Magdiretso sa kaundan

Ginatudlo Bala sang Biblia nga Matapan ang Duta?

Ginatudlo Bala sang Biblia nga Matapan ang Duta?

Ang sabat sang Biblia

Wala ginatudlo sang Biblia nga matapan ang duta. * Ang Biblia indi libro parte sa science. Pero wala man ini sing may ginasiling nga nagakontra sa napamatud-an na sang science. Ang ginasiling sang Biblia ‘masaligan pirme, karon kag sa wala sing katubtuban.’—Salmo 111:8.

 Ano ang buot silingon sang Biblia sang nagsiling ini parte “sa apat ka pamusod sang duta”?

Ang ekspresyon nga “sa apat ka pamusod sang duta” indi dapat paghangpon sing literal, nga daw kuadrado ang duta kag may punta. (Isaias 11:12) Kundi, isa ini ka paglaragway nga nagapatuhoy sa bug-os nga duta. Ang Biblia nagagamit man sang apat ka direksion pareho sang makita sa kompas.—Lucas 13:29.

Ang Hebreo nga termino nga gin-translate “pamusod” mahimo naghalin sa ekspresyon nga nabase sa mga tinaga nga “mga pakpak.” Ang International Standard Bible Encyclopedia nagsiling, “bangod ang pakpak sang pispis ginagamit para tabunan ang iya mga boto, [ining Hebreo nga termino] gingamit para ilaragway ang pinakapunta sang bisan ano nga butang.” Ang amo man nga reperensia nagsiling nga sa Job 37:3 kag Isaias 11:12, “ang termino nagakahulugan sing mga baybayon, dulunan, ukon pinakapunta nga bahin sang duta.” *

 Ano ang ginapakita sang pagsulay sang Yawa kay Jesus?

Para masulay si Jesus, “gindala pa gid sia sang Yawa sa mataas katama nga bukid, kag ginpakita sa iya ang tanan nga ginharian sang kalibutan kag ang gahom kag manggad sini.” (Mateo 4:8) Nagasiling ang iban nga ini nga rekord sa Biblia nagatudlo nga may isa ka lokasyon nga makita mo ang tanan kay matapan ang duta. Pero ang “mataas katama nga bukid” daw wala nagapatuhoy sa pisikal nga lokasyon. Binagbinaga kon ngaa may basihan gid ini nga konklusion.

  • Wala sing literal nga bukid sa duta diin makita mo ang tanan nga ginharian sang kalibutan.

  • Ginpakita sang Yawa kay Jesus indi lang ang tanan nga ginharian kundi pati na “ang gahom kag manggad sini.” Ini nga mga detalye indi makita halin sa malayo, gani mahimo naggamit ang Yawa sing palanan-awon para ipakita ini kay Jesus. Daw pareho ini nga naggamit ang isa sang projector para ipakita ang mga piktyur sang sarisari nga lugar sa duta.

  • Ang isa pa ka rekord sa sini nga hitabo nga mabasa sa Lucas 4:5 nagasiling nga ‘ginpakita sang Yawa kay Jesus sing makadali ang tanan nga ginharian sang kalibutan,’ nga imposible nga makita sang literal nga mga mata sang tawo. Ginapakita sini nga mahimo naggamit ang Yawa sang iban nga paagi para ipakita kay Jesus ang pagsulay.

^ par. 3 Suno sa Biblia, ang Dios amo ang “Isa nga nagapuyo sa ibabaw sang matipulon nga duta.” (Isaias 40:22) Ang pila ka reperensia nagasiling nga ang tinaga nga “matipulon” posible nagakahulugan sing bilog, bisan indi tanan nga iskolar nagaugyon sa sini. Pero wala gid ginatudlo sang Biblia nga matapan ang duta.

^ par. 8 Revised Edition, Volume 2, pahina 4.