Magdiretso sa kaundan

Magdiretso sa secondary menu

Mga Saksi ni Jehova

Hiligaynon

Ano ang Ginharian sang Dios?

Ano ang Ginharian sang Dios?

Ang sabat sang Biblia

Ang Ginharian sang Dios isa ka matuod nga gobierno nga gintukod ni Jehova nga Dios. “Ang ginharian sang Dios” ginatawag man sa Biblia nga “ginharian sang langit” bangod nagagahom ini halin sa langit. (Marcos 1:14, 15; Mateo 4:17) May pagkapareho ini sa mga gobierno sang tawo, pero mas labaw ini sa tanan nga aspekto.

  • Manuggahom. Gintangdo sang Dios si Jesucristo subong Hari sang Ginharian kag ginhatagan sia sing awtoridad nga labaw sa kay bisan sin-o nga gumalahom nga tawo. (Mateo 28:18) Ini nga gahom ginagamit lamang ni Jesus para sa kaayuhan, kay napamatud-an na niya nga isa sia ka masaligan kag maluluy-on nga Lider. (Mateo 4:23; Marcos 1:40, 41; 6:31-34; Lucas 7:11-17) Sa panuytoy sang Dios, nagpili si Jesus sing mga tawo halin sa tanan nga pungsod nga makaupod niya sa langit kag ‘magagahom sa duta subong mga hari.’—Bugna 5:9, 10.

  • Kalawigon sang paggahom. Indi pareho sa gobierno sang tawo nga nagabuslanay, ang Ginharian sang Dios “dili gid malaglag.”—Daniel 2:44.

  • Sakop. Ang bisan sin-o nga nagahimo sang kabubut-on sang Dios mahimo mangin sakop sang Ginharian sang Dios, bisan ano man ang iya rasa ukon ginhalinan.—Binuhatan 10:34, 35.

  • Kasuguan. Ang mga kasuguan (ukon mga sugo) sang Ginharian sang Dios wala lamang nagadumili sang sayop nga mga buhat. Ginabuligan man sini ang mga sakop nga mangin mas maayo nga mga tawo. Halimbawa, ang Biblia nagasiling: “‘Higugmaon mo si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.’ Amo ini ang labing daku kag nahauna nga sugo. Ang ikaduha, nga kaangay sini, amo ini, ‘Higugmaon mo ang imo isigkatawo subong sang imo kaugalingon.’” (Mateo 22:37-39) Gani, ginauna sang mga sakop sini nga Ginharian ang kaayuhan sang iban bangod sang ila gugma sa Dios kag sa ila isigkatawo.

  • Edukasyon. Magluwas sa pagpahamtang sing mataas nga talaksan sa mga sakop sini, ginatudlo man sang Ginharian sang Dios kon paano malab-ot ini nga mga talaksan.—Isaias 48:17, 18.

  • Misyon. Sa Ginharian sang Dios, ang mga gumalahom wala nagapasulhay samtang nagaantos ang ila mga sakop. Kundi, himuon sini ang kabubut-on sang Dios, lakip ang promisa nga ang tanan nga nagahigugma sa iya magakabuhi sing dayon sa isa ka paraiso nga duta.—Isaias 35:1, 5, 6; Mateo 6:10; Bugna 21:1-4.

 

Magtuon sing Dugang Pa

Ano Gid ang Ginatudlo sang Biblia?

Ano ang Ginharian sang Dios?

Madamo ang nakahibalo sang Pangamuyo sang Ginuo. Ano ang buot silingon sang, “Magkari ang imo Ginharian”?

ANG LALANTAWAN—TULUN-AN NGA EDISYON

Ginharian sang Dios—Labaw Gid sa Tanan nga Paagi

Basaha kon paano ginpaanggid ang Ginharian sang Dios sa tawhanon nga panguluhan.