Magdiretso sa kaundan

Gin-islan Bala Ukon Ginbag-o ang Biblia?

Gin-islan Bala Ukon Ginbag-o ang Biblia?

Wala. Sang ginkumparar ang dumaan nga mga manuskrito nakita nga halos wala sing ginbag-o sa Biblia bisan pa sulitsulit ini nga ginkopya sa nagakadunot nga sululatan sa sulod sang linibo ka tuig.

Buot bala silingon nga wala gid sing sala sa pagkopya?

Linibo ka dumaan nga manuskrito sang Biblia ang nakita. Ang iban sini may pila ka kinatuhayan, nga nagapakita nga may mga sala man sa pagkopya. Kalabanan sini gamay man lang kag wala ini nagpabag-o sa kahulugan sang teksto. Pero, may pila ka kinatuhayan nga nadiskobrehan nga hungod nga ginhimo sadto para islan ang mensahe sang Biblia. Ari ang duha ka halimbawa:

  1. Sa 1 Juan 5:7, mabasa sa iban nga daan nga translation sang Biblia ang mga tinaga: “sa langit, ang Amay, ang Pulong, kag ang Espiritu Santo: kag ining tatlo isa.” Pero ginapakita sang masaligan nga mga manuskrito nga ini nga mga tinaga indi mabasa sa orihinal nga teksto. Gindugang lang ini sang ulihi. * Gani wala ini ginlakip sa masaligan nga moderno nga mga translation sang Biblia.

  2. Ang personal nga ngalan sang Dios mabasa linibo ka beses sa dumaan nga mga manuskrito sang Biblia. Pero gin-islan ini sang madamo nga translator sang Biblia sang mga titulo pareho sang “Ginuo” ukon “Dios.”

Ngaa makasiguro kita nga halos wala na sing sala nga makita sa ulihi?

Madamo sing manuskrito nga nadiskobrehan ang nakabulig para mahapos makita ang mga sala. * Sang ginkumparar ini nga mga dokumento, ano ang nadiskobrehan parte sa pagkasibu sang Biblia subong?

  • Parte sa teksto sang Hebreong Kasulatan (kinaandan nga ginatawag nga “Daan nga Katipan”), ang iskolar nga si William H. Green nagsiling: “Masiling gid nga wala na sing iban pa nga dumaan nga sinulatan ang napaliton sing eksakto gid.”

  • Parte sa Cristianong Griegong Kasulatan, ukon “Bag-ong Katipan,” ang iskolar sang Biblia nga si F. F. Bruce nagsiling: “Mas madamo sing masaligan nga ebidensia ang aton Bag-o nga Testamento kon ipaanggid sa madamo nga sinulatan sang Griego nga mga awtor nga wala gani ginduhaduhaan sang kalabanan.”

  • Si Sir Frederic Kenyon, isa ka kilala nga eksperto sa mga manuskrito sang Biblia nagsiling nga ang isa “makauyat sang Biblia kag makasiling sia nga may kompiansa nga amo ini ang matuod nga Pulong sang Dios, nga ginpapanubli sa mga kaliwatan sa sulod sang ginatos ka tuig kag halos wala gid sing nagbag-o sa sini.”

Ano pa ang iban nga rason nga makasiling kita nga ang aton Biblia subong sibu?

  • Ginkopya sang Judiyo kag Cristiano nga mga manugkopya ang rekord parte sa mabug-at nga mga sala sang katawhan sang Dios. * (Numeros 20:12; 2 Samuel 11:​2-4; Galacia 2:​11-​14) Ginkopya man nila ang mga tinaga nga nagapakamalaut sa Judiyo nga pungsod bangod sang ila pagsupak kag nagabuyagyag sa mga doktrina nga ginhimuhimo sang mga tawo. (Oseas 4:2; Malaquias 2:​8, 9; Mateo 23:​8, 9; 1 Juan 5:​21) Paagi sa sibu nga pagkopya sang mga kasaysayan, ginpakita sini nga mga manugkopya nga masaligan sila kag ginatahod gid nila ang sagrado nga Pulong sang Dios.

  • Gingiyahan sang Dios ang pagsulat sang Biblia, gani indi bala makasalig kita nga gintuytuyan man niya ini para magpabilin nga sibu? * (Isaias 40:8; 1 Pedro 1:​24, 25) Kay man, indi lang ang mga tawo sadto ang gusto sang Dios nga makabenepisyo kundi kita man subong. (1 Corinto 10:11) Ang matuod, “ang tanan nga butang nga ginsulat sadto ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.”​—Roma 15:4.

  • Sang nagkutlo si Jesus kag ang iya mga sumulunod sa Hebreong Kasulatan, wala sila nagaduhaduha nga basi indi sibu ining dumaan nga mga teksto.​—Lucas 4:​16-​21; Binuhatan 17:​1-3.

^ par. 5 Ini nga mga tinaga indi mabasa sa Codex Sinaiticus, Codex Alexandrinus, Vatican Manuscript 1209, orihinal nga Latin Vulgate, Philoxenian-Harclean Syriac Version, ukon Syriac Peshitta.

^ par. 8 Halimbawa, sobra 5,000 ka Griego nga manuskrito sang ginatawag nga Bag-ong Katipan, ukon sang Cristianong Griegong Kasulatan, ang nadiskobrehan.

^ par. 13 Ang Biblia wala nagasiling nga ang mga tawo nga mensahero sang Dios indi gid makasala. Kundi nagasiling ini: “Wala sing tawo nga indi makasala.”​—1 Hari 8:​46.

^ par. 14 Ang Biblia nagsiling nga bisan pa wala gindikta sang Dios sing tinaga por tinaga ang tanan nga kaundan sini, gingiyahan niya ang panghunahuna sang mga tawo nga nagsulat.​—2 Timoteo 3:​16, 17; 2 Pedro 1:​21.