Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

Ano ang Indi Mapatawad nga Sala?

Ano ang Indi Mapatawad nga Sala?

Ang sabat sang Biblia

Ang indi mapatawad nga sala nagapatuhoy sa mga buhat kag panimuot diin indi na mabaton sang nakasala ang kapatawaran sang Dios. Paano magtubo ini nga panimuot?

Ginapatawad sang Dios ang nagahinulsol sa ila mga sala, nagasunod sa iya mga talaksan sa pagkabuhi, kag nagatuo kay Jesucristo. (Binuhatan 3:19, 20) Pero, mahimo ang isa padayon na nga nagahimo sang sala kag wala na nagabag-o sang iya panimuot ukon paggawi. Suno sa Biblia, ini nga tawo may “malaut nga tagipusuon” nga nangin “magtig-a bangod sa madaya nga gahom sang sala.” (Hebreo 3:12, 13) Pareho sang daga nga ginluto sa pugon kag indi na maporma liwat, ang tagipusuon sina nga tawo permanente na nga nagapamatok sa Dios. (Isaias 45:9) Wala na sing rason nga patawaron ina nga tawo, gani ang iya sala indi na mapatawad, ukon mapasaylo.Hebreo 10:26, 27.

Sang panahon ni Jesus, ang pila ka lider sang relihion sang mga Judiyo nakahimo sing indi mapatawad nga sala. Nahibaluan nila nga ang balaan nga espiritu sang Dios amo ang nagabulig kay Jesus sa paghimo sing mga milagro, pero ginasiling nila nga ang gahom ni Jesus naghalin kay Satanas nga Yawa.Marcos 3:22, 28-30.

Mga halimbawa sang mapatawad nga mga sala

  • Pagpasipala bangod wala makahibalo sang kamatuoran. Si apostol Pablo nakasala man sing pagpasipala sadto, pero nagsiling sia sang ulihi: “Ginpakitaan ako sing kaluoy bangod nagpanghikot ako nga wala sing nahibaluan kag wala sing pagtuo.”1 Timoteo 1:13.

  • Pagpanghilahi. Ang Biblia nagsambit sang pila nga nagpanghilahi pero ginbag-o nila ang ila paggawi kag ginpatawad sila sang Dios.1 Corinto 6:9-11.

“Nakahimo bala ako sing indi mapatawad nga sala?”

Kon sinsero mo nga ginakaugtan ang imo nahimo nga sala sang una kag gusto mo gid magbag-o, ginapakita sini nga wala ka nakahimo sing indi mapatawad nga sala. Mapatawad sang Dios ang amo gihapon nga sala basta indi mo pagpatig-ahon sing permanente ang imo tagipusuon batok sa iya.Hulubaton 24:16.

Ang pila nagabatyag nga indi na mapatawad ang ila sala kay ginakonsiensia gid sila. Pero, ang Biblia nagasiling nga indi naton masaligan ang aton balatyagon. (Jeremias 17:9) Wala kita ginhatagan sang Dios sing kinamatarong nga hukman ang bisan sin-o—lakip na ang aton kaugalingon. (Roma 14:4, 12) Mapatawad niya kita bisan pa ginapakamalaut kita gihapon sang aton tagipusuon.1 Juan 3:19, 20.

Nakahimo bala si Judas Iscariote sing indi mapatawad nga sala?

Huo. Bangod sa iya kakagod, ginkawat niya ang kuarta nga gindonar para sa sagrado nga hilikuton. Nagpakunokuno pa gani sia nga nagaulikid sa mga pigado pero tuyo gid niya nga kawaton ang madamo pa nga kuarta. (Juan 12:4-8) Sang ang iya tagipusuon permanente na nga nabuyo sa paghimo sing sala, ginluiban niya si Jesus kabaylo sang 30 ka bilog nga pilak. Nahibaluan ni Jesus nga indi na gid maghinulsol si Judas sa iya ginhimo, kag gintawag niya sia nga “anak sang kalaglagan.” (Juan 17:12) Buot silingon, sang napatay si Judas nangin dayon ang iya kalaglagan, nga wala na sing paglaum nga mabanhaw.Marcos 14:21.

Si Judas wala nagpakita sing matuod nga paghinulsol. Nagtu-ad sia sang iya sala, indi sa Dios, kundi sa mga lider sang relihion nga naghimbon upod sa iya.Mateo 27:3-5; 2 Corinto 7:10.

Magtuon sing Dugang Pa

SABAT SA MGA PAMANGKOT SA BIBLIA

Buligan Bala Ako sang Dios Kon Magpangamuyo Ako?

Nagaulikid gid bala ang Dios sa aton mga problema?