Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Ginapatuhuyan sang Mabangis nga Sapat nga Eskarlata ang Kolor sa Bugna Kapitulo 17?

Ano ang Ginapatuhuyan sang Mabangis nga Sapat nga Eskarlata ang Kolor sa Bugna Kapitulo 17?

Ang sabat sang Biblia

Ang mabangis nga sapat nga eskarlata ang kolor, nga ginlaragway sa Bugna kapitulo 17, nagasimbulo sa organisasyon nga ang katuyuan amo ang paghiusa kag pagrepresentar sa mga pungsod sang kalibutan. Una ini nga gintukod bilang Liga de Nasyones, kag sa karon amo ini ang Nasyones Unidas.

Kon paano makilala ang mabangis nga sapat nga eskarlata ang kolor

  1. Pulitikal ini nga organisasyon. Ang mabangis nga sapat nga eskarlata ang kolor may “pito ka ulo” nga ginasiling nga nagarepresentar sa “pito ka bukid” kag “pito ka hari,” ukon mga kagamhanan. (Bugna 17:9, 10) Ang mga bukid kag mga mabangis nga sapat ginagamit sa Biblia bilang simbulo sang mga gobierno.Jeremias 51:24, 25; Daniel 2:44, 45; 7:17, 23.

  2. Kaanggid ini sang bilog kalibutan nga pulitikal nga sistema. Ang mabangis nga sapat nga eskarlata ang kolor kaanggid sa mabangis nga sapat nga may pito ka ulo sa Bugna kapitulo 13, nga nagarepresentar sa bilog kalibutan nga pulitikal nga sistema. Ining duha ka mabangis nga sapat pareho nga may pito ka ulo, napulo ka sungay, kag may mga ngalan nga nagapasipala sa Dios. (Bugna 13:1; 17:3) Ining pagkaanggid talalupangdon gid gani indi ini natabuan lang. Ang mabangis nga sapat nga eskarlata ang kolor amo ang larawan, ukon kaanggid, sang bilog kalibutan nga pulitikal nga sistema.Bugna 13:15.

  3. Ang gahom sini halin sa iban nga mga paggahom. Ang mabangis nga sapat nga eskarlata ang kolor “naghalin,” ukon utang sini ang iya pagluntad, sa iban nga mga pagginahom.Bugna 17:11, 17.

  4. Naangot ini sa relihion. Ang Babilonia nga Daku, ang tanan nga butig nga relihion sa bilog nga kalibutan, nagasakay sa mabangis nga sapat nga eskarlata ang kolor. Ginapakita sini nga ang mabangis nga sapat ginaimpluwensiahan sang mga grupo sang relihion.Bugna 17:3-5.

  5. Nagapakahuya ini sa Dios. Ang mabangis nga sapat “puno sang mga ngalan nga nagapasipala.”Bugna 17:3.

  6. Temporaryo ini nga nangin indi aktibo. Ang mabangis nga sapat nga eskarlata ang kolor ara sa “kadadalman,” * ukon mangin indi aktibo, sa pila ka tion kag magabangon ini liwat.Bugna 17:8.

Natuman ang tagna sa Biblia

Binagbinaga kon paano ang Nasyones Unidas kag ang ginbuslan sini, nga Liga de Nasyones, nagtuman sa tagna sang Biblia parte sa mabangis nga sapat nga eskarlata ang kolor.

  1. Pulitikal ini nga organisasyon. Ginasuportahan sang Nasyones Unidas ang pulitikal nga sistema paagi sa pagsakdag sa “pag-alalangay sang soberanya sang tanan niya nga Miembro.” *

  2. Kaanggid ini sang bilog kalibutan nga pulitikal nga sistema. Sang 2011, gindugang sang Nasyones Unidas ang ila ika-193 nga miembro nga estado. Gani suno sa ila, ginarepresentar nila ang kalabanan nga pungsod kag katawhan sa kalibutan.

  3. Ang gahom sini halin sa iban nga mga paggahom. Utang sang Nasyones Unidas ang iya pagluntad sa miembro sini nga mga pungsod kag sa ila nagadepende ang gahom kag awtoridad sini.

  4. Naangot ini sa relihion. Ang Liga de Nasyones kag Nasyones Unidas pareho nga ginsuportahan sang mga relihion sa kalibutan. *

  5. Nagapakahuya ini sa Dios. Gintukod ang Nasyones Unidas “para huptan ang internasyonal nga paghidait kag kalig-unan.” * Daw dalayawon ang tulumuron sini, pero ang matuod ginapakahuy-an sang UN ang Dios bangod masarangan kuno sini himuon ang ginasiling sang Dios nga mahimo lamang sang iya Ginharian.Salmo 46:9; Daniel 2:44.

  6. Temporaryo ini nga nangin indi aktibo. Ang Liga de Nasyones, nga gintukod wala madugay pagkatapos sang Bug-os Kalibutan nga Inaway I para mahuptan ang paghidait wala makapugong sa kagamo sa bilog nga kalibutan. Nauntat ini sang nagsugod ang Bug-os Kalibutan nga Inaway II sang 1939. Sang 1945, sang natapos ang Bug-os Kalibutan nga Inaway II, gintukod ang Nasyones Unidas. Ang katuyuan, pamaagi, kag pagkahuman sini kaanggid gid sa Liga de Nasyones.

^ par. 10 Suno sa Vine’s Expository Dictionary of Old and New Testament Words, ang Griego nga tinaga nga gin-translate “kadadalman” nagalaragway sang “indi matungkad nga kadalumon.” Ang King James Version nagbadbad sini bilang “madalom nga buho.” Sa Biblia, nagapatuhoy ini sa duog ukon kahimtangan nga nabilanggo kag indi na gid makapanghikot.

^ par. 13 Tan-awa ang Artikulo 2 sang Karta sang Nasyones Unidas.

^ par. 16 Halimbawa, ang konseho nga nagarepresentar sa madamo nga denominasyon sang Protestante sa Amerika nagdeklarar sang 1918 nga ang Liga amo “ang pulitikal nga ekspresyon sang Ginharian sang Dios sa duta.” Sang 1965, ang mga representante sang Budhismo, Katolisismo, Eastern Orthodoxy, Hinduismo, Islam, Judaismo, kag Protestantismo nagtipon sa San Francisco agod suportahan kag ipangamuyo ang Nasyones Unidas. Kag sang 1979, nagpabutyag si Pope John Paul II sang iya paglaum nga ang UN “magapabilin nga pinakamataas nga katilingban para sa paghidait kag katarungan.”

^ par. 17 Tan-awa ang Artikulo 1 sang Karta sang Nasyones Unidas.

Magtuon sing Dugang Pa

Ngaa Nagapabilin nga Neutral sa Pulitika ang mga Saksi ni Jehova?

Makatalagam bala sila sa seguridad sang pungsod?

Posible Ayhan nga Mangin Isa Lang ang Aton Gobierno sa Bug-os nga Kalibutan?

Handurawa ang paghidait kag kalig-unan nga paluntaron sang isa ka bug-os kalibutan nga gobierno. Ngaa makasalig kita nga magatukod ang Dios sing subong sini nga sahi sang gobierno? Sin-o ang nagakabagay nga manuggahom sa sini?