Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Inaway sa Armageddon?

Ano ang Inaway sa Armageddon?

Ang sabat sang Biblia

Ang inaway sa Armageddon nagapatuhoy sa katapusan nga inaway sa tunga sang mga gobierno sang tawo kag sang Dios. Ini nga mga gobierno kag ang mga nagasuporta sa ila nagapamatok sa Dios bisan subong pa lang bangod wala sila nagapasakop sa iya paggahom. (Salmo 2:2) Ang inaway sa Armageddon amo ang magatapos sang tanan nga gobierno sang tawo.Daniel 2:44.

Ang tinaga nga “Armageddon” makaisa lang mabasa sa Biblia, sa Bugna 16:16. Ginapakita sang tagna sa Bugna nga “sa duog nga ginatawag sa Hebreo Har–Magedon,” ang “mga hari sang bug-os napuy-an nga duta” pagatipunon sa “inaway sang daku nga adlaw sang Dios nga Labing Gamhanan.”Bugna 16:14.

Sin-o ang magaaway sa Armageddon? Pangunahan ni Jesucristo ang iya mga hangaway sa langit sa ila pagpangdaug sa mga kaaway sang Dios. (Bugna 19:11-16, 19-21) Nalakip sa sini nga mga kaaway ang mga nagapamatok sa awtoridad sang Dios kag nagapasipala sa iya.Ezequiel 39:7.

Literal bala nga matabo sa Middle East ang inaway sa Armageddon? Indi. Sa baylo nga sa isa lang ka lugar, ang inaway sa Armageddon matabo sa bilog nga kalibutan.Jeremias 25:32-34; Ezequiel 39:17-20.

Ang Armageddon, nga kon kaisa gina-translate nga “Har–Magedon” (sa Hebreo Har Meghiddohnʹ), nagakahulugan sing “Bukid sang Megiddo.” Ang Megiddo isa anay ka siudad sa teritoryo sang Israel. Suno sa kasaysayan madamo nga inaway ang natabo sa sini nga lugar, pati ang pila ka inaway nga narekord sa Biblia. (Hukom 5:19, 20; 2 Hari 9:27; 23:29) Pero, ang Armageddon wala nagapatuhoy sa literal nga lugar malapit sa Megiddo. Wala sing daku nga bukid sa sini nga lugar, kag bisan sa Nalupyakan sang Jezreel sa tupad sini indi makaigo ang tanan nga magapakig-away sa Dios. Kundi, ang Armageddon amo ang bug-os kalibutan nga hitabo diin ang mga pungsod magatipon sa ila katapusan nga pagpakig-away batok sa paggahom sang Dios.

Ano ang mangin kahimtangan kon matabo na ang inaway sa Armageddon? Wala kita makahibalo kon paano gamiton sang Dios ang iya gahom, pero gamiton niya ang mga elemento nga gingamit man niya sang una—yelo, linog, mabunok nga ulan, kalayo kag asupre, kilat, kag balatian. (Job 38:22, 23; Ezequiel 38:19, 22; Habacuc 3:10, 11; Zacarias 14:12) Bangod magasalasala sila, ang iban nga kaaway sang Dios amo mismo ang magapinatyanay, kag marealisar nila nga ang Dios ang nagapakig-away batok sa ila.Ezequiel 38:21, 23; Zacarias 14:13.

Ang Armageddon bala ang katapusan sang kalibutan? Indi ini ang katapusan sang aton planeta, kay ang duta amo ang puluy-an sang tawo asta san-o. (Salmo 37:29; 96:10; Manugwali 1:4) Ang Armageddon magaluwas sang katawhan sa baylo nga magapapas sini, bangod may “isa ka dakung kadam-an” sang mga alagad sang Dios nga makalampuwas.Bugna 7:9, 14; Salmo 37:34.

Sa Biblia, indi lang duta ang ginapatuhuyan sang tinaga nga “kalibutan.” Kon kaisa, nagapatuhoy man ini sa malaut nga katawhan nga nagapamatok sa Dios. (1 Juan 2:15-17) Sa sini nga kahulugan, ang Armageddon mangin amo ang “katapusan sang kalibutan.”Mateo 24:3, Ang Pulong sang Dios.

San-o matabo ang Armageddon? Sang ginsambit niya ang “dakung kapipit-an” nga matapos sa inaway sa Armageddon, si Jesus nagsiling: “Tuhoy sa amo nga adlaw kag oras wala sing nakahibalo, bisan pa ang mga anghel sa langit ukon ang Anak, kundi ang Amay lamang.” (Mateo 24:21, 36) Pero, ginapakita sang Biblia nga ang Armageddon matabo sa panahon sang indi makita nga presensia ni Jesus, nga nagsugod sang 1914.Mateo 24:37-39.

Magtuon sing Dugang Pa

Adlaw sang Paghukom—Ano Ini?

Tun-i kon paano ang Adlaw sang Paghukom mangin pagpakamaayo sa tanan nga matutom nga tawo.

Nagakabuhi Bala Kita sa “Katapusan nga mga Adlaw”?

Binagbinaga kon paano ang ginahimo kag batasan sang mga tawo sa palibot naton nangin ebidensia nga nagakabuhi kita subong sa “katapusan nga mga adlaw” nga gintagna sang Biblia.