Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

Pareho Lang Bala ang Tanan nga Relihion? Tanan Bala Nagapadulong sa Dios?

Pareho Lang Bala ang Tanan nga Relihion? Tanan Bala Nagapadulong sa Dios?

Ang sabat sang Biblia

Indi pareho ang tanan nga relihion. Ang Biblia may ginasambit nga halimbawa sang mga relihion nga wala nahamut-an sang Dios. Ini nga mga relihion may duha ka kategoriya.

Kategoriya 1: Pagsimba sa butig nga mga dios

Ginalaragway sang Biblia ang pagsimba sa butig nga mga dios subong “sayop” kag “wala gid sing pulos.” (Jeremias 10:3-5; 16:19, 20) Ginsugo ni Jehova * nga Dios ang pungsod sang Israel sadto: “Indi kamo magsimba sa iban nga mga dios luwas sa akon.” (Exodo 20:3, 23; 23:24) Sang nagsimba ang mga Israelinhon sa iban nga dios, “naakig gid si Jehova.”Numeros 25:3; Levitico 20:2; Hukom 2:13, 14.

Amo gihapon ang pagtamod sang Dios sa pagsimba sa “ginatawag nga mga dios.” (1 Corinto 8:5, 6; Galacia 4:8) Ginsugo niya ang mga luyag magsimba sa iya nga indi magsimba upod sa mga sumilimba sang butig nga relihion. Nagsiling sia: “Maggua kamo sa tunga nila, kag magbulag kamo.” (2 Corinto 6:14-17) Kon pareho lang ang tanan nga relihion kag nagapadulong tanan sa Dios, ngaa nagsugo pa sini ang Dios?

Kategoriya 2: Pagsimba nga wala nahamut-an sang Dios

May mga tion nga sa ila pagsimba sa Dios, ginsunod sang mga Israelinhon ang mga pagpati kag kustombre sang mga nagasimba sa butig nga mga dios, pero ginsikway ni Jehova ang ila pagsamo sang matuod nga relihion sa butig. (Exodo 32:8; Deuteronomio 12:2-4) Ginpakamalaut ni Jesus ang mga lider sang relihion sang ari sia sa duta bangod sang ila paagi sa pagsimba sa Dios. Nagapakitakita sila nga relihioso pero ang matuod “ginapatumbayaan [nila] ang mas importante nga mga sugo sang Kasuguan may kaangtanan sa katarungan, kaluoy, kag katutom.”Mateo 23:23.

Subong, ang relihion lamang nga nabase sa kamatuoran ang ginabaton sang Dios. Ini nga kamatuoran makita sa Biblia. (Juan 4:24; 17:17; 2 Timoteo 3:16, 17) Ang mga relihion nga ang mga doktrina wala sa Biblia nagapahilayo sa mga tawo sa Dios. Madamo nga doktrina nga abi sang mga tawo ara sa Biblia—lakip ang Trinidad, imortal nga kalag, kag wala katapusan nga pagpaantos—ang gin-ilog sa mga sumilimba sang butig nga mga dios. Ang pagsimba nga nagasuporta sini nga mga doktrina “wala sing pulos” bangod ginaislan sini sang mga tradisyon sang relihion ang mga ginapatuman sang Dios.Marcos 7:7, 8.

Ginakangil-aran sang Dios ang pagkasalimpapaw sa relihion. (Tito 1:16) Para mabuligan ang mga tawo nga mangin suod sa Dios, dapat ang relihion mangin bahin sang ila kabuhi kag indi lamang basta mga ritwal kag pormalidad. Halimbawa, ang Biblia nagasiling: “Kon ang bisan sin-o nagahunahuna nga sia relihioso, apang wala nagarenda sang iya dila, ginadaya niya ang iya tagipusuon, kag ang iya pagsimba wala sing pulos. Ang relihion nga matinlo kag wala sing dagta sa pagtamod sang aton Dios kag Amay amo ini: Ang pag-atipan sa mga ilo kag sa mga balo nga babayi sa ila kapipit-an, kag ang paglikaw sa mahigko nga dalanon sining kalibutan.” (Santiago 1:26, 27; footnote) Ang King James Version naggamit sang tinaga nga “putli nga relihion” para sa sining matinlo kag indi salimpapaw nga pagsimba.

Magtuon sing Dugang Pa

MAAYONG BALITA HALIN SA DIOS!

Ano ang Maayong Balita Parte sa Relihion?

Maabot bala ang tion nga ang tanan mahiusa sa pagsimba sa lamang matuod nga Dios?

ANG LALANTAWAN

May Relihion Pa Bala nga Imo Masaligan?

Kon napaslawan ka sa isa ka relihion, mahimo nga nabudlayan ka na magsalig iban pa. Paano makabulig ang pagtuon sa Biblia?