Wala ginasunod sang pila ka tin-edyer ang ila curfew. Ang iban ginatunto nila ang ila ginikanan mahimo paagi sa pagbinutig ukon pag-iskapo sa balay para makakadto sa ila mga abyan. Ano ang himuon mo kon nadula ang pagsalig mo sa imo tin-edyer nga bata?

•  Rebelde bala ang akon bata?

•  Ano abi kon ginatunto ako sang akon bata?

•  Sin-o ang balasulon?

•  Paano ko buligan ang akon bata nga mabalik ang pagsalig ko sa iya?

•  Ang ginasiling sang mga ginikanan

 Rebelde bala ang akon bata?

 Indi man gid. Ang Biblia nagasiling: “Ang kabuangan yara sa tagipusuon sang bata,” kag sa masami amo gid sina ang makita sa mga tin-edyer. (Hulubaton 22:15) “Ang mga pamatan-on padasudaso kag wala anay ginapamensaran sing maayo kon nagadesisyon,” sulat ni Dr. Laurence Steinberg. “Gani paabuta nga makahimo gid sila sang sala nga desisyon.” a

 Ano abi kon ginatunto ako sang akon bata?

 Indi maghunahuna nga ginahungod gid sang imo bata nga indi ka pagpatihon. Ginapakita sang research nga importante man para sa mga pamatan-on kon ano ang ginahunahuna sang ila ginikanan nga maayo para sa ila, bisan pa kon tan-awon wala nila ini ginapabaloran. Bisan pa wala ini ginapakita sang imo bata, mahimo nagalalain man sia kay wala ka niya gintuman.

 Sin-o ang balasulon?

•    Ang iya bala kaupdanan? Ang Biblia nagasiling: “Ang pagpakig-upod sa malain nga mga tawo nagapalain sang mapuslanon nga mga batasan.” (1 Corinto 15:33) Ang mga abyan sang imo bata may daku gid nga impluwensia sa iya. Amo man ang social media kag ang mga advertisement. Isa pa, kay kulang pa sing eksperiensia ang imo bata makahimo sia sing indi maayo nga desisyon. Pero siempre, dapat matun-an sang imo bata nga batunon ang resulta sang iya desisyon kay makabulig ini sa iya nga mangin responsable nga adulto sa ulihi.

•    Ako bala ang may sala? Basi nagahunahuna ka nga sobra ka kaestrikto amo nga nagrebelde ang imo bata. Ukon basi sobra ka naman kamatinuguton sa imo bata kag ginapagustuhan lang sia. Imbes nga mamensar kon sa diin ka nagkulang mas maayo nga pamensaron kon paano mo sia buligan.

 Paano ko buligan ang akon bata nga mabalik ang pagsalig ko sa iya?

•   Kontrola ang imo reaksion. Mahimo ginapaabot sang imo bata nga mangakig ka. Pero imbes nga mangakig, kalmado nga istoryaha ang imo bata parte sa iya nahimo nga sala. Basi curious lang sia, naboringan, nasubuan, ukon nagabatyag nga wala sia sang abyan? Siempre indi man ini rason nga maghimo sia sang sala. Pero makabulig ini sa imo kag sa iya nga maintiendihan kon ngaa nakahimo sia sing sala.

   Prinsipio sa Biblia: “Dapat mangin maabtik sa pagpamati, mahinay sa paghambal, indi dali maakig.”—Santiago 1:19.

•   Buligi ang imo bata nga makatuon sa natabo sa iya. Pamangkuta sia, Ano ang imo natun-an sa natabo sa imo? Ano ang himuon mo sa sunod kon matabo ini liwat sa imo? Ini nga mga pamangkot makabulig sa imo bata nga mabinagbinag niya ang sitwasyon para makahimo sia sang mas maayo nga desisyon.

   Prinsipio sa Biblia: “Magsaway, kag maglaygay nga may bug-os nga pagkamapinasensiahon kag kalantip sa pagpanudlo.”—2 Timoteo 4:2.

•   Ipaintiende sa imo bata nga may resulta gid ang ila ginahimo. Makabulig gid ini kon nakahimo sila sing sala. Halimbawa, naguba ang imo pagsalig sa imo bata kay gingamit niya ang imo salakyan nga wala nakalisensia. Gani puede ka maghimo sing limitasyon kon san-o lang sia maggamit sang salakyan.

   Prinsipio sa Biblia: “Kon ano ang ginasab-ug sang tawo, ini man ang iya anihon.”—Galacia 6:7.

•   Magpokus kon paano mabalik ang pagsalig. Matuod, indi dayon mabalik ang pagsalig. Pero dapat mabal-an sang imo bata nga sa pagligad sang tion mabalik man ang pagsalig. Kon mabatyagan sang imo bata nga indi na mabalik ang imo pagsalig, mahimo indi na sia magtinguha.

   Prinsipio sa Biblia: “Indi ninyo pagpaakiga ang inyo mga anak, agod indi sila maluyahan sing buot.”—Colosas 3:21.