Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Paano Ko Makontrol ang Akon Kaakig?

Paano Ko Makontrol ang Akon Kaakig?

 Quiz

  • San-o ka nagapangakig?

    • wala

    • kon kis-a

    • adlaw-adlaw

  • Daw ano kalala ka mangakig?

    • haganhagan

    • grabe

    • nagabalingaso

  • Sin-o ang pirme mo naakigan?

    • imo ginikanan

    • imo utod

    • imo abyan

Kon pamatyag mo kinahanglan mo nga kontrolon ang imo kaakig, ini nga artikulo makabulig gid sa imo! Pero binagbinaga anay ang pila ka rason kon ngaa importante nga mangin kalmado kon akig ka.

 Ngaa importante ini?

Para sa imo ikaayong-lawas. Ang Hulubaton 14:30 nagasiling: “Ang malinong nga tagipusuon nagahatag sing kabuhi sa lawas.” Pero, suno sa Journal of Medicine and Life “ang kaakig isa ka daku nga kabangdanan sang mga balatian sa tagipusuon.”

Para sa imo mga abyan. Ang Biblia nagasiling: “Indi ka makig-upod sa tawo nga madali maakig, kag indi ka makig-angot sa tawo nga maakigon.” (Hulubaton 22:24) Gani kon maakigon ka, indi ka matingala kon ginalikawan ka sang iban. “Kon indi mo makontrol ang imo kaakig,” siling ni Jasmine, “madula mo ang maayo nga mga pag-abyanay.”

Para sa imo reputasyon. “Kon grabe ka mangakig,” siling sang 17 anyos nga si Ethan, “mabal-an ini sang iban kag mangin basihan ini sang ila opinyon parte sa imo.” Gani pamangkuta ang imo kaugalingon, ‘Ano ang gusto ko nga pagkilala sa akon—kalmado kag mahidaiton ukon madali maakig?’ Ang Biblia nagasiling: “Ang indi dali maakig nagapakita sing masangkad nga paghangop, apang ang indi mapinasensiahon nagapakita sang iya kabuangan.”Hulubaton 14:29.

Wala sing gusto mag-upod sa tawo nga grabe mangakig

 Ang puede mo himuon

Binagbinaga ang masunod nga mga bersikulo kag komento, dayon pamangkuta ang imo kaugalingon sang mga pamangkot sa ubos.

  • Hulubaton 29:22: “Ang tawo nga madali maakig nagatuga sing pag-ilinaway; ang tawo nga madali magsingkal makahimo sing madamo nga sala.”

    “Sang bag-o pa lang ako nagtin-edyer, nabudlayan gid ako magkontrol sang akon kaakig. Amo man sini ang problema sang mga paryente ko sa side ni Papa. Ara ini sa genes sang amon pamilya. Mabudlay gid kontrolon ang amon kaakig!”—Kerri.

    Madali bala ako maakig? Kon magsiling ako nga ang akon maayo nga mga kinaiya ginpangabudlayan ko, husto bala nga ibasol sa akon genes ang akon malain nga mga kinaiya?

  • Hulubaton 15:1: “Ang malulo nga sabat nagapatahaw sang kaakig, apang ang matigdas nga pulong nagapaibwal sang kaakig.”

    “Ang sekreto amo ang pagtinguha nga kontrolon ang imo emosyon. Kon tun-an mo nga mangin kalmado kag magpokus sa maayo, ang pagpangakig indi na mangin opsyon—ukon isyu.”—Daryl.

    Kon may magpaakig sa akon, ngaa daku ang epekto sang akon una nga reaksion?

  • Hulubaton 26:20: “Kon wala sing gatong, mapatay ang kalayo.”

    “Kon mainayuhon ang akon sabat, nagakalma ang akon kaistorya kag makaistoryahanay kami nga wala nagataas ang tingog.”—Jasmine.

    Paano ang akon mga tinaga kag panghulag makagatong sa kaakig?

  • Hulubaton 22:3: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”

    “Kon kis-a kinahanglan nga maghalin anay ako kag mamensar kon ano ang natabo, dayon kon kalmado na ako maatubang ko na ini sing maayo.”—Gary.

    Kon daw nagapanginit kamo, san-o pinakamaayo nga maghalin anay nga wala nagahatag sing impresyon nga nag-walk out ka?

  • Santiago 3:2: “Kita tanan nagakasandad sing madamong beses.”

    “Dapat hinulsulan naton ang aton mga sala, pero dapat makatuon man kita sa sini. Kon madusmo kita dapat mabangon kita dayon kag mangin determinado nga indi na ini pagsuliton.”—Kerri.

Tip: Mag-set sang goal. Mangin determinado nga magpabilin nga kalmado sa imo ginpat-od nga tion—halimbawa sa sulod sang isa ka bulan. Maghimo sing diary kag bantayi ang imo pag-uswag.

Magtuon sing Dugang Pa

Paano Kontrolon ang Kaakig?

Lima ka pasad sa Biblia nga paagi nga makabulig sa imo nga kontrolon ang kaakig.

“Ang Pagbinagbinag sang Tawo Nagapakuli sa Iya sa Pagpangakig”

Ang halimbawa sa kabuhi ni David, nga hari sa Israel, makabulig sa imo para makontrol ang kaakig kon masaklaw ka ukon maugot.

Buligan Bala Ako sang Dios Kon Magpangamuyo Ako?

Nagaulikid gid bala ang Dios sa aton mga problema?