Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Sa Krus Bala Napatay si Jesus?

Sa Krus Bala Napatay si Jesus?

Ang sabat sang Biblia

Madamo ang nagakabig sa krus subong simbulo sang Cristianismo. Pero, wala ginsambit sa Biblia kon ano ang ginlansangan kay Jesus, gani wala gid sing nakapat-od kon ano ang korte sini. Apang may pamatuod sa Biblia nga si Jesus napatay, indi sa krus, kundi sa isa ka tadlong nga usok ukon poste.

Ang Biblia masami nga nagagamit sang Griego nga tinaga nga stau·ros′ kon nagapatuhoy sa ginlansangan kay Jesus. (Mateo 27:40; Juan 19:17) Bisan pa pirme ini gina-translate nga “krus,” madamo nga iskolar ang nagapati nga ang panguna nga kahulugan sini “tadlong nga usok.” * Suno sa A Critical Lexicon and Concordance to the English and Greek New Testament, ang stau·ros′ “wala nagakahulugan sing duha ka nagabangday nga kahoy.”

Ginagamit man sang Biblia ang Griego nga tinaga nga xy′lon subong isa pa ka kahulugan sang stau·ros′. (Binuhatan 5:30; 1 Pedro 2:24) Ini nga tinaga nagakahulugan sing “kahoy,” “troso,” ukon “poste.” * Gani, ang The Companion Bible nagsiling: “Wala gid sing narekord sa Griego nga lenguahe sang B[ag-ong] T[estamento] nga nagapahangop sing duha ka bilog nga kahoy.”

Ginabaton bala sang Dios ang paggamit sing krus sa pagsimba?

Ang crux simplex, nga Latin nga tinaga para sa usok nga ginagamit sa paglansang sa isa ka kriminal

Bisan ano man ang korte sang ginlansangan kay Jesus, ang masunod nga mga kamatuoran kag bersikulo sa Biblia nagapakita nga indi kita dapat maggamit sing krus sa pagsimba.

  1. Ginasikway sang Dios ang pagsimba nga nagagamit sing mga imahen ukon simbulo, lakip ang krus. Ginsugo sang Dios ang mga Israelinhon nga indi maggamit “sang bisan ano nga dagway” sa ila pagsimba, kag ang mga Cristiano ginsugo man nga ‘magpalagyo gikan sa idolatriya.’Deuteronomio 4:15-19; 1 Corinto 10:14.

  2. Ang mga Cristiano sang una wala naggamit sing krus sa pagsimba. * Ang panudlo kag halimbawa sang mga apostoles amo ang dapat sundon sang tanan nga Cristiano.2 Tesalonica 2:15.

  3. Ang paggamit sing krus sa pagsimba may pagano nga ginhalinan. * Ginatos ka tuig sa tapos nga napatay si Jesus, sang ang mga relihion nagsipak sa iya mga panudlo, ang bag-o nga mga miembro sang simbahan “gintugutan nga maggamit sing pagano nga mga tanda kag mga simbulo,” pati ang krus. (The Expanded Vine’s Expository Dictionary of New Testament Words) Pero, wala ginakunsinti sang Biblia ang pagbaton sang pagano nga mga simbulo para makapangumbertir.2 Corinto 6:17.

^ par. 4 Tan-awa ang New Bible Dictionary, Third Edition, nga gin-edit ni D. R. W. Wood, pahina 245; Theological Dictionary of the New Testament, Volume VII, pahina 572; The International Standard Bible Encyclopedia, Revised Edition, Volume 1, pahina 825; kag The Imperial Bible-Dictionary, Volume II, pahina 84.

^ par. 5 Tan-awa ang The Expanded Vine’s Expository Dictionary of New Testament Words, pahina 1165; A Greek-English Lexicon, nanday Liddell kag Scott, Ninth Edition, pahina?1191-1192; kag Theological Dictionary of the New Testament, Volume V, pahina 37.

^ par. 9 Tan-awa ang Encyclopædia Britannica, 2003, sa topiko nga “Cross”; The Cross—Its History and Symbolism, pahina 40; kag The Companion Bible, Oxford University Press, apendise 162, pahina 186.

^ par. 10 Tan-awa ang The Encyclopedia of Religion, Volume 4, pahina 165; The Encyclopedia Americana, Volume 8, pahina 246; kag Symbols Around Us, pahina 205-207.

 

Magtuon sing Dugang Pa

Ngaa Wala Nagagamit ang mga Saksi ni Jehova sing Krus sa Ila Pagsimba?

Bisan pa Cristiano kami, wala kami nagagamit sing krus sa amon pagsimba. Ngaa?

Sin-o si Jesucristo?

Hibalua kon ngaa napatay si Jesus, kon ano ang gawad, kag kon ano ang ginahimo ni Jesus karon.