Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Mapa-tattoo Bala Ako?

Mapa-tattoo Bala Ako?

 Ngaa madamo ang nagapa-tattoo?

“Para sa akon, ang mga tattoo matahom nga art,” siling sang pamatan-on nga si Ryan.

Ang motibo sa pagpa-tattoo mahimo may epekto sa imo panan-aw sa sini. Halimbawa, ang tin-edyer nga si Jillian nagsiling: “May isa ka estudyante sa amon eskwelahan nga napatyan sang Nanay sang bata pa sia. Gani sang nagtin-edyer sia, ginpa-tattoo niya sa iya tangkugo ang ngalan sang iya iloy. Para sa akon, ka-sweet sina nga tattoo.”

Bisan ano pa ang motibo, dapat ka mamensar sing maayo antes ka magdesisyon nga magpabutang sa imo panit sing bisan ano nga indi na gid mapanas! Ano nga mga pamangkot ang dapat mo pensaron antes ka magpa-tattoo? Kag ano nga mga prinsipio sa Biblia ang makabulig sa imo nga makadesisyon sing pinakamaayo?

 Ano ang dapat mo ipamangkot?

Ano ang mahimo nga mangin halit sini sa imo panglawas? “Ang tattoo nagasamad sang panit, gani posible ini magresulta sa impeksion kag iban pa nga komplikasyon,” siling sang website nga Mayo Clinic. “Kon kis-a, ginatubuan sing mga bukolbukol ang tattoo. Mahimo man ini mag-keloid—pagbukol bangod sa sobra nga pagtubo sang tisyu samtang nagapali.” Dugang pa, ini nga website nagasiling: “Kon ang instrumento nga gingamit sa pag-tattoo kontaminado sang dugo nga may balatian, mahimo ka malatnan sang sarisari nga balatian nga halin sa dugo.”

Ano ang epekto sini sa imo reputasyon? Gusto mo man ukon indi, ang imo hitsura may ginasugid parte sa imo. Base sa imo hitsura, puede ka makilal-an subong hamtong ukon immature, masaligan ukon iresponsable. “Kon makakita gani ako sang may tattoo, ginapensar ko dayon nga ina nga tawo palainom kag mahilig mag-party,” siling sang tin-edyer nga si Samatha.

May iban pa gid nga pagtan-aw sa sini ang 18 anyos nga si Melanie. “Para sa akon,” siling niya, “ginatabunan sang tattoo ang imo natural nga katahom. Daw pareho bala nga indi gusto sang mga may tattoo nga makita mo kon sin-o gid sila, gani ginatago nila ang ila kaugalingon paagi sa tattoo.”

Gusto mo bala ini asta san-o? Sa pagligad sang panahon, mahimo ka magtambok ukon bisan ang pag-edad mahimo magpaunat kag magpabag-o sang hitsura sang tattoo. “Nakita ko ang hitsura sang mga tattoo sa isa ka tawo pagligad sang mga tinuig, kag kalaw-ay sini,” siling sang pamatan-on nga si Joseph.

“Sa masami, ang mga tattoo nagadaan,” siling sang 21 anyos nga si Allen. “Ang importante sadto sa nagpa-tattoo mahimo nga indi na importante sa iya pagligad sang pila lang ka tuig.”

Eksakto si Allen. Kay ang matuod, samtang nagaedad ang mga tawo, nagabag-o ang ila pagtan-aw sa kabuhi, ang ila nanamian, ang ila balatyagon—pero ang ila tattoo wala. “Indi ko gusto idugang sa listahan sang mga hinulsulan ko sa ulihi ang tattoo nga magapahanumdom lang sa akon sang akon binuang nga balatyagon,” siling ni Teresa.

 Ano nga mga prinsipio sa Biblia ang naangot sa sini?

Ang isa ka hamtong nga tawo nagapamensar anay sing maayo antes magdesisyon. (Hulubaton 21:5; Hebreo 5:14) Gani, pamensari sing maayo ang masunod nga mga prinsipio sa Biblia nga may labot sa tattoo.

  • Colosas 3:20: “Kamo nga mga anak, mangin matinumanon kamo sa inyo mga ginikanan sa tanan nga butang, kay kalahamut-an ini sa Ginuo.”

    Ano ang mahimo nga mangin resulta kon nagaistar ka upod sa imo mga ginikanan pero wala mo ginarespeto ang ila ginasiling?

  • 1 Pedro 3:3, 4: “Ang inyo pagpatahom indi dapat sa panggua lamang, subong sang pagsalapid sing buhok kag pagsuksok sing bulawan nga mga alahas ukon malahalon nga mga bayo, sa baylo dapat patahumon ninyo ang inyo tagipusuon, ang inyo nasulod nga pagkatawo, paagi sa pagsuksok sang indi madinulunton nga bayo, ang malinong kag malulo nga espiritu.”

    Sa banta mo, ngaa ginapadaku gid sang Biblia ang “nasulod nga pagkatawo”?

  • 1 Timoteo 2:9: “Ang mga babayi dapat man magpamayo . . . nga may kaugdang kag maligdong nga hunahuna.”

    Ano ang buot silingon sang “kaugdang”? Sa pagligad sang tion, ngaa mas matahom ang kaugdang sangsa art sa lawas?

  • Roma 12:1: “Ipresentar ninyo ang inyo lawas nga isa ka halad nga buhi, balaan kag kalahamut-an sa Dios. Sa sini nga paagi magahimo kamo sing sagrado nga pag-alagad nga ginagamit ang inyo ikasarang sa pagpangatarungan.”

    Ngaa importante sa Dios kon paano mo ginatratar ang imo lawas?

Base sa sini nga mga rason, madamo ang nagdesisyon nga indi magpa-tattoo. Kag may nakita sila nga mas maayo sangsa tattoo. Si Teresa nga ginsambit kaina, nagsiling: “Kon may nanamian ka nga mga tinaga ukon slogan ukon may tawo nga importante gid para sa imo, himua ang ginasiling sina nga mga tinaga ukon sugiri ina nga tawo kon daw ano sia ka importante para sa imo. Sa baylo nga ipa-tattoo ini, himua ang imo mga ginapatihan.”