Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Tagna?

Ano ang Tagna?

Ang sabat sang Biblia

Ang tagna isa ka mensahe ukon pagpahayag nga gingiyahan sang Dios. Ang Biblia nagasiling nga “ang ginhambal sang mga [propeta] naghalin sa Dios samtang ginapahulag sila sang balaan nga espiritu.” (2 Pedro 1:20, 21) Gani ang isa ka propeta nagabaton sing mensahe halin sa Dios kag nagasugid sini sa iban.Binuhatan 3:18.

Paano nagabaton sing mensahe halin sa Dios ang mga propeta?

Naggamit ang Dios sing pila ka paagi para mapadala ang iya mga panghunahuna sa iya mga propeta:

  • Paagi sa sulat. Gingamit sang Dios ini nga paagi sing makaisa sang direkta niya nga ginhatag kay Moises ang nasulat nga Napulo ka Sugo.Exodo 31:18.

  • Pagpakig-istorya paagi sa mga anghel. Halimbawa, gingamit sang Dios ang isa ka anghel para isugid kay Moises ang iya mensahe sa Paraon sang Egipto. (Exodo 3:2-4, 10) Kon kinahanglan ang espesipiko nga mensahe, ginagamit sang Dios ang mga anghel para idikta ang iya mensahe, pareho sang ginsilingan niya si Moises: “Isulat mo ini nga mga pulong, kay suno sa sini nga mga pulong nagapakigkatipan ako sa imo kag sa Israel.”Exodo 34:27. *

  • Palanan-awon. Ang iban sini ginapakita kon kaisa samtang nagabugtaw ang propeta. (Isaias 1:1; Habacuc 1:1) Ang iban naman daw matuod gid amo nga nag-entra pa sa palanan-awon ang nakakita sini. (Lucas 9:28-36; Bugna 1:10-17) May mga tion naman nga nagabugtaw sila pero daw nagadalamguhanon kay makakita sila sing palanan-awon. (Binuhatan 10:10, 11; 22:17-21) Ginapadala man sang Dios ang iya mensahe paagi sa mga damgo samtang nagatulog ang propeta.Daniel 7:1; Binuhatan 16:9, 10.

  • Paggiya sa panghunahuna. Gingiyahan sang Dios ang panghunahuna sang iya mga propeta para isugid ang iya mensahe. Amo ini ang buot silingon sang ginasiling sang Biblia: “Ang pagsulat sa bug-os nga Kasulatan gintuytuyan sang Dios.” Ang prase nga “gintuytuyan sang Dios” mahimo man i-translate nga “bunga sang Espiritu sang Dios.” (2 Timoteo 3:16; Biblia sang Katilingban sang mga Kristiano) Gingamit sang Dios ang iya balaan nga espiritu, ukon aktibo nga puersa, para ipadala ang iya mga panghunahuna sa iya mga alagad. Ang mensahe iya sang Dios, pero ang propeta ang nagapili sang mga tinaga nga isulat.2 Samuel 23:1, 2.

Ang tagna bala puro lang parte sa pagtagna sang palaabuton?

Indi, ang mga tagna sa Biblia indi lang puro pagtagna sang palaabuton. Pero, ang kalabanan nga mensahe sang Dios parte sa palaabuton, bisan sa indi direkta nga paagi. Halimbawa, sulitsulit nga ginpaandaman sang mga propeta sang Dios ang mga Israelinhon sa ila malain nga ginahimo. Nalakip sa sini nga paandam ang mga pagpakamaayo kon mamati sila, kag ang silot kon indi sila mamati. (Jeremias 25:4-6) Ang aktual nga matabo nagadepende sa dalanon nga pilion sang mga Israelinhon.Deuteronomio 30:19, 20.

Mga halimbawa sang mga tagna sa Biblia nga indi parte sa palaabuton

  • Isa ka bes sang nangayo sing bulig ang mga Israelinhon sa Dios, nagpadala sia sing propeta para ipaathag sa ila nga bangod wala nila gintuman ang mga sugo sang Dios, wala Niya sila ginbuligan.Hukom 6:6-10.

  • Sang naistorya ni Jesus ang Samaritana, ginsugid ni Jesus sa sini nga babayi ang iya mga nagligad nga nahibal-an lang ni Jesus paagi sa pagpahayag sang Dios. Nahibal-an dayon sang babayi nga si Jesus isa ka propeta bisan pa wala sia sing gintagna parte sa palaabuton.Juan 4:17-19.

  • Sang ginbista si Jesus, gintabunan sang iya mga kaaway ang iya nawong, ginsumbag sia, kag ginsilingan: “Manalagna! Pakta kon sin-o ang nagsumbag sa imo.” Wala nila ginapapakot kay Jesus ang palaabuton kundi ginapapakot nila paagi sa gahom sang Dios kon sin-o ang nagsumbag sa iya.Lucas 22:63, 64.

^ par. 7 Bisan pa daw direkta nga nakighambal ang Dios kay Moises sa sini nga halimbawa, ginapakita sang Biblia nga gingamit sang Dios ang mga anghel para isugid kay Moises ang kasuguan nga ginhatag sang Dios sa iya.Binuhatan 7:53; Galacia 3:19.

Magtuon sing Dugang Pa

Naghambal ang Dios Paagi sa Iya mga Propeta

Ano nga mga mensahe ang ginsugid sang mga propeta sang Dios? Binagbinaga ang apat ka tema nga ginsugid nila.

San-o ang Katapusan sang Kalibutan?

Para mabal-an ang sabat, dapat maintiendihan naton kon ano ang matapos suno sa Biblia.