Si Cain ang subang nga bata sang una nga mag-asawa. Posible ginpangasawa niya ang isa sa iya mga manghod ukon malapit nga paryente. Ngaa nakasiling kita sini? Binagbinagon naton ang ginasiling sang Biblia parte kay Cain kag sa iya pamilya.

Ang ginasiling sang Biblia parte kay Cain kag sa iya pamilya

•   Ang tanan nga tawo naghalin kay Adan kag Eva. “Ginhimo [sang Dios] halin sa isa ka tawo [si Adan] ang tagsa ka pungsod sang mga tawo, agod mag-istar sa bug-os nga duta.” (Binuhatan 17:26) Ang asawa ni Adan nga si Eva nangin “iloy . . . sang tanan nga nagakabuhi.” (Genesis 3:20) Gani posible gid nga ang ginpangasawa ni Cain kaliwat ni Adan kag ni Eva.

•   Si Cain kag ang iya manghod nga si Abel amo ang una sa mga kabataan nga ginbun-ag ni Eva. (Genesis 4:​1, 2) Sang gintabog si Cain bangod ginpatay niya ang iya manghod, nagsiling sia: “Sigurado gid nga patyon ako sang makakita sa akon.” (Genesis 4:14) Kay sin-o nahadlok si Cain? Ang Biblia nagsiling nga si Adan “nangin amay . . . sang mga anak nga lalaki kag babayi.” (Genesis 5:4) Sila ang iban nga kaliwat ni Adan kag ni Eva nga ginakahadlukan ni Cain.

•   Sang una kinaandan na ang pagpangasawa ukon pagpamana sa utod ukon paryente sang isa. Halimbawa, ginpangasawa sang matutom nga tawo nga si Abraham ang iya utod sa amay. (Genesis 20:12) Ang una nga tion nga wala na ginpasugtan ang pagminyo sang mag-utod ukon magparyente makita sa kasuguan nga ginhatag sang Dios kay Moises, ginatos ka tuig pagligad sang adlaw ni Cain. (Levitico 18:​9, 12, 13) Ang mga kabataan sadto sang mga mag-asawa nga malapit nga paryentihanay wala masyado sing diperensia kon ikumparar subong.

•   Ginapakita sang Biblia nga ang kabuhi ni Adan, ni Eva, kag sang ila pamilya sibu sa kasaysayan. Ang detalyado nga kaliwatan pabalik kay Adan mabasa indi lang sa libro sang Genesis, nga ginsulat ni Moises, kundi sa mga sinulatan man sang mga historian nga sanday Esdras kag Lucas. (Genesis 5:​3-5; 1 Cronica 1:​1-4; Lucas 3:​38) Ang mga manunulat sang Biblia nagsambit sa istorya ni Cain bilang hitabo sa kasaysayan.​—Hebreo 11:4; 1 Juan 3:​12; Judas 11.