Magdiretso sa kaundan

BULIG PARA SA PAMILYA

Kon Paano Mo Makontrol ang Imo Kaakig

Kon Paano Mo Makontrol ang Imo Kaakig

May nahambal ukon nahimo ang imo tiayon nga nagpaakig sa imo, kag ginatinguhaan mo nga punggan ang imo kaakig. Pero nabatyagan niya nga may problema kag ginpamangkot ka niya. Gani nagdugang pa gid ang imo kaakig. Paano mo makontrol ang imo kaakig kon mag-utwas ang mga sitwasyon nga pareho sini?

 Ang dapat mo mahibaluan

  • Ang pagpadala sa kaakig makahalit sa imo panglawas. Suno sa research, ang indi makontrol nga kaakig nagaresulta sa high blood, sakit sa tagipusuon, depresyon, kag problema sa panunaw. Nagaresulta man ini sa insomnia, dugang nga kabalaka, sakit sa panit, kag stroke. Gani insakto gid ang ginasiling sang Biblia: “Isikway ang kaakig . . . , kay magaresulta ini sa kahalitan.”—Salmo 37:8, footnote.

  • Ang paghupot sing kaakig makahalit man. Kon huptan mo ang kaakig, daw pareho ini sa balatian nga ara sa sulod sang imo lawas nga nagahalit sa imo. Halimbawa, mahimo amat-amat ka mangin negatibo ukon malain ang imo pagtamod sa iban. Bangod sini, mabudlayan sa imo ang imo tiayon kag makaguba ini sang inyo pag-asawahay.

 Ang puede mo himuon

  • Pamensara ang maayo nga mga kinaiya sang imo tiayon. Isulat ang tatlo ka kinaiya nga nanamian mo sa iya. Kon may nahambal sia ukon nahimo nga nagpaakig sa imo, pamensara ang mga kinaiya nga ginsulat mo. Makabulig ini sa imo nga makontrol ang imo kaakig.

    Prinsipio sa Biblia: “Ipakita nga mapinasalamaton kamo.”Colosas 3:15.

  •  Mangin mapinatawaron. Una, pamensara kon ano ang pagtamod sang imo tiayon. Makabulig ini sa imo nga mapalambo ang empatiya—ang ginasiling sang Biblia nga “simpatiya.” (1 Pedro 3:8) Dayon pamangkuta ang imo kaugalingon, ‘Grabe gid bala ang nahimo niya nga sala amo nga indi ko sia mapatawad?’

    Prinsipio sa Biblia: “Katahom . . . nga palampason ang sala.”Hulubaton 19:11.

  •  Mangin mainayuhon kag maghalong sa imo ginahambal. Maggamit sing ‘ko’ kag ‘ako,’ imbes nga ‘ka’ kag ‘ikaw.’ Halimbawa, imbes nga magsiling nga, “Wala ka gid sing konsiderasyon sa akon ginabatyag kay wala ka gid nagtawag kon diin ka,” magsiling, “Nabalaka gid ako kay gab-i na kag basi naano ka na.” Kon mainayuhon ka sa paghambal, makabulig ini sa imo nga makontrol ang imo kaakig.

    Prinsipio sa Biblia: “Maghambal kamo pirme sing mainayuhon, nga daw gintimplahan sing asin.”Colosas 4:6.

  •  Mamati sing matinahuron. Kon nakapabutyag ka na sang imo balatyagon, hatagi man sing kahigayunan ang imo tiayon sa pagpabutyag sang iya opinyon kag indi sia pagsapara. Kon tapos na sia, ihambal ang iya ginsiling para mabal-an mo kon naintiendihan mo ini. Daku gid ang mabulig sang pagpamati para makontrol mo ang imo kaakig.

    Prinsipio sa Biblia: “Mangin maabtik sa pagpamati, mahinay sa paghambal.”Santiago 1:​19.