Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Buot Silingon sang Mabun-ag Liwat?

Ano ang Buot Silingon sang Mabun-ag Liwat?

Ang sabat sang Biblia

Ang termino nga “mabun-ag liwat” nagapatuhoy sa pagsugod sang isa ka bag-o nga relasyon sa tunga sang Dios kag sang tawo nga nabun-ag liwat. (Juan 3:3, 7) Gin-adoptar sang Dios ining mga nabun-ag liwat bilang iya mga anak. (Roma 8:15, 16; Galacia 4:5; 1 Juan 3:1) Pareho sa mga gin-adoptar sing legal, naeksperiensiahan nila ang pagbag-o sa ila kahimtangan, kay nangin bahin sila sang pamilya sang Dios.2 Corinto 6:18.

Ngaa mabun-ag liwat ang isa ka tawo?

Si Jesus nagsiling: “Kon ang isa indi mabun-ag liwat, indi niya makita ang Ginharian sang Dios.” (Juan 3:3) Gani, ang isa nga nabun-ag liwat ginahanda para maggahom upod sa Cristo sa Ginharian sang Dios. Ini nga Ginharian nagagahom sa langit, gani ang Biblia nagasiling nga ang “bag-o nga pagkabun-ag” nagahatag sing palanublion nga ‘ginatigana sa langit.’ (1 Pedro 1:3, 4) Ang mga nabun-ag liwat ginagarantiyahan nga ‘magagahom subong mga hari’ kaupod sang Cristo.2 Timoteo 2:12; 2 Corinto 1:21, 22.

Paano mabun-ag liwat ang isa ka tawo?

Sang ginhambal ni Jesus ini nga topiko, nagsiling sia nga ang mga nabun-ag liwat “mabun-ag paagi sa tubig kag espiritu.” (Juan 3:5) Ini nga mga tinaga nagapatuhoy sa bawtismo sa tubig nga ginasundan sang bawtismo sa balaan nga espiritu.Binuhatan 1:5; 2:1-4.

Si Jesus ang una nga tawo nga nabun-ag liwat. Ginbawtismuhan sia sa Suba Jordan, kag pagkatapos sini ginhaplas (ukon, ginbawtismuhan) sia sang Dios sa balaan nga espiritu. Gani, si Jesus nabun-ag liwat bilang espirituwal nga anak sang Dios kag may paglaum nga magbalik sa iya kabuhi sa langit. (Marcos 1:9-11) Gintuman sang Dios ini nga paglaum paagi sa pagbanhaw kay Jesus bilang espiritu nga tinuga.Binuhatan 13:33.

Ang iban nga nabun-ag liwat ginbawtismuhan man anay sa tubig antes sila nakabaton sing balaan nga espiritu. * (Binuhatan 2:38, 41) Gani, sigurado ang ila paglaum nga mapalangit, nga ihatag sang Dios sa tion sang pagbanhaw.1 Corinto 15:42-49.

Sayop nga mga pagpati parte sa pagkabun-ag liwat

Sayop nga pagpati: Ang isa ka tawo dapat mabun-ag liwat para maluwas ukon para mangin Cristiano.

Ang matuod: Ang halad sang Cristo nagahatag sing kaluwasan indi lamang para sa mga nabun-ag liwat nga magagahom kaupod sang Cristo sa langit kundi para man sa mga sakop sang Ginharian sang Dios diri sa duta. (1 Juan 2:1, 2; Bugna 5:9, 10) Ining ikaduha nga grupo sang mga Cristiano may kahigayunan nga mag-istar asta san-o sa Paraiso sa duta.Salmo 37:29; Mateo 6:9, 10; Bugna 21:1-5.

Sayop nga pagpati: Ang isa ka tawo makapili kon gusto niya mabun-ag liwat.

Ang matuod: Ang tanan puede magtigayon sang relasyon sa Dios kag maluwas. (1 Timoteo 2:3, 4; Santiago 4:8) Pero, ang Dios ang nagapili kon sin-o ang mabun-ag liwat, ukon haplasan sang balaan nga espiritu. Siling sang Biblia, ang pagkabun-ag liwat ‘nasandig, indi sa handum sang tawo ukon sa iya panikasog, kundi sa Dios.’ (Roma 9:16) Ang termino nga “mabun-ag liwat” nagakahulugan man nga “mabun-ag halin sa ibabaw,” nga nagapakita nga ang pagpili kon sin-o ang mabun-ag liwat naghalin “sa ibabaw,” ukon sa Dios.Juan 3:3, footnote.

^ par. 9 Lain ang natabo sa kaso ni Cornelio kag sang iya mga kaupdanan.Binuhatan 10:44-48.

Magtuon sing Dugang Pa

Ang Bawtismo kag ang Imo Relasyon sa Dios

Ano ang mga tikang nga kinahanglan para ang isa puede na sa Cristiano nga bawtismo? Tun-i kon ano ang ginasimbulo sini kag kon paano ini himuon.

Ang Gawad—Ang Pinakabilidhon nga Regalo sang Dios

Ano ang gawad? Paano ka makabenepisyo sa sini?

Ano ang Ginharian sang Dios?

Madamo ang nakahibalo sang Pangamuyo sang Ginuo. Ano ang buot silingon sang, “Magkari ang imo Ginharian”?