Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Handa Na Bala Ako Magpain?

Handa Na Bala Ako Magpain?

Katuyuan sang Dios nga kon magdalagku na ang mga pamatan-on, biyaan nila ang ila amay kag iloy kag magtukod sang ila kaugalingon nga pamilya. (Genesis 2:23, 24; Marcos 10:7, 8) Paano mo mahibaluan kon bala handa ka na magpain? Binagbinaga ang tatlo ka pamangkot.

 Ano ang akon motibo?

Tan-awa ang masunod nga listahan. Pamangkuta ang imo kaugalingon, ‘Ano ang mga rason kon ngaa gusto ko gid magpain?’

  • Makalikaw sa mga problema sa balay

  • Dugang nga kahilwayan

  • Indi pagpakanubuon sang mga abyan

  • Updan ang isa ka abyan nga mapain man

  • Magboluntaryo sa iban nga lugar

  • Makatuon nga magkinaugalingon

  • Makabuhin sa salaguron sang akon mga ginikanan

  • Iban pa

Wala man sing malain sa mga rason nga nalista diri. Pero ang pamangkot, Ano ang imo motibo? Halimbawa, basi gusto mo lang nga wala sing nagabantay sang imo hulag. Kon amo, mahimo nga lain ang matabo sangsa imo ginapaabot!

Si Danielle, nga nagpain sing makadali sang 20 anyos sia, madamo gid sing natun-an. Nagsiling sia: “Indi gid naton mahimo ang tanan naton nga gusto. Bisan nagkinaugalingon ka na, limitado gihapon ang imo mahimo bangod sa imo iskedyul ukon kulang ang imo kuarta.” Gani, indi magpadalidali nga magdesisyon nga magpain bangod lang sa impluwensia sang iban.Hulubaton 29:20.

 Handa na bala ako?

Ang pagpain pareho sa paglagaw sa kabukiran sing isahanon. Himuon mo bala ini bisan indi ka kabalo magtakod sing tent, magdabok, magluto, ukon magbasa sing mapa? Indi gid! Pero madamo nga pamatan-on ang nagapain bisan indi pa sila gawa kabalo kon paano mangabuhi.

Ang maalam nga si Hari Solomon nagsiling: “Ang mahalongon nagatan-aw sa iya paglakat.” (Hulubaton 14:15) Para mabuligan ka nga mahibaluan kon bala handa ka na magpain, binagbinaga ang mga masunod:

Pagkapot sang kuarta: “Wala pa ko ’kaagi nga ako ang naggasto,” siling ni Serena nga 19 anyos. “Nakulbaan ako magpain, kag magpensar nga ako na ang mabadyet sang akon kuarta.” Paano mo matun-an ang husto nga pagkapot sang kuarta?

Ang isa ka hulubaton sa Biblia nagsiling: “Ang maalam nga tawo nagapamati kag nagabaton sing dugang pa nga pagtudlo.” (Hulubaton 1:5, NW) Makabulig kon pamangkuton mo ang imo mga ginikanan kon pila ang gasto sang isa ka tawo kada semana para sa arkila, pagkaon, salakyan, kag iban pa. Dayon magpatudlo sa ila kon paano magbadyet kag magbayad sang mga balayran.

Ulubrahon sa balay: Si Brian, nga 17 anyos, nagsiling nga ang nabudlayan gid niya kon magpain sia amo ang pagpanglaba. Paano mo mahibaluan kon bala masarangan mo na atipanon ang imo kaugalingon? Si Aron, nga 20 anyos, nagsiling: “Tilawi nga mangabuhi nga ikaw lang sa sulod sang isa ka semana. Dapat ikaw ang maluto, ikaw ang manindahan, kag imo kuarta ang gastuhon. Ikaw man ang manglaba kag maplantsa sang imo bayo kag maninlo sang imo kuarto. Kag tilawi nga maglakat nga wala ka ginadul-ong ukon ginasugat.” Kon himuon mo ini, matun-an mo ang duha ka butang: (1) Makatuon ka sang mga ulubrahon sa balay, kag (2) mas maapresyar mo ang ginahimo sang imo mga ginikanan.

Pagpakigbagay sa iban: Ayuhay bala kamo sang imo mga ginikanan kag mga utod? Kon indi, mahimo nagapati ka nga mas maayo pa nga magpain ka upod sa imo abyan. Pero binagbinaga ang ginsiling sang 18 anyos nga si Eve: “Ang duha ko ka amiga nagpain. Migahay gid sila antes sila nag-updanay sa isa ka apartment, pero indi gali sila makaagwanta sa isa kag isa. Ang isa mahipid kag ang isa indi. Ang isa serioso sa iya pagsimba sa Dios, ang isa naman indi. Indi gid sila magsahuay!”

Ano ang solusyon? Ang 18 anyos nga si Erin nagsiling: “Matun-an mo makigbagay sa iban samtang wala ka pa makapain. Matun-an mo kon paano solbaron ang mga problema kag magpaumod. Nakita ko nga ang mga nagpain para malikawan ang ila mga problema sa balay wala gid makatuon magsolbar sang problema kay pirme lang nila ini ginapalagyuhan.”

Personal nga kaangtanan sa Dios: Ang iban nagapain kay ginatamaran sila magsunod sa relihion sang ila ginikanan. Ang iban naman may regular nga pagtuon sa Biblia kag pagsimba sang primero, pero sang ulihi napabay-an na nila ini. Ano ang imo himuon para ang imo ‘pagtuo indi mahalitan kaangay sang naguba nga sakayan’?1 Timoteo 1:19.

Himua nga batasan ang regular nga pagbasa sing Biblia kag pagsimba. Tilawi nga isulat sa kalendaryo ang imo iskedyul kag tan-awa kon masunod mo ini sa sulod sang isa ka bulan bisan pa wala ka ginasugo nga himuon ini.

 Sa diin ako nagapadulong?

Ang iban nagapain para makapalagyo sa mga problema ukon sa awtoridad sang mga ginikanan. Gusto lang nila nga makahalin, bisan wala sila makahibalo kon diin sila nagapadulong. Pareho ini sa pagmaneho nga sa side mirror nagatan-aw. Kon ang drayber sa likod lang nagatan-aw, indi niya makita ang sa atubang. Ano ang ginatudlo sini? Para magmadinalag-on, indi lang pagpain ang imo pamensaron. Dapat may mapuslanon ka nga tulumuron kag ginatinguhaan mo ini nga lab-uton.

Bisan ano man ang imo tulumuron, pamensara ini sing maayo. “Ang mga buko sang mga mapisan pat-od nga nagapadulong sa kabuganaan,” siling sang isa ka hulubaton sa Biblia, “apang ang nagadasudaso nagapadulong sa kakulangan.” (Hulubaton 21:5, Biblia sang Katilingban sang mga Kristiano) Pamatii ang laygay sang imo mga ginikanan. (Hulubaton 23:22) Ipangamuyo ini kag dumduma ang mga prinsipio sa Biblia nga ginbinagbinag bag-o lang.

Gani, ang pamangkot indi Handa na bala ako magpain? kundi Masarangan ko na bala atipanon ang akon kaugalingon nga panimalay? Kay kon makasarang ka na, puede ka na mangabuhi nga ikaw lang.