Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

PAMANGKOT SANG MGA PAMATAN-ON

Friends Lang Gid Bala Kami?—Bahin 1: Ano ang Ginapakita Niya sa Akon?

Friends Lang Gid Bala Kami?—Bahin 1: Ano ang Ginapakita Niya sa Akon?

May naluyagan ka, kag sigurado ka nga naluyag man sia sa imo. Kay man, pirme kamo nagateksanay, daw kamo lang pirme ang nagaistoryahanay bisan sa mga pagtilipon . . . , kag ang iban niya nga text sa imo daw may kahulugan gid.

Gani, ginpamangkot mo sia kon ano gid ang matuod sa inyo relasyon, para masiguro mo nga may luyag man sia sa imo. Ang sabat niya, “Friend lang gid ang pagkabig ko sa imo.”

 Ano ang imo ginbatyag?

“Nainit gid ako sa iya kag sa akon kaugalingon! Adlaw-adlaw kami nagateksanay, kag naga-care gid sia sa akon. Siempre, nahulog ang buot ko sa iya.”—Jasmine.

“May friend ako nga babayi nga pirme ko upod sa pag-tsaperon sa kilala namon nga naganobyahanay. Kon kis-a daw nagagua nga naga-double date kami. Pirme kami nagaistoryahanay, kag sang ulihi pirme na kami nagateksanay. Daw indi ko mabaton sang ginsilingan niya ako nga friends lang kami kag sang nabal-an ko nga may gina-deyt gali sia nga iban.”—Richard.

“May lalaki nga ga-text sa akon adlaw-adlaw, kag kon kis-a naga-flirt kami sa isa kag isa. Pero sang ginsugid ko sa iya ang akon ginabatyag, nagkadlaw sia kag nagsiling, ‘Wala pa ko ya plano mag-deyt subong!’ Naghilibion gid ako.”—Tamara.

Ang punto: Kon pamatyag mo may espesyal kamo nga pagtamdanay sang isa ka tawo, pero nabal-an mo nga ikaw lang gali ang may luyag sa iya, natural lang nga maakig ka, mahuya, ukon magbatyag nga daw gintraidoran. “Naglalain ako sang natabo ini sa akon, kag nasakitan gid ako,” siling sang pamatan-on nga si Steven. “Madugay antes nagbalik ang akon pagsalig sa iban.”

 Ngaa natabo ini?

Bangod sa text kag sa social media, mas madali mahulog ang imo buot sa isa nga wala sing luyag sa imo. Binagbinaga ang ginsiling sang iban nga pamatan-on.

“Mahimo nga gina-text ka sang isa kay nagapalipas oras lang gali sia, pero mahimo mo pensaron nga may gusto sia sa imo. Kag kon adlaw-adlaw ka niya gina-text, pamatyag mo espesyal ka gid sa iya.”—Jennifer.

“Mahimo nga tuodtuod gid ang ginabatyag sang isa, samtang ang isa naman ’gapangita lang sang istoryahon, ukon gusto niya lang nga madugangan ang iya kompiansa.”—James.

“Ang simple nga pag-text sing ‘good night’ mahimo masal-an nga may luyag ang isa, pero balewala lang gali ini sa nag-text.”—Hailey.

“Ang smiley mahimo nagakahulugan sing ‘nice ako’ ukon ‘naga-flirt ako.’ Kon kis-a abi sang gin-text naga-flirt ka.”—Alicia.

Ang punto: Indi paghunahunaa nga kon ginahatagan ka sing atension, may luyag na dayon.

Mas mahapos bala ini ihambal sangsa himuon? Huo. Ang Biblia nagasiling: “Ang tagipusuon madaya labaw sa tanan nga butang kag makatalagam.” (Jeremias 17:9) Bangod sini, mahimo magpati ka nga pareho ang ginabatyag ninyo sa isa kag isa. Kag kon mabal-an mo ang matuod, marealisar mo nga ang inyo relasyon isa lang gali ka damgo.

 Ang puede mo himuon

  • Hibalua ang matuod. Pamensari sing maayo ang inyo relasyon. Pamangkuta ang imo kaugalingon, ‘May rason gid bala ako sa pagpati nga espesyal ang pagkabig sa akon sini nga tawo?’ Indi pagpasugti nga daugon sang imo emosyon ang imo “ikasarang sa pagpangatarungan.”Roma 12:1.

  • Manilag. Bisan pa may mga pamatuod ka kon ngaa para sa imo indi kamo friends lang, mas maayo nga magpokus ka sa mga ginahaumhaum mo. Indi pagpensara nga bangod may balatyagon ka sa isa, pareho man ang iya ginabatyag sa imo.

  • Maghulat. Kon ang isa wala nagsiling nga may luyag sia sa imo, indi pag-iubos ang imo balatyagon kay posible masakitan ka lang.

  • Mangin honest. Ang Biblia nagsiling nga may “tion sa paghambal.” (Manugwali 3:7) Kon gusto mo mabal-an kon bala indi lang friend ang pagkabig niya sa imo, istoryaha sia. “Kon ikaw lang ang may luyag,” siling sang pamatan-on nga si Valerie, “mas maayo nga masakitan ka subong, sangsa magligad ang binulan kag marealisar mo nga wala man lang sia gali luyag sa imo.”

Ang punto: “Bantayi ang imo tagipusuon,” siling sang Hulubaton 4:23. Kon nagakahulog na ang imo buot sa isa, hibalua kon bala amo man sia sa imo. Kay kon indi, pareho lang nga nagtanom ka sa bato.

Kon may luyag man sia sa imo, kag ara na kamo sa husto nga edad, ara na sa inyo kon bala padayunon ninyo ang inyo relasyon. Tandai, mangin mabakod lamang ang pag-asawahay kon ang bana kag asawa pareho sing ginapatihan parte sa Dios kag honest sa isa kag isa. (1 Corinto 7:39) Ang matuod, sigurado nga nag-umpisa sila bilang mag-abyan kag padayon nga nangin mag-abyan bisan pa mag-asawa na sila.Hulubaton 5:18.

Magtuon sing Dugang Pa

Friends Lang Gid Bala Kami?—Bahin 2: Ano ang Ginapakita Ko sa Iya?

Puede ayhan pensaron sang imo abyan nga may luyag ka sa iya? Tan-awa ini nga mga tip.