Magdiretso sa kaundan

Magdiretso sa secondary menu

Mga Saksi ni Jehova

Hiligaynon

PAMANGKOT SANG MGA PAMATAN-ON

Creation Ukon Evolution—Bahin 3: Ngaa Dapat Magpati sa Creation?

Creation Ukon Evolution—Bahin 3: Ngaa Dapat Magpati sa Creation?

“Kon nagapati ka sa creation, basi magsiling ang iban nga mango ka, nga binatabata lang ina nga pagpati, ukon nga gin-brainwash ka sang inyo relihion.”​—Jeanette.

Pareho ka bala kay Jeanette? Kon amo, mahimo nagaduhaduha ka man sa imo pagpati sa creation. Kay man, indi naton gusto nga tawgon sang iban nga ignorante. Ano ang makabulig sa imo?

 Mga pagpamatok sa imo pagpati

1. Kon nagapati ka sa creation, mapensar ang mga tawo nga wala ka nagaugyon sa siensia.

“Siling sang akon maestra, ang nagapati sa creation amo lang ang mga tawo nga natamaran magpangita sang paathag kon paano nagapanghikot ang kalibutan.”​—Maria.

Ang dapat mo mahibaluan: Ang nagahambal sini wala makahibalo sang kamatuoran. Ang kilala nga mga sientista pareho nanday Galileo kag Isaac Newton nagapati sa Manunuga. Ang ila mga pagpati wala nagasumpakil sa ila gugma sa siensia. Sing kaanggid, sa pagtamod sang pila ka sientista subong, ang siensia kag ang pagpati sa creation wala man nagasumpakilay.

Tilawi ini: I-type ang ekspresyon nga “interbyu siensia” sa box nga Mangita sa Watchtower ONLINE NGA LIBRARY para sa pila ka halimbawa sang kilala nga mga tawo sa medisina kag siensia nga nagapati sa creation. Hibalua kon ngaa amo sini ang ila pagpati.

Ang punto: Kon nagapati ka sa creation, indi buot silingon nga wala ka nagaugyon sa siensia. Ang matuod, samtang nagadamo ang imo nahibaluan parte sa pagpanghikot sang kalibutan, labi man nga nagabakod ang imo pagpati sa creation.​—Roma 1:​20.

2. Kon nagapati ka sa ginasiling sang Biblia parte sa creation, mapensar ang iban nga panatiko ka.

“Para sa madamo nga tawo, joke lang ang pagpati sa creation. Nagapati sila nga ang ginasiling sa Genesis uluistorya lang.”​—Jasmine.

Ang dapat mo mahibaluan: Masami nga sayop ang pagpati sang mga tawo sa ginasiling sang Biblia parte sa creation. Halimbawa, may mga creationist nga nagasiling nga sining karon lang gintuga ang duta ukon nga ang kabuhi gintuga sa sulod sang anom ka adlaw nga may tig-24 oras. Pero, wala ini ginasuportahan sang Biblia.

  • Ang Genesis 1:1 nagasiling: “Sa ginsuguran gintuga sang Dios ang mga langit kag ang duta.” Wala ini nagasumpakil sa ebidensia base sa siensia nga ang duta binilyon ka tuig na nga nagaluntad.

  • Ang tinaga nga “adlaw” nga gingamit sa Genesis mahimo magpatuhoy sa malawig nga mga tion. Ang matuod, sa Genesis 2:4 ang tinaga nga “adlaw” nagalaragway sa kabilugan nga anom ka adlaw sang pagpanuga.

Ang punto: Ang rekord sang Biblia parte sa creation nagasanto sa mga kamatuoran sa siensia.

 Binagbinaga ang imo mga ginapatihan

Ang pagpati sa creation indi “wala sing basihan nga pagtuo.” Sa baylo, nagakinahanglan ini sing mabakod nga pangatarungan. Binagbinaga:

Ang imo mga inagihan sa kabuhi nagatudlo sa imo nga basta may isa nga gindesinyo, may desinyador gid ini. Kon makakita ka sing kamera, eroplano, ukon balay, nagasiling ka gid dayon nga may naghimo sini. Indi bala amo man sini ang imo hunahunaon kon parte sa mata sang tawo, sa pispis nga nagalupadlupad, ukon sa aton planeta nga Duta?

Binagbinaga ini: Masami nga ginailog sang mga engineer ang ila makita sa kinaugali para mapauswag ang ila mga imbension, kag gusto nila nga kilalahon gid ang bag-o nga mga butang nga nahimo nila. Husto ayhan nga kilalahon naton ang tawo nga nag-imbento kag ang iya mga gin-imbento pero indi pagkilalahon ang Manunuga kag ang Iya mga tinuga?

Husto bala pensaron nga may nagdesinyo sang eroplano pero sa pispis wala?

 Mga bulig para mausisa mo ang mga ebidensia

Mapabakod mo ang imo pagpati sa creation paagi sa pag-usisa sang mga ebidensia nga makita sa kinaugali.

Tilawi ini: I-type ang “gindesinyo bala ini” (pati ang mga quotation mark) sa box nga Mangita sa Watchtower ONLINE NGA LIBRARY. Magpili sang artikulo nga nagustuhan mo sa serye sang Magmata! nga “Gindesinyo Bala Ini?” Hibalua kon ano gid ang talalupangdon sa kada artikulo nga ginbinagbinag. Paano ini nagkumbinsi sa imo nga may nagdesinyo gid sini?

Mag-research sing dugang pa: Gamita ang masunod nga mga brosyur para mausisa mo sing mas detalyado ang mga ebidensia sang creation.

  • Gintuga Bala ang Kabuhi?

    • Eksakto gid ang nahamtangan sang duta kag may ikasarang ini nga magsakdag sang kabuhi.​—Tan-awa ang pahina 4-​10.

    • Mga halimbawa sang mga desinyo nga makita sa kinaugali.​—Tan-awa ang pahina 11-​17.

    • Ang ginasiling sang Genesis sa Biblia nagahisanto sa siensia.​—Tan-awa ang pahina 24-​28.

  • The Origin of Life​—Five Questions Worth Asking

    • Ang kabuhi indi puede nga naghalin sa wala sing kabuhi nga butang.​—Tan-awa ang pahina 4-7.

    • Ang buhi nga mga organismo tuman ka komplikado, gani indi mahimo nga naporma ini paagi sa wala sing direksion ukon wala naplano nga mga hitabo.​—Tan-awa ang pahina 8-​12.

    • Ang ikasarang sang genetic code sa pagtago sang impormasyon labaw kaayo sangsa ikasarang sang moderno nga teknolohiya.​—Tan-awa ang pahina 13-​21.

    • Indi lang isa ang ginhalinan sang kabuhi. Ginpakita sang pagtuon sa mga fossil nga ang dalagku nga mga sapat nagluntad sing hinali, indi sing amat-amat.​—Tan-awa ang pahina 22-​29.

“Nakumbinsi gid ako nga may Dios bangod sang akon nakita sa kinaugali, halin sa mga sapat sa duta, sa uniberso, kag ang pagkaorganisado sini.”​—Thomas.

Magtuon sing Dugang Pa

MAGMATA!

Ano ang Ginasiling sang Biblia Parte sa Pagtuga?

Ginalaragway sang Biblia nga gintuga sang Dios ang kabuhi sa duta sa sulod sang anom ka “adlaw.” Tig-beinte kuatro oras bala ang tagsa ka adlaw?

ANG LALANTAWAN—TULUN-AN NGA EDISYON

Ginapahayag sang mga Tinuga ang Buhi nga Dios

Hibalua kon paano naton mabuligan ang iban nga mahangpan ang kamatuoran parte sa Manunuga kag mapabakod ang aton pagtuo sa iya.

MAAYONG BALITA HALIN SA DIOS!

Ano ang Katuyuan sang Dios Para sa Duta?

Ginapaathag sang Biblia kon ngaa gintuga sang Dios ang duta, kon san-o madula ang pag-antos, kag kon ano ang matabo sa duta sa palaabuton kag sa mga nagaistar sa sini.