Magdiretso sa kaundan

Magdiretso sa secondary menu

Mga Saksi ni Jehova

Hiligaynon

Ano ang Kahulugan sang 666?

Ano ang Kahulugan sang 666?

Ang sabat sang Biblia

Suno sa katapusan nga libro sang Biblia, ang 666 amo ang numero, ukon ngalan, sang mabangis nga sapat nga may pito ka ulo kag napulo ka sungay nga nagtakas sa dagat. (Bugna 13:1, 17, 18) Ining sapat simbulo sang pulitikal nga sistema sa bilog nga kalibutan, nga nagagahom sa “tagsa ka tribo kag katawhan kag hambal kag pungsod.” (Bugna 13:7) Ang ngalan nga 666 nagapakita nga ang pulitikal nga sistema napaslawan gid sa pagtamod sang Dios. Ngaa?

Indi lang ngalan. Ang mga ngalan nga ginahatag sang Dios may kahulugan. Halimbawa, ginhatagan sang Dios si Abram, nga nagakahulugan “Mataas (Ginabayaw) ang Amay,” sing ngalan nga Abraham, nga nagakahulugan “Amay sang Kadam-an (Madamo),” sang nagpromisa ang Dios nga himuon niya si Abraham nga “amay sang kadam-an sang mga pungsud.” (Genesis 17:5) Gani, ang sapat nga mapintas ginngalanan man sang Dios sing 666 nga nagasimbulo sang mga kinaiya sini.

Ang numero nga anom nagapahangop sang pagkadi-perpekto. Sa Biblia, ang mga numero pirme ginagamit subong simbulo. Ang pito masami nga nagarepresentar sang pagkakompleto ukon pagkaperpekto. Gani ang anom, nga kulang isa para magpito, mahimo nagakahulugan nga indi kompleto ukon may depekto sa pagtamod sang Dios, kag mahimo may labot sa mga kaaway sang Dios.1 Cronica 20:6; Daniel 3:1.

Tatlo ka beses nga ginsulit para hatagan sing bug-at. Kon kis-a, ang Biblia nagahatag sing bug-at sa isa ka butang paagi sa pagsulit sini sing tatlo ka beses. (Bugna 4:8; 8:13) Gani, maathag nga ginapakita sang ngalan nga 666 nga sa pagtamod sang Dios napaslawan gid ang pulitikal nga sistema sang tawo. Wala gid ini makadala sang dayon nga paghidait kag kasiguruhan, kay ang makahatag lang sini amo ang Ginharian sang Dios.

Ang marka sang mabangis nga sapat

Ang Biblia nagsiling nga ang mga tawo “may marka sang mabangis nga sapat” bangod ginasunod nila ini “nga may pagdayaw,” kag ginasimba pa gani. (Bugna 13:3, 4; 16:2) Ginahimo nila ini paagi sa pagpadungog sa ila pungsod, sa mga simbulo, ukon sa kusog militar sini. Subong sang ginsiling sang The Encyclopedia of Religion: “Ang nasyonalismo nangin panguna nga relihion sa kalibutan subong.” *

Ngaa ang marka sang mabangis nga sapat ginabutang sa tuo nga kamot ukon agtang? (Bugna 13:16) Parte sa iya sugo sa pungsod sang Israel, ang Dios nagsiling: “Ibugkos ninyo sila nga tanda sa inyo kamut, kag manginfilacteria sila sa ulut sang inyo mga mata.” (Deuteronomio 11:18) Wala ini nagakahulugan nga literal nga markahan sang mga Israelinhon ang ila mga kamot kag agtang, kundi nga ang pulong sang Dios amo ang magagiya sa ila mga ginahimo kag ginahunahuna. Sa amo man nga paagi, sa baylo nga mangin literal nga 666 nga tattoo, ang marka sang mabangis nga sapat simbuliko nga nagapakilala sa mga nagasunodsunod sa pulitikal nga sistema. Ginahimo nila ang ila kaugalingon nga kaaway sang Dios.Bugna 14:9, 10; 19:19-21.

^ par. 8 Tan-awa man ang Nationalism in a Global Era, pahina 134, kag ang Nationalism and the Mind: Essays on Modern Culture, pahina 94.