Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Ginasiling sang Biblia Parte sa Halloween?

Ano ang Ginasiling sang Biblia Parte sa Halloween?

Ang sabat sang Biblia

Wala ginsambit sa Biblia ang Halloween. Pero ang ginhalinan sang Halloween kag ang paagi sa pagsaulog sini subong nagapakita nga nabase ini sa butig nga mga pagpati parte sa patay kag indi makita nga mga espiritu, ukon mga demonyo.—Tan-awa ang “Ginhalinan sang Halloween kag ang pagselebrar sini.”

Ang Biblia nagapaandam: “Dapat wala gikan sa imo sang . . . nagapamangkot sa mga espiritu ukon manugpakot ukon bisan sin-o nga nagapamangkot sa mga patay.” (Deuteronomio 18:10-12, Biblia sang Katilingban sang mga Kristiano) Ginakabig sang iban ang Halloween nga sadya-sadya lang, pero ang Biblia nagasiling nga indi ini basta kinasadya lamang. Sa 1 Corinto 10:20, 21, ang Biblia nagasiling: “Indi ko luyag nga mangin mga umalambit kamo upod sa mga demonyo. Indi kamo makainom sa kopa ni Jehova kag sa kopa sang mga demonyo.”

Ang ginhalinan sang Halloween kag ang pagselebrar sini

  1. Samhain: Ang Halloween naghalin sa “dumaan nga pagano nga kapiestahan nga ginselebrar sang mga Celt, sobra 2,000 ka tuig na ang nagligad,” siling sang The World Book Encyclopedia. “Ang mga Celt nagapati nga ang mga patay nagapakig-upod sa mga buhi sa sini nga tion. Sa tion sang Samhain, ang mga buhi mahimo magduaw kaupod sang mga patay.” Pero maathag nga ginatudlo sang Biblia nga ang patay “wala makahibalo sang bisan ano.” (Manugwali 9:5) Gani, indi sila makapakig-upod sa mga buhi.

  2. Mga kostyum, dulse, kag trick or treat: Suno sa libro nga Halloween—An American Holiday, An American History, ang pila ka Celt nagasuksok sing makahaladlok nga kostyum agod masal-an sila sang nagalagawlagaw nga mga espiritu nga mga espiritu man kag pabay-an na lang sila. Ang iban nagahalad man sa mga espiritu sing mga matam-is para indi sila pagtandugon. Sa Europa sang una, ginbaton sang mga klero sang Katoliko ang pagano nga mga kustombre kag ginsilingan ang ila mga sakop nga magkostyum kag magpamalaybalay kag mangayo sing gagmay nga mga regalo. Pero ginadumilian sang Biblia nga samuon ang pagpati sang butig nga relihion sa pagsimba sa Dios.2 Corinto 6:17.

  3. Murto, bampira, werewolf, manughiwit, kag zombie: Madugay na ini nga ginaangot sa kalibutan sang malaut nga mga espiritu. (Halloween Trivia) Maathag nga ginasiling sang Biblia nga dapat naton pamatukan ang puersa sang malaut nga mga espiritu, sa baylo nga magselebrar upod sa ila.Efeso 6:12.

  4. Mga kalabasa, ukon jack-o’-lantern: Sa Britanya sang una, “ang mga manugpangamuyo nagakadto sa mga balay kag nagapangayo sing pagkaon kabaylo sang pangamuyo para sa patay,” kag nagadala sila sing “ginbuhuan nga singkamas nga may kandila sa sulod, nga nagasimbulo sang kalag nga indi na makagua sa purgatoryo.” (Halloween—From Pagan Ritual to Party Night) Ang iban nagasiling nga ini nga mga lantern ginagamit para tabugon ang malaut nga mga espiritu. Sang katuigan 1800 sa North America, kalabasa na ang gingamit sa baylo nga singkamas kay mas madamo ini didto kag mas mahapos buhuan kag kortehan. Ang mga pagpati sa sini nga kustombre—imortal nga kalag, purgatoryo, kag mga pangamuyo para sa patay—wala nabase sa Biblia.Ezequiel 18:4.

 

Magtuon sing Dugang Pa

Ano Gid ang Halloween?

Hibalua ang malaut nga mga ginhalinan sang Halloween kag ang pareho sini nga mga selebrasyon.

Dapat Bala Kita Mag-entra sa mga Selebrasyon sang Kalibutan?

Diin naghalin ang madamo nga selebrasyon nga popular sa inyo lugar? Mahimo makibot ka sa mga sabat.