Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Importante Bala Kon Ano ang Pilion Ko nga Musika?

Importante Bala Kon Ano ang Pilion Ko nga Musika?

“Samtang nagahimos ako, nagapatokar ako musika. Pagsakay ko sa akon salakyan, mapatokar ako musika. Kon nagarelaks ako sa balay, nagapanglimpyo, ukon bisan nagabasa—nagapamati ’ko gihapon. Pirme gid ’ko nagapamati sing musika.”—Carla.

Pareho bala kamo ni Carla nga mahilig sa musika? Kon amo, ini nga artikulo makabulig sa imo nga magpili sing maayo nga musika, mag-enjoy, kag maglikaw sa mga siod sini.

 Mga benepisyo

Ang pagpamati sa musika pareho sa pagkaon. Maayo ini para sa imo kon husto ang klase kag kadamuon sini. Binagbinaga:

  • Ang musika makapaayo sang imo pamatyag.

    “Kon indi maayo ang akon adlaw, mapatokar ako sang akon paborito nga musika kag maumpawan dayon ako.”—Mark.

  • Ang musika makapadumdom sa imo sang nagligad.

    “May mga kanta nga pirme nagapadumdom sa akon sang isa ka maayo nga hitabo, gani nalipay gid ako kon mabatian ko ini.”—Sheila.

  • Ang musika makapahiusa.

    “Nagtambong ako sa internasyonal nga kombension sang mga Saksi ni Jehova, kag sang ginkanta sang tanan nga tumalambong ang katapusan nga kanta, naghibi gid ako. Sarisari ang amon lenguahe, pero ginhiusa kami sang musika.”—Tammy.

  • Ang musika makabulig sa imo nga matun-an ang importante nga mga kinaiya.

    “Ang pagtuon sa pagtokar sang isa ka instrumento sa musika makabulig nga matun-an mo ang disiplina kag pagkamapinasensiahon. Kay man, indi ini madali tun-an. Kinahanglan mo magpraktis para magsagad ka.”—Anna.

Nahibaluan mo bala? Ang pinakadaku nga libro sa Biblia—ang Salmo—ginahuman sang 150 ka ambahanon.

Pareho sa pagkaon, pilia man ang imo ginapamatian nga musika

 Mga siod

Ang iban nga musika, pareho sa kontaminado nga pagkaon, mahimo makahililo. Binagbinaga kon ngaa.

  • Madamo nga kanta ang may liriko nga nagalaragway sing maathag nga seksuwal nga buhat.

    “Halos tanan nga popular nga kanta daw parte na tanan sa sex. Wala na nila ini ginatago.”—Hannah.

    Ang Biblia nagasiling: “Ang seksuwal nga imoralidad kag ang tanan nga sahi sang kahigkuan ukon kakagod indi gid paghinambitan sa tunga ninyo.” (Efeso 5:3) Pamangkuta ang imo kaugalingon, ‘Indi ko bala matuman ini nga sugo bangod sa akon musika?’

  • Ang iban nga musika makapasubo sa imo.

    “Kon kis-a may mga gab-i nga nagahigda lang ako kag nagapamati sa musika nga nagapasubo sa akon. Madumduman ko ang negatibo nga mga butang kon masubo ang musika.”—Tammy.

    Ang Biblia nagasiling: “Labaw sa tanan nga dapat mo bantayan, bantayi ang imo tagipusuon.” (Hulubaton 4:23) Pamangkuta ang imo kaugalingon, ‘Mapensaran ko bala ang negatibo nga mga butang bangod sa akon musika?’

  • Ang iban nga musika makapaakig sa imo.

    “Ang mga musika nga parte sa kaakig, kaugot sa kaugalingon, kag dumot makapalain sa akon. Natalupangdan ko nga nagabag-o ang akon mood kon makapamati ako sina nga klase sang musika. Natalupangdan man ini sang akon pamilya.”—John.

    Ang Biblia nagasiling: “Isikway ini tanan: kasingkal, kaakig, kalainan, masakit nga hambal, kag paghambal sing binastos.” (Colosas 3:8) Pamangkuta ang imo kaugalingon, ‘Nangin maakigon bala ako, ukon wala sing labot sa balatyagon sang iban bangod sa akon musika?’

Ang punto? Magpili. Amo ina ang ginatinguhaan nga himuon sang tin-edyer nga si Julie. “Pirme ko gina-check ang akon musika kag gina-delete ang tanan nga sa banta ko indi nagakaigo,” siling niya. “Indi ini mahapos, pero bal-an ko nga amo ini ang dapat ko himuon.”

Amo man sini ang natun-an sang pamatan-on nga si Tara. Nagsiling sia: “Kon kis-a, may kanta sa radyo nga nami ang beat, pero pagkabati ko sang lyrics, bal-an ko nga dapat ko sayluhon ang estasyon. Ang paghimo sini daw pareho sa pag-untat kaon sang manamit nga cinnamon roll pagkatapos sang isa ka kagat! Pero kon may kusog ako sa paglikaw sa isa ka kanta parte sa sex, posible gid nga may kusog man ako nga likawan ang sex antes ang kasal. Wala ko ginabalewala ang epekto sa akon sang musika.”

Magtuon sing Dugang Pa

MAGPABILIN KAMO SA GUGMA SANG DIOS

Kon Paano Makapili sing Maayo nga Kalingawan

May tatlo ka pamangkot nga makabulig sa imo nga magpili sing maalamon.