Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

Nagaluntad Bala ang Dios?

Nagaluntad Bala ang Dios?

Ang sabat sang Biblia

Huo, ang Biblia may makapakumbinsi nga mga ebidensia nga nagaluntad ang Dios. Ginapalig-on kita sini nga magtuo sa Dios, indi paagi sa pagpati lang sa ginasiling sang mga relihion kundi paagi sa paggamit sang aton “ikasarang sa pagpangatarungan” kag “paghangop.” (Roma 12:1; 1 Juan 5:20) Binagbinaga ang masunod nga mga pangatarungan base sa Biblia:

  • Ang pagluntad sang organisado nga uniberso nga puno sing kabuhi nagapamatuod nga may Manunuga. Ang Biblia nagasiling: “Sa pagkamatuod, ang tagsa ka balay may nagtukod, apang sia nga nagtukod sang tanan nga butang amo ang Dios.” (Hebreo 3:4) Ini nga pangatarungan simple lang, pero sa madamo nga edukado nga tawo rasonable ini. *

  • Subong mga tawo, may kinaugali kita nga handum nga maintiendihan ang kahulugan kag katuyuan sang kabuhi. Isa ini ka sahi sang handum nga ginapangita naton bisan pa kompleto ang aton pisikal nga mga kinahanglanon. Bahin ini sang ginatawag sang Biblia nga “espirituwal nga kinahanglanon” naton. Nalakip sa sini ang handum nga kilalahon kag simbahon ang Dios. (Mateo 5:3; Bugna 4:11) Ining espirituwal nga kinahanglanon wala lamang nagapamatuod nga nagaluntad ang Dios kundi nagapakita man nga isa sia ka mahigugmaon nga Manunuga nga luyag maghatag sa aton sina nga kinahanglanon.Mateo 4:4.

  • Ang detalyado nga mga tagna sa Biblia ginsulat ginatos ka tuig na ang nagligad antes ini natabo suno gid sa gintagna. Ang pagkasibu kag pagkadetalyado sini nga mga tagna nagapakita gid nga indi tawo ang ginhalinan sini.2 Pedro 1:21.

  • Ang mga manunulat sang Biblia may nahibaluan parte sa siensia nga wala mahangpan sang ila mga kadungan. Halimbawa, ang mga tawo sang una nagapati nga ang duta nagatungtong sa isa ka sapat, pareho sang elepante, talunon nga baboy, ukon toro nga baka. Pero ang Biblia nagasiling nga “ginabitay [sang Dios] ang duta sa ibabaw sang wala.” (Job 26:7) Husto man ang ginlaragway sang Biblia parte sa korte sang duta nga ‘matipulon,’ ukon “globo.” (Isaias 40:22, Douay Version) Para sa madamo ang pinakarasonable nga paathag kon ngaa nahibaluan na ini sang mga manunulat sang Biblia amo nga naghalin ini nga impormasyon sa Dios.

  • Ginasabat sang Biblia ang mabudlay nga mga pamangkot nga kon indi mahatagan sing eksakto nga sabat, mahimo bangdan nga mangin atiesta ang isa ka tawo. Halimbawa: Kon ang Dios mahigugmaon kag tuman ka gamhanan, ngaa may pag-antos kag kalautan sa kalibutan? Ngaa ang relihion amo sa masami ang ginahalinan sang kalainan sa baylo sang kaayuhan?Tito 1:16.

^ par. 4 Halimbawa, ang astronomo anay nga si Allan Sandage, nagsiling parte sa uniberso: “Indi gid ako makapati nga ining kahim-ong naghalin sa magamo nga kahimtangan. May ginhalinan gid ang kahim-ong kag pagkaorganisado. Para sa akon ang Dios isa ka misteryo, apang sia ang sabat sa milagro sang pagluntad, kon ngaa nagluntad ang mga butang.”

Silak sang adlaw nga nagalusot sa mga panganod

Magtuon sing Dugang Pa

Ano Gid ang Ginatudlo sang Biblia?

Ano ang Kamatuoran Parte sa Dios?

Sa banta mo nagaulikid bala ang Dios sa imo? Tun-i ang iya personalidad kag kon paano ka mangin malapit sa iya.

MAGMATA!

Masaligan Mo Bala ang Biblia?

Binagbinaga ang mabakod nga ebidensia kon ngaa masaligan mo ang Biblia.

MAGMATA!

“Kumbinsido Ako nga May Manunuga Gid”

Naugot gid si Frédéric Dumoulin sa relihion amo nga nangin atiesta sia. Paano sia nakumbinsi sang pagtuon sa Biblia kag desinyo sa buhi nga mga butang nga may Manunuga gid?