mauntat Bala Ako Eskwela?

Ari ang dapat mo binagbinagon

Pila ka tuig nga pag-eskwela ang ginapatuman sang kasuguan? Nalab-ot mo na bala ini? Kon wala pa kag mauntat ka eskwela, buot silingon wala mo ginsunod ang sugo sang Biblia nga “magpasakop sa superyor nga mga awtoridad.”—Roma 13:1.

Nalab-ot mo na bala ang imo mga tulumuron sa pag-eskwela? Ano ang gusto mo lab-uton sa imo pag-eskwela? Indi ka pa sigurado? Dapat nabal-an mo na ini. Kay kon indi, daw pareho ka lang sang isa ka pasahero sa tren nga wala kabalo kon diin makadto. Gani, magpabulig sa imo mga ginikanan nga sabton ang mga pamangkot sa seksion sa ubos nga “ Ang Akon mga Tulumuron sa Pag-eskwela.” Indi maayo nga mag-untat ka sa pag-eskwela kon wala mo pa malab-ot ang tulumuron nga ginkasugtan ninyo sang imo mga ginikanan.

Kon mag-untat ka eskwela daw pareho lang nga naglumpat ka sa tren nga wala ka pa makalab-ot sa imo kaladtuan

Ngaa gusto mo mag-untat? Siguro gusto mo buligan sa pinansial ang imo pamilya ukon buligan ang iban nga magtuon parte sa Dios. Ang indi maayo nga mga rason amo nga malikawan ang mga eksam ukon homework. Dapat mabal-an mo kon ano gid ang imo rason—maayo bala ukon indi? Kon mag-untat ka eskwela para malikawan lang ang mga problema, mahimo may malain ini nga resulta.

Kon mag-untat ka eskwela daw pareho lang nga naglumpat ka sa tren nga wala ka pa makalab-ot sa imo kaladtuan. Mahimo nga indi ka komportable sa tren kag wala ka nanamian sa mga pasahero. Pero kon maglumpat ka, indi ka makalab-ot sa imo kaladtuan kag mahimo maaksidente ka pa. Sing kaanggid, mabudlayan ka nga mangita sing obra kag kon makakita ka gid man mas manubo ang imo sueldo kon ikumparar sa mga nakatapos.

Gani sa baylo nga mag-untat, atubanga ang mga problema sa eskwelahan. Makabulig ini sa imo nga matun-an ang pagbatas kag mangin handa ka sa pag-atubang sa mga kabudlayan kon mag-obra ka na.

 Ang Akon mga Tulumuron sa Pag-eskwela

Ang edukasyon makabulig gid sa imo nga makakita sing obra para masuportahan ang imo kaugalingon kag ang imo pamilya sa ulihi. (2 Tesalonica 3:10, 12) Napamensaran mo na bala kon ano nga obra ang gusto mo? Ang ginatun-an mo bala subong makabulig sa imo nga malab-ot ini? Para mabal-an mo, sabta ang masunod nga mga pamangkot:

  • Diin ako maayo? (Halimbawa, maayo ka bala makig-istorya sa iban? Nanamian ka bala mangutinguti ukon mangkulukay-o? Eksperto ka bala mag-analisar ukon magsolbar sang mga problema?)

  • Ano nga mga obra ang puede ko sudlan nga magamit ko ang akon mga ikasarang?

  • Ano nga mga obra ang available sa amon lugar?

  • Ano nga mga subject ang ginakuha ko subong nga makabulig sa akon para makakita sing obra?

  • Ano nga mga subject ang puede ko pilion para madali ko malab-ot ang akon mga tulumuron?

Dumduma nga ang imo tulumuron, amo nga makatapos ka kag magamit ang imo ineskwelahan. Gani indi puede nga mangin estudyante ka na lang mientras tanto para malikawan ang mga responsibilidad. Kon himuon mo ini, daw pareho lang nga wala ka na gid nanaug “sa tren.”