Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Friends Lang Gid Bala Kami?—Bahin 2: Ano ang Ginapakita Ko sa Iya?

Friends Lang Gid Bala Kami?—Bahin 2: Ano ang Ginapakita Ko sa Iya?

Kon gusto sang imo abyan nga may istoryahon, gusto mo ara ka para sa iya. Kag sining karon lang, pirme na kamo nagaistoryahanay sang isa mo ka abyan. Ang problema kay opposite sex sia. ‘Friends lang kami,’ hambal mo sa imo kaugalingon, kag abi mo pareho man sina ang ginabatyag sang imo abyan. May dapat ka bala kabalak-an?

 Ano ang puede matabo?

Indi malain kon may mga abyan ka nga opposite sex. Pero, ano abi kon close ka kaayo sa isa sa ila? Kon amo sina, basi magpensar sia nga may luyag ka sa iya.

Amo bala sina ang gusto mo nga pensaron niya? Binagbinaga ang pila ka sitwasyon kon ngaa posible ina matabo, bisan pa indi mo hungod.

  • Ginahatagan mo sia sing sobra nga atension.

    “Bisan indi mo kontrolado ang balatyagon sang isa, indi mo dapat paggatungan ang sitwasyon paagi sa paghambal nga friends lang kamo pero pirme mo man sia ginatawgan kag ginaistorya.”—Sierra.

  • Pagbalos sa atension nga ginahatag sa imo.

    “Indi ako ang una nga nagatext, pero pirme ako naga-reply sa mga text sang isa ka babayi. Gani sang ulihi mabudlay sa akon nga ipaathag nga friend lang gid ang pagkabig ko sa iya.”—Richard.

  • Paghampang sa balatyagon sang iban.

    “Para sa iban ang pag-flirt hampanghampang lang. Ginahampangan lang nila ang balatyagon sang iban. Pirme gid ini nagakatabo, kag sa masami may isa gid nga masakitan.”—Tamara.

Ang punto: Kon ang isa pirme mo gina-istorya kag ginahatagan sing sobra nga atension, puede ini masal-an nga may luyag ka sa iya.

 Ngaa dapat mo ini pamensaron?

  • Makasakit ini sa balatyagon.

    Ang Biblia nagasiling: “Ang ginapaabot nga wala madayon nagapasubo sang tagipusuon.” (Hulubaton 13:12) Ano ayhan ang imo paabuton kon daw nagapakita ang isa nga may luyag sia sa imo?

    “May ekspresyon nga, ‘Ginbilin mo sia sa taga.’ Buot silingon may nahulik ka nga isda, pero wala mo ini ginbuy-an kag wala mo man ini ginkuha. Mahimo man ini matabo sa isa ka relasyon. Kon wala ka plano nga mangin kamo pero ‘ginbilin mo sia sa taga,’ masakitan gid sia.”—Jessica.

  • Makaguba ini sang imo reputasyon.

    Ang Biblia nagasiling: ‘Pangitaa ninyo indi lamang ang inyo personal nga kaayuhan, kundi ang iya man sang iban.’ (Filipos 2:4) Ano ang masiling mo sa tawo nga iya lang kaayuhan ang iya ginapangita? Ano ang epekto sini sa iya reputasyon?

    “Wala gid ’ko nanamian sa lalaki nga naga-flirt sa mga babayi. Kag kon naga-flirt sia, posible nga sa ulihi magaluib man sia sa iya asawa. Ginagamit niya ang iban para magdugang ang iya kompiansa, nga nagapakita nga kaugalingon lang niya ang iya ginapensar.”—Julia.

Ang punto: Ang mga tawo nga daw nagapakita nga may luyag pero wala man sing intension nga mangaluyag masakitan lang kag makasakit man sa iban.

 Ano ang puede mo himuon?

  • Ang Biblia nagasiling nga kabiga ang “lamharon nga mga lalaki subong nga imo mga utod” kag ang “lamharon nga mga babayi subong nga imo mga utod upod ang bug-os nga kaputli.” (1 Timoteo 5:1, 2) Kon sundon mo ini nga talaksan, maproteksionan mo ang imo pagpakig-abyan sa opposite sex.

    “Kon may bana ako, indi ako mag-flirt sa bana sang iban. Maayo gid nga himuon ko na ini subong samtang wala pa ako bana, nga mangin balanse sa akon pagpakig-angot sa opposite sex.”—Leah.

  • Ang Biblia nagasiling: “Kon madamo sing hambal, indi malikawan ang sala.” (Hulubaton 10:19) Ini nga prinsipio maaplikar indi lang sa pag-istoryahanay kundi sa pagtext man, pati sa kon daw ano kamo ka pirme nagateksanay kag ang unod sang inyo text.

    “Indi mo pagteksan ang babayi adlaw-adlaw kon wala ka man lang plano nga nobyahon sia.”—Brian.

  • Ang Biblia nagasiling: “Ang kaalam nga halin sa langit una sa tanan putli.” (Santiago 3:17) Sa iban nga kultura, ang hakos mahimo nga wala sing malisya pero puede man ini masal-an nga may luyag ang isa.

    “Ginatinguhaan ko gid nga mangin mainabyanon pero nagadistansia ako—sa pisikal man ukon sa iban pa nga pagpakig-angot.”—Maria.

Ang punto: Usisaa sing maayo ang imo pagpakig-angot sa opposite sex. “Mabudlay makakita sing maayo nga mga abyan,” siling sang tin-edyer nga si Jennifer, “kag indi mo ini gusto nga maguba bangod may ginhimo ka nga masal-an nila nga may luyag ka.”

 Mga tip

  •  Mamati sa ginahambal sang iban. Kon may mamangkot sa imo, “Nobyahanay kamo ni . . .?” mahimo nagapakita ini nga sobra na kamo ka-close.

  •  Dapat palareho ang imo pagkabig sa imo mga abyan nga opposite sex. Indi maghatag sing sobra nga atension sa isa sa ila.

  • Maghalong sa pagtext. Daw ano ka pirme ka nagatext, ano ang unod sini, kag ano oras ka nagatext sa imo abyan? “Indi nami nga nagatext ka sa opposite sex kon tungang-gab-i na,” siling ni Alyssa.

Magtuon sing Dugang Pa

Friends Lang Gid Bala Kami?—Bahin 1: Ano ang Ginapakita Niya sa Akon?

Mga tip nga makabulig sa imo nga mahibaluan kon bala ang isa may luyag sa imo ukon friends lang gid kamo.