Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Paano Ko Ipaathag ang Akon Panindugan Parte sa Sex?

Paano Ko Ipaathag ang Akon Panindugan Parte sa Sex?

“Sigurado ka, virgin ka pa?”

Kon gusto mo ini sabton kag ang imo sabat huo, may kompiansa ka bala sa pagsabat? Makabulig sa imo ini nga artikulo!

 Ano ang buot silingon sang virgin?

Ang isa matawag nga virgin kon wala pa gid sia makaagi sex.

Pero may lainlain nga porma ang pagpakig-sex. Gani ginatawag sang iban ang ila kaugalingon nga “technical virgin” bangod bisan indi sila aktual nga nakig-sex, may iban sila nga ginahimo.

Halimbawa ang pagpakig-sex puede man magpatuhoy sa oral sex, anal sex, ukon paghimas sang kinatawo sang iban.

Ang punto: Ang isa matawag lang nga virgin kon wala gid sia nakahimo sing bisan ano nga buhat nga ginagamit ang kinatawo sang iban. Dapat naton maintiendihan nga ang talaksan sang Biblia sa seksuwal nga moralidad wala lamang nagapatuhoy sa aktual nga pagpakig-sex.

 Ano ang ginasiling sang Biblia parte sa sex?

Ang Biblia nagasiling nga ang pagpakig-sex dapat lamang himuon sang lalaki kag babayi nga nakasal sa isa kag isa. (Hulubaton 5:18) Gani, kon gusto sang isa nga mahamuot sa iya ang Dios, indi sia dapat maghimo sang bisan ano nga seksuwal nga buhat sa indi niya bana ukon asawa.1 Tesalonica 4:3-5.

Siling sang iban, ang Biblia indi na uso kag nalipasan na sang moderno nga kalibutan. Pero, dumdumon naton nga sa aton moderno nga kalibutan madamo man ang may STD, nagabulagay, kag nagabusong nga wala sing bana. Gani, ang aton moderno nga kalibutan wala sing kinamatarong nga maglaygay parte sa moral.1 Juan 2:15-17.

Kon pensaron mo sing maayo, husto gid ang pagsulundan sang Biblia sa moral. Halimbawa: Ginhatagan ka sang $1,000 nga kuarta. Ihaboy mo lang bala ini sa kay bisan sin-o nga maagi?

Pareho man sini kon parte sa sex. “Indi ko gusto nga ihatag ang akon pagka-virgin sa tawo nga mahimo indi ko na madumduman ang ngalan sa ulihi,” siling sang 14 anyos nga si Sierra. Amo man sini ang panindugan sang 17 anyos nga si Tammy. “Ang sex isa ka espesyal nga regalo nga indi gid dapat pag-usikan,” siling niya.

Ang punto: Pagsulundan sang Biblia nga ang mga wala pa sing bana ukon asawa dapat magpabilin nga virgin kag mangin matinlo sa moral.1 Corinto 6:18; 7:8, 9.

 Ano ang imo panindugan parte sa sini?

  • Sa banta mo, rasonable bala ukon tuman ka estrikto ang pagsulundan sang Biblia parte sa sex?

  • Sa banta mo, OK lang bala mag-sex ang duha nga indi kasal basta nagapalanggaanay lang sila?

Sa tapos nila mapamensaran sing maayo, madamo nga pamatan-on ang nagsiling nga maayo gid nga maghulat kag magpabilin nga virgin kag matinlo sa moral. Wala gid nila ini ginhinulsulan kag wala man sila nagbatyag nga ginadingutan. Binagbinaga ang ginsiling sang iban sa ila:

  • “Maayo gid nga virgin ako! Wala ako ginakonsiensia, kag nalikawan ko ang pisikal kag emosyonal nga kasakit nga resulta sang premarital sex.”—Emily.

  • “Nalipay ako nga wala ako sang malain nga mga inagihan sa sex, kag kanami sang akon pamatyag kay sigurado ako nga wala ako sing STD.”—Elaine.

  • “May nabatian ako nga pila ka babayi nga kaedad ko ukon mas magulang sa akon nga nagsiling nga ginhinulsulan gid nila ang pag-sex kag tani kuno naghulat sila, kag indi ko gusto nga matabo man ini sa akon.”—Vera.

  • “Madamo ako sing kilala nga nagalalain gihapon kag grabe gid ang paghinulsol bangod nadula nila ang ila pagka-virgin ukon madamo ang ila nangin karelasyon. Sa akon lang, masubo gid ang amo sina nga klase sang kabuhi.”—Deanne.

Ang punto: Dapat sigurado ka sa imo panindugan antes ka pa makaatubang sang sitwasyon nga mahimo ka piliton ukon tentaron nga mag-sex.Santiago 1:14, 15.

 Paano mo ipaathag ang imo panindugan sa iban?

Ano ang isabat mo kon pamangkuton ka sang imo panindugan parte sa sex? Nagadepende ini pirme sa sitwasyon.

“Kon nagapanuya lang sila, nagasabat gid ako. Ginahambalan ko sila, ‘Wala kamo ya labot sa akon,’ kag nagahalin ako dayon.”—Corinne.

“Ang iban sa eskwelahan nanamian lang magpang-bully. Kon amo sina ang ila intension sa pagpamangkot sa akon, wala ako nagasabat.”—David.

Nahibaluan mo bala? Kon kis-a, nagahipos lang si Jesus bilang ‘sabat’ sa mga nagayaguta sa iya.Mateo 26:62, 63.

Pero, ano ang himuon mo kon sinsero ang nagapamangkot sa imo? Kon sa banta mo, ginarespeto niya ang Biblia, mahimo mo sambiton ang isa ka teksto pareho sang 1 Corinto 6:18, nga nagasiling nga ang tawo nga nagahimo sang premarital sex nagapakasala ukon nagahalit sa iya kaugalingon nga lawas.

Bisan gamiton mo man dayon ang Biblia ukon indi, dapat makita sa imo panghambal nga kumbinsido ka sa imo panindugan. Dumduma nga may kinamatarong ka nga ipabugal ang imo desisyon nga magpabilin nga matinlo sa moral.1 Pedro 3:16.

“Ang paghambal nga may kompiansa nagapakita nga wala mo ginakuwestyon ukon ginaduhaduhaan ang imo panindugan, kag ginahimo mo ini bangod amo ini ang husto kag indi lamang bangod ginhambalan ka nga himuon ini.”—Jill.

Ang punto: Kon kumbinsido ka sa imo panindugan parte sa sex, mapaathag mo ini sa iban. Kag mahimo makibot ka sa ila reaksion. “Nagdayaw ang akon mga katrabaho bangod virgin pa ako,” siling sang 21 anyos nga si Melinda. “Daw wala man sila matingala. Para sa ila, pamatuod pa ini sang pagpugong sa kaugalingon kag maayo nga paggawi.”

Tip! Kon kinahanglan mo ang bulig para matun-an sing maayo ang imo panindugan parte sa sex, i-download ang worksheet nga “Paano Mo Ipaathag ang Imo Panindugan Parte sa Sex?” Puede mo man mabasa ang libro nga Questions Young People Ask—Answers That Work.

  •  Ang kapitulo 24 sang Volume 1 natig-uluhan “Will Sex Improve Our Relationship?”

  •  Ang kapitulo 5 sang Volume 2 natig-uluhan “Why Stay a Virgin?”

“Nanamian gid ako sa paathag sang ‘Young People Ask’ nga mga libro. Halimbawa, sa pahina 187 sang Volume 1 ang premarital sex ginkumparar sa isa ka malahalon nga kulintas nga ginpanghatag lang sing libre. Ginahimo mo ang imo kaugalingon nga cheap. Makita man sa pahina 177 nga ang premarital sex pareho sa pagkuha sang isa ka matahom nga painting kag ginhimo ini nga doormat. Pero ang paborito ko gid amo ang piktyur sa pahina 54 sang Volume 2. Ang kapsion nagasiling: ‘Ang premarital sex makumparar sa pagbukas sang isa ka regalo antes pa ini ginhatag sa imo.’ Daw pareho lang nga ginakawatan mo ang isa ka tawo—ang imo mangin bana ukon asawa sa ulihi.”—Victoria.