Magdiretso sa kaundan

Sin-o si Miguel nga Arkanghel?

Sin-o si Miguel nga Arkanghel?

Ang sabat sang Biblia

Ang Miguel nga ginatawag sang iban nga relihion bilang “San Miguel,” amo ang ngalan nga ginhatag kay Jesus antes kag pagkatapos sang iya kabuhi sa duta. * Nakigsuay si Miguel kay Satanas sang mapatay si Moises kag ginbuligan niya ang isa ka anghel para mapahayag sini ang mensahe sang Dios sa propeta nga si Daniel. (Daniel 10:13, 21; Judas 9) Ginhimo gid ni Miguel ang kahulugan sang iya ngalan—“Sin-o ang Kaangay sang Dios?”​—paagi sa pagdepensa sa paggahom sang Dios kag pagpakig-away sa mga kaaway sang Dios.​—Daniel 12:1; Bugna 12:7.

Binagbinaga kon ngaa masiling gid nga si Jesus ang arkanghel nga si Miguel.

  • Si Miguel ang “arkanghel.” (Judas 9) Ang titulo nga “arkanghel,” nga nagakahulugan “pangulo sang mga anghel,” makita sa duha lang ka bersikulo sa Biblia. Sa sining duha ka bersikulo, ang tinaga nga gingamit pang-isahan, nga nagapakita nga isa lang ang arkanghel. Ang isa sa sini nga mga bersikulo nagasiling nga ang ginbanhaw nga si Ginuong Jesus “magapanaug halin sa langit, nga may pagmando, nga may tingog sang arkanghel.” (1 Tesalonica 4:​16) Si Jesus “may tingog sang arkanghel” kay sia ang arkanghel nga si Miguel.

  • Si Miguel ang nagapanguna sa hangaway sang mga anghel. “Si Miguel kag ang iya mga anghel nagpakig-away sa dragon,” nga si Satanas. (Bugna 12:7) Si Miguel may daku nga awtoridad sa lugar sang mga espiritu, kay ginatawag sia nga “isa sa nagapanguna nga mga prinsipe” kag “gamhanan nga prinsipe.” (Daniel 10:13, 21; 12:1) Base sa sini nga mga titulo, si Miguel “ang pangulo nga kumandante sang hangaway sang mga anghel,” siling sang iskolar sa Bag-ong Katipan nga si David E. Aune.

    Sa Biblia, may ginsambit nga ngalan sang isa pa ka persona nga may awtoridad man sa hangaway sang mga anghel. Ginasugid sini ang pagpahayag ni “Ginuong Jesus halin sa langit kaupod ang iya gamhanan nga mga anghel sa nagadabdab nga kalayo, samtang ginatimalusan niya ang mga wala nagakilala sa Dios.” (2 Tesalonica 1:​7, 8; Mateo 16:27) Si Jesus “nagkadto . . . sa langit, kag ginpasakop sa iya ang mga anghel kag mga awtoridad kag mga kagamhanan.” (1 Pedro 3:​21, 22) Indi gid insakto kon hangpon naton nga gusto sang Dios nga mag-agaway si Jesus kag si Miguel sa pagpanguna sa balaan nga mga anghel. Kundi mas insakto hangpon nga ang duha ka ngalan, Jesus kag Miguel, nagapatuhoy sa isa lang ka persona.

  • Si Miguel “magahulag” sa “tion sang kagamo” nga wala pa gid matabo. (Daniel 12:1) Sa libro sang Daniel, ang tinaga nga “magahulag” pirme ginagamit sa pagpatuhoy sa paghulag sang isa ka hari para sa isa ka importante nga hilimuon. (Daniel 11:​2-4, 21) Si Jesucristo, nga ginatawag nga “Ang Pulong sang Dios,” magahulag bilang “Hari sang mga hari” para laglagon ang tanan nga kaaway sang Dios kag proteksionan ang katawhan sang Dios. (Bugna 19:11-​16) Himuon niya ini sa tion sang “dakung kapipit-an nga wala pa gid matabo halin sa ginsuguran sang kalibutan.”​—Mateo 24:21, 42.

^ par. 3 May iban pa nga mga tawo sa Biblia nga indi lang isa ang ngalan, pareho nanday Jacob (gintawag man Israel), Pedro (gintawag man Simon), kag Tadeo (gintawag man Judas).​—Genesis 49:​1, 2; Mateo 10:​2, 3; Marcos 3:​18; Binuhatan 1:​13.