Magdiretso sa kaundan

BULIG PARA SA PAMILYA

Kon Indi Pareho ang Inyo Pagtamod

Kon Indi Pareho ang Inyo Pagtamod

Ang indi pareho nga hilig, batasan, kag personalidad nagapabudlay na nga daan sa mag-asawa. Pero mahimo mas nagapabudlay pa gid sa ila ang pila ka isyu pareho sang:

  • Kon daw ano kalawig nga tion ang ihatag sa pamilya

  • Kon paano magbadyet sang kuarta

  • Kon bala mabata ukon indi

Ano ang himuon mo kon indi pareho ang inyo pagtamod nga mag-asawa?

 Kon ano ang dapat mo mahibaluan

Ang pagsahuay wala nagakahulugan nga pareho gid ang mag-asawa sa tanan nga butang. Bisan pa nagasahuay gid ang bana kag asawa, indi sa tanan nga tion pareho ang ila pagtamod, bisan sa importante nga mga butang.

“Suod gid ang amon pamilya. Kada weekend, nagatipon kami upod sa amon mga lolo kag lola, mga tiyo kag tiya, kag mga pakaisa. Pero wala pirme nagatipon ang pamilya sang akon bana. Gani indi pareho ang amon pagtamod sa kon ano kalawig kami dapat nga makig-upod sa amon pamilya ukon kon ano kalawig kami mag-istorya sa amon pamilya nga malayo sa amon.”—Tamara.

“Indi pareho ang pagpadaku sa akon kag sa akon asawa. Gani indi pareho ang amon pagtamod kon parte sa pagbadyet sang kuarta. Sa una nga pila ka bulan pagkatapos sang amon kasal, nagabaisay kami kon kaisa parte sa sini. Wala ini nasolbar sa isa lang ukon duha ka istorya.”—Tyler.

Ang duha ka tawo mahimo lainlain ang pagtan-aw sa isa ka talan-awon. Mahimo man ini matabo sa mag-asawa ilabi na sa mga butang nga indi pareho ang ila pagtamod

Ang pila ka problema indi masolbar sa pagpaiway lang. Halimbawa, ano abi kon ang ugangan sang isa nagmasakit kag kinahanglan atipanon? Ukon ano abi kon ang isa gusto nga may bata pero ang isa indi? *

“Makapila na namon naistoryahan sang akon asawa kon bala mabata kami. Pirme lang niya ini ginapamensar, pero wala gid nagapareho ang amon pagtamod. Indi ko gusto nga magpaiway lang.”—Alex.

Ang indi pareho nga pagtamod wala nagakahulugan nga indi kamo mangin madinalag-on. Siling sang iban nga eksperto, kon indi kamo mag-ugyunay nga mag-asawa sa importante nga isyu, himua ang tanan para ikaw ang masunod bisan pa magbulagay kamo. Pero ina nga “solusyon” nasentro lang sa imo balatyagon kag indi sa imo panumpa sa Dios nga unungan mo ang imo asawa ukon bana ano man ang matabo.

 Ang puede mo himuon

Tinguhai gid nga tumanon ang imo sinumpaan sa kasal. Kon tinguhaan mo gid nga tumanon ang imo sinumpaan, magabuligay kamo nga mag-asawa sa pagsolbar sang inyo mga problema.

Prinsipio sa Biblia: “Ang gintingob sang Dios, indi pagbulagon sang tawo.”Mateo 19:6.

Binagbinaga sing maayo. Halimbawa, ang isa sa inyo gusto nga may bata pero ang isa indi. May pila ka butang nga maayo binagbinagon, lakip na ang:

  • Kabakod sang inyo kaangtanan.

    Masarangan bala ninyo ang dugang nga stress sa pagpadaku sa bata?

  • Responsibilidad kon ang isa mangin ginikanan.

    Indi lang pagkaon, bayo, kag puluy-an ang dapat iaman sang isa.

  • Pinansial nga kahimtangan.

    Mabalanse mo bala ang obra, pamilya, kag iban pa nga obligasyon?

Prinsipio sa Biblia: “Sin-o sa inyo nga luyag magtukod sang torre ang wala anay nagapungko kag nagasuma sang gasto?”—Lucas 14:28.

Binagbinaga ang tanan nga anggulo. Mahimo masolusyunan ninyo ang pila ka bahin sang isyu. Halimbawa, kon ang isyu parte sa kon bala mabata, ang isa nga daw indi gusto mahimo mamangkot sa iya kaugalingon:

  • ‘Kon magsiling ako nga indi ko gusto magbata, buot ko bala silingon, indi gid ako gusto magbata ukon indi lang anay subong?’

  • ‘Nagaduhaduha bala ako nga basi indi ako mangin maayo nga ginikanan?’

  • ‘Nahadlok bala ako nga basi indi na ako maatipan sang akon asawa ukon bana?’

Sa pihak nga bahin, ang isa nga gusto magbata, mahimo mamangkot sa iya kaugalingon:

  • ‘Handa na bala kami sa mga responsibilidad nga mangin ginikanan?’

  • ‘Masarangan bala namon ang gasto sa pagpadaku sa bata?’

Prinsipio sa Biblia: “Ang kaalam nga halin sa langit . . . makatarunganon.”—Santiago 3:17.

Batuna nga may bentaha man ang pagtamod sang imo bana ukon asawa. Ang duha ka tawo mahimo lainlain ang pagtan-aw sa isa ka talan-awon. Ang mag-asawa mahimo lainlain man ang pagtan-aw sa isa ka butang—halimbawa, kon paano magbadyet sang kuarta. Antes ninyo istoryahan ang mga butang nga wala ninyo ginaugyunan, istoryahi anay ninyo ang mga butang nga ginaugyunan ninyo.

  • Ano ang pareho ninyo nga mga tulumuron ukon goal?

  • Ano ang bentaha sang pagtamod sang kada isa sa inyo?

  • Para magbakod ang inyo relasyon, mahimo bala nga ang isa sa inyo ukon kamo mismo nga duha mag-adjust sang inyo pagtamod kag magpaumod?

Prinsipio sa Biblia: “Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.

^ par. 14 Ang importante nga mga isyu dapat istoryahan antes sang kasal. Pero bisan pa naistoryahan na ini, mahimo matabo ang wala ginapaabot nga mga kahimtangan, ukon pagligad sang tion mahimo magbag-o ang pagtamod sang isa.—Manugwali 9:11.