Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ginatudlo Bala sang Biblia nga ‘Kis-a Maluwas, Pirme Na Luwas’?

Ginatudlo Bala sang Biblia nga ‘Kis-a Maluwas, Pirme Na Luwas’?

Ang sabat sang Biblia

Wala. Ang Biblia wala nagatudlo sang doktrina nga ‘kis-a maluwas, pirme na luwas.’ Ang isa ka tawo naluwas sang nagtuo sia kay Jesucristo, pero puede madula ang iya pagtuo kag ang kaluwasan nga ginadala sini. Ang Biblia nagasiling nga para indi madula ang pagtuo, kinahanglan nga “makig-away sing lakas.” (Judas 3, 5) Ang mga Cristiano sadto nga nagbaton na sa Cristo ginsilingan: “Padayon ninyo nga panikasugi ang inyo kaugalingon nga kaluwasan nga may kahadlok kag pagkurog.”Filipos 2:12.

Mga bersikulo sa Biblia nga nagapamatuod nga sayop ang panudlo nga ‘kis-a maluwas, pirme na luwas’

  • Ang Biblia nagapaandam batok sa mabug-at nga mga sala nga rason kon ngaa ang isa indi makasulod sa Ginharian sang Dios. (1 Corinto 6:9-11; Galacia 5:19-21) Wala sing pulos ini nga paandam kon indi gali madula ang kaluwasan. Pero, ginapakita sang Biblia nga ang isa nga naluwas mahimo magbiya kon maghimo sia liwat sing mabug-at nga sala. Halimbawa, ang Hebreo 10:26 nagsiling: “Kon hungod kita nga maghimo sang sala sa tapos mabaton ang sibu nga ihibalo tuhoy sa kamatuoran, wala na sing nabilin nga halad para sa aton mga sala.”Hebreo 6:4-6; 2 Pedro 2:20-22.

  • Ginpadaku ni Jesus kon daw ano ka importante ang pagtinguha nga mapadayon ang pagtuo paagi sa isa ka ilustrasyon diin ginkomparar niya ang iya kaugalingon sa puno sang ubas kag ang iya mga sumulunod sa mga sanga sina nga ubas. Ang iban sa ila kis-a nga nagpakita sing pagtuo sa iya paagi sa ila mga bunga, ukon binuhatan, pero napaslawan sa pagpakita sini sang ulihi kag gani “kaangay sang sanga [nga wala nagapamunga] ginpilak,” sa amo nadula nila ang ila kaluwasan. (Juan 15:1-6) Pareho man sini nga ilustrasyon ang gingamit ni apostol Pablo sang magsiling sia nga ang mga Cristiano nga wala nag-amlig sang ila pagtuo “utdon.”Roma 11:17-22.

  • Ginsugo ang mga Cristiano nga ‘padayon nga magbantay.’ (Mateo 24:42; 25:13) Ang iban nga natulugan sa espirituwal, ayhan paagi sa paghimo sang mga “buhat sang kadudulman” ukon paagi sa indi bug-os nga pagtuman sa buluhaton nga ginpahimo ni Jesus, indi maluwas.Roma 13:11-13; Bugna 3:1-3.

  • Madamo nga bersikulo ang nagapakita nga ang mga naluwas dapat magbatas asta sa katapusan. (Mateo 24:13; Hebreo 10:36; 12:2, 3; Bugna 2:10) Ang mga Cristiano sang unang siglo nagkalipay gid sang nabalitaan nila ang pagbatas sang pareho nila nga mga tumuluo. (1 Tesalonica 1:2, 3; 3 Juan 3, 4) Kon maluwas man lang gali bisan ang mga wala nagabatas, ngaa ginapadaku pa sa Biblia nga importante ang pagbatas?

  • Nakasiling lamang si apostol Pablo nga sigurado na ang iya kaluwasan sang malapit na lang sia mapatay. (2 Timoteo 4:6-8) Pero antes sini, kabalo sia nga mahimo niya madula ang kaluwasan kon pasugtan niya ang mga handum sang unod. Nagsulat sia: “Ginasakit ko ang akon lawas kag ginahimo ini nga ulipon, agod sa tapos ako makabantala sa iban, ako mismo indi pagsikwayon.”1 Corinto 9:27; Filipos 3:12-14.

Magtuon sing Dugang Pa

Kon Ngaa Kinahanglan nga Luwason Kita

Makatarunganon bala nga gintuga kita sang mahigugmaon nga Dios nga may handum nga mabuhi sing wala katapusan pero imposible man nga mabaton ini?

Patawaron Bala Ako sang Dios?

Binagbinaga ang ginasiling sang Biblia parte sa kon paano mapatawad sang Dios.

Nagapati Bala ang mga Saksi ni Jehova nga Sila Lang ang Maluwas?

Ginapaathag sang Biblia kon sin-o ang mahimo maluwas.