Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Tanda sang “Katapusan nga mga Adlaw,” Ukon sang “Katapusan nga Panahon”?

Ano ang Tanda sang “Katapusan nga mga Adlaw,” Ukon sang “Katapusan nga Panahon”?

Ang sabat sang Biblia

Ginasugid sang Biblia ang mga hitabo kag mga sitwasyon nga magatanda sang panahon nga nagapadulong sa “hingapusan sang [subong nga] sistema sang mga butang,” ukon “katapusan sang kalibutan.” (Mateo 24:3; Ang Pulong sang Dios) Ini nga panahon ginatawag sang Biblia nga “katapusan nga mga adlaw” kag “katapusan nga panahon.” (2 Timoteo 3:1; Daniel 8:19; Maayong Balita nga Biblia) Ang masunod amo ang pila sa talalupangdon nga mga tagna parte sa katapusan nga mga adlaw, ukon sa katapusan nga panahon:

  • Lapnag nga inaway.Mateo 24:7; Bugna 6:4.

  • Kakulang sing pagkaon.Mateo 24:7; Bugna 6:5, 6.

  • Mabaskog nga mga linog.Lucas 21:11.

  • Mga balatian, ukon epidemia sang “grabe nga mga balatian.”Lucas 21:11, Contemporary English Version.

  • Pagdamo sang krimen.Mateo 24:12.

  • Pagguba sang tawo sa duta.Bugna 11:18.

  • Paglain sang batasan sang tawo, kay madamo ang “indi mapinasalamaton, indi mainunungon, . . . indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog.”2 Timoteo 3:1-4.

  • Pagkaguba sang pamilya, kay ang mga tawo “indi mapinalanggaon” kag ang mga bata “indi matinumanon sa mga ginikanan.”2 Timoteo 3:2, 3.

  • Pagbugnaw sang gugma sang kalabanan nga tawo sa Dios.Mateo 24:12.

  • Pagdamo sang mga tawo nga daw diosnon kon tulukon.2 Timoteo 3:5.

  • Dugang nga pag-athag sang paghangop sa mga tagna sang Biblia, pati ang mga tagna parte sa katapusan nga mga adlaw.Daniel 12:4.

  • Pagbantala sang maayong balita sang Ginharian sa bilog nga kalibutan.Mateo 24:14.

  • Madamo ang wala nagasapak kag nagayubit sa mga ebidensia nga malapit na ang katapusan.Mateo 24:37-39; 2 Pedro 3:3, 4.

  • Indi lang pila ukon kalabanan kundi ang tanan gid nga tagna dungan nga nagakatuman.Mateo 24:33.

Nagakabuhi bala kita “sa katapusan nga mga adlaw”?

Huo. Ang mga nagakatabo sa kalibutan kag ang pasunod nga mga hitabo sa Biblia nagapakita nga ang katapusan nga mga adlaw nagsugod sang 1914. Sina nga tion, ang Ginharian sang Dios nagsugod sa paggahom sa langit, kag ang una sini nga ginhimo amo ang pagtagbong kay Satanas nga Yawa kag sa iya mga demonyo diri sa duta kag indi na sila makabalik sa ila ginhalinan. (Bugna 12:7-12) Ang impluwensia ni Satanas sa mga tawo makita sa paglain sang mga batasan kag mga buhat nga nangin rason kon ngaa ang katapusan nga mga adlaw “makahalanguyos nga mga tion nga mabudlay atubangon.”2 Timoteo 3:1.

Magtuon sing Dugang Pa

Nagakabuhi Bala Kita sa “Katapusan nga mga Adlaw”?

Binagbinaga kon paano ang ginahimo kag batasan sang mga tawo sa palibot naton nangin ebidensia nga nagakabuhi kita subong sa “katapusan nga mga adlaw” nga gintagna sang Biblia.

Ang Katapusan sang Kalibutan—Kahadlok, Kalangkag, kag Kapaslawan

Mahimo makibot ka sa ginasiling sang Biblia parte sa katapusan sang kalibutan.

Ano ang Inaway sa Armageddon?

Ang tinaga nga Armageddon makaisa lang mabasa sa Biblia, pero ang inaway nga ginapatuhuyan sini ginabinagbinag sa bug-os nga Kasulatan.