Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ngaa May Madamo nga Sekta sang mga Cristiano?

Ngaa May Madamo nga Sekta sang mga Cristiano?

Ang sabat sang Biblia

Ang mga tawo nagporma sing lainlain nga “Cristiano” nga mga sekta base sa mga panudlo ni Jesucristo. Pero ginapakita sang Biblia nga isa lang ang matuod nga porma sang Cristianismo. Hibalua ang tatlo ka rason kon ngaa.

  1. Si Jesus nagsiling nga gintudlo niya “ang kamatuoran,” kag gintawag sang mga Cristiano sang una ang ila relihion nga “kamatuoran.” (Juan 8:32; 2 Pedro 2:2; 2 Juan 4; 3 Juan 3) Ginapakita sini nga indi matuod nga porma sang Cristianismo ang pagsimba sang nagasuporta sa mga doktrina nga supak sa panudlo ni Jesus.

  2. Ginatudlo sang Biblia nga ang mga Cristiano dapat ‘maghilisugot sa ila ginahambal.’ (1 Corinto 1:10) Pero madamo nga sekta sang mga Cristiano ang wala nagaugyunay bisan sa simple nga mga panudlo. Halimbawa, lainlain ang ila ginatudlo kon paano mapakita sang isa nga Cristiano sia. Indi puede nga insakto tanan ini nga mga sekta.1 Pedro 2:21.

  3. Si Jesus nagtagna nga madamo ang magahambal nga Cristiano sila pero wala nila ginatuman ang iya mga sugo, kag indi niya sila pagbatunon. (Mateo 7:21-23; Lucas 6:46) Ang iban nga tawo magatalang bangod ginpatiko sang mga lider sang relihion ang matuod nga pagsimba para sa ila personal nga interes. (Mateo 7:15) Pero mas gusto sang iban ang indi matuod nga Cristianismo bangod ginatudlo sini ang gusto nila mabatian imbes nga ang kamatuoran halin sa Biblia.2 Timoteo 4:3, 4.

Sa iya ilustrasyon ukon paanggid parte sa trigo kag hilamon, gintagna ni Jesus ang grabe nga pagrebelde (apostasya) kontra sa matuod nga Cristianismo. (Mateo 13:24-30, 36-43) Sa sulod sang malawig nga panahon, indi makilala kon sin-o ang matuod nga mga Cristiano kag kon sin-o ang butig nga mga Cristiano. Pareho sang gintagna ni Jesus, nagbaskog ang apostasya sang napatay ang mga apostoles. (Binuhatan 20:29, 30) Bisan pa indi pareho ang ginatudlo sang mga apostata, ining tanan nga porma sang indi matuod nga Cristianismo “nagsipak sa kamatuoran.”2 Timoteo 2:18.

Si Jesus nagtagna man nga magaathag sa ulihi ang kinalain sang matuod kag butig nga Cristianismo. Natabo ini sa aton panahon, sa tion sang “hingapusan sang sistema sang mga butang.”Mateo 13:30, 39.

Magtuon sing Dugang Pa

Dapat Bala Magbantala ang mga Cristiano sa Iban?

Ano ang pagtamod sang Dios kag ni Jesus parte sini?

Dapat Bala Maggamit sing Relihioso nga mga Titulo ang mga Cristiano?

Ang mga titulo nga “talahuron” kag “obispo” kinaandan na. Ini bala nga mga titulo kag ang iban pa naghalin sa Biblia?