Magdiretso sa kaundan

Sin-o ang Mapalangit?

Sin-o ang Mapalangit?

Ang sabat sang Biblia

Nagpili ang Dios sing limitado nga kadamuon sang matutom nga mga Cristiano nga pagabanhawon para mabuhi sa langit, pagkatapos sila mapatay. (1 Pedro 1:​3, 4) Kon mapili na sila, dapat padayon nila nga pabakuron ang ila pagtuo kag magpabilin nga matinlo sa ila paggawi para indi nila madula ang ila paglaum nga kabuhi sa langit.​—Efeso 5:5; Filipos 3:​12-​14.

Ano ang himuon nila sa langit?

Magaalagad sila upod kay Jesus bilang mga hari kag saserdote sa sulod sang 1,000 ka tuig. (Bugna 5:​9, 10; 20:6) Sila ang mangin “bag-o nga langit,” ukon gobierno sa langit nga magagahom sa “bag-o nga duta,” ukon sa mga tawo sa duta. Ini nga mga manuggahom sa langit magabulig para ibalik ang katawhan sa matarong nga kahimtangan nga amo gid ang orihinal nga katuyuan sang Dios.​—Isaias 65:17; 2 Pedro 3:​13.

Pila tanan ang banhawon para magkabuhi sa langit?

Suno sa Biblia, 144,000 ka tawo ang banhawon para magkabuhi sa langit. (Bugna 7:4) Sa palanan-awon sa Bugna 14:​1-3, nakita ni apostol Juan “ang Kordero nga nagatindog sa Bukid Sion, kag kaupod niya ang 144,000.” Sa sini nga palanan-awon “ang Kordero” amo ang ginbanhaw nga si Jesus. (Juan 1:​29; 1 Pedro 1:​19) Ang “Bukid Sion” nagarepresentar sa ginpakataas nga posisyon ni Jesus kag sa 144,000 nga magagahom upod sa iya sa langit.​—Salmo 2:6; Hebreo 12:22.

Ang mga “gintawag kag pinili” nga magagahom upod sa Cristo sa Ginharian ginatawag nga “diutay nga panong.” (Bugna 17:14; Lucas 12:32) Ginapakita sini nga diutay sila kon ikumparar sa kadamuon sang karnero ni Jesus.​—Juan 10:16.

Sayop nga mga pagpati parte sa mga mapalangit

Sayop nga pagpati: Ang tanan nga maayo nga tawo mapalangit.

Ang matuod: Ang Dios nagpromisa sing kabuhi nga wala katapusan sa duta sa kalabanan nga maayo nga tawo.​—Salmo 37:11, 29, 34.

  • Si Jesus nagsiling: “Wala pa sing tawo nga nakakayab sa langit.” (Juan 3:​13) Ginapakita sini nga ang maayo nga mga tawo nga napatay antes kay Jesus, pareho nanday Abraham, Moises, Job, kag David, wala magpalangit. (Binuhatan 2:​29, 34) Kundi, may paglaum sila nga banhawon diri sa duta.​—Job 14:13-​15.

  • Ang pagbanhaw sa mga tawo nga mabuhi sa langit gintawag nga “nahauna nga pagkabanhaw.” (Bugna 20:6) Ginapakita sini nga may isa pa ka pagkabanhaw. Ini nga pagkabanhaw matabo diri sa duta.

  • Ginatudlo sang Biblia nga sa paggahom sang Ginharian sang Dios, “wala na sing kamatayon.” (Bugna 21:​3, 4) Ini nga promisa himuon diri sa duta kay wala man sing kamatayon sa langit.

Sayop nga pagpati: Ang kada tawo makapili kon bala ang iya padya kabuhi sa langit ukon sa duta.

Ang matuod: Ang Dios ang magapili kon sin-o sa matutom nga mga Cristiano ang hatagan sing ‘padya nga langitnon nga pagtawag,’ ukon sing paglaum nga mabuhi sa langit. (Filipos 3:​14) Wala ini nagadepende sa handum ukon gusto sang isa ka tawo.​—Mateo 20:20-​23.

Sayop nga pagpati: Ang paglaum nga mabuhi sing wala katapusan sa duta manubo kag ginahatag lang ini sa mga indi bagay magpalangit.

Ang matuod: Ginatawag sang Dios nga “akon katawhan,” “akon mga pinili,” kag “ginpakamaayo ni Jehova” ang mga tawo nga makabaton sang kabuhi nga wala katapusan sa duta. (Isaias 65:21-​23) Tumanon nila ang orihinal nga katuyuan sang Dios sa katawhan. Ihatag sa ila ang perpekto nga kabuhi kag magaistar sila sa paraiso sa duta asta san-o.​—Genesis 1:​28; Salmo 115:16; Isaias 45:18.

Sayop nga pagpati: Ang numero nga 144,000 nga ginsambit sa Bugna simbuliko, indi literal.

Ang matuod: Bisan pa may simbuliko nga mga numero sa Bugna, ang iban sini literal. Halimbawa, mabasa diri ang “12 ka ngalan sang 12 ka apostoles sang Kordero.” (Bugna 21:14) Ari ang isa ka ebidensia nga nagapamatuod nga literal ang numero nga 144,000.

Mabasa sa Bugna 7:4 “ang kadamuon sang mga ginmarkahan [ukon, ginpili nga mabuhi sa langit], 144,000.” Sa masunod nga mga bersikulo, ginkumparar ini sa ikaduha nga grupo: “ang daku nga kadam-an, nga wala sing tawo nga makaisip.” Ining “daku nga kadam-an” luwason man sang Dios. (Bugna 7:​9, 10) Kon ang numero nga 144,000 indi literal, kundi isa man ka grupo nga wala nabal-an kon ano kadamo, indi makumparar ang duha ka grupo. *

Isa pa, ang 144,000 ginsiling nga “ginbakal . . . halin sa katawhan subong una nga mga bunga.” (Bugna 14:4) Ang ekspresyon nga “una nga mga bunga” nagapatuhoy sa pila lang ka pinili. Insakto gid ini nga diskripsion sang mga mapalangit upod sa Cristo nga magagahom sa indi maisip nga mga sakop diri sa duta.​—Bugna 5:​10.

^ par. 21 Si Propesor Robert L. Thomas nagsulat man parte sa numero nga 144,000 sa Bugna 7:4: “Isa ini ka literal ukon maisip nga numero nga nagapakita sang kinalain sa indi maisip nga numero sa 7:9. Kon simbuliko lang ini, ang tanan nga numero sa libro simbuliko.”​—Revelation 1-7: An Exegetical Commentary, pahina 474.