Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Ano ang Bawtismo?

Ano ang Bawtismo?

Ang sabat sang Biblia

Ang bawtismo amo ang pagpasalop kag pagpabutwa sa isa ka tawo sa tubig. * Amo ini ang rason kon ngaa si Jesus ginbawtismuhan sa isa ka daku nga suba. (Mateo 3:13, 16) Ang Etiopianhon nga lalaki nagpangabay man nga bawtismuhan sia sa “isa ka lugar nga may tubig.”Binuhatan 8:36-40.

Ang kahulugan sang bawtismo

Sa Biblia, ang bawtismo ginpaanggid sa paglubong. (Roma 6:4; Colosas 2:12) Ang bawtismo sa tubig nagasimbulo nga ang isa napatay sa iya daan nga paagi sang pagkabuhi kag masugod sang bag-o nga kabuhi bilang Cristiano nga nakadedikar sa Dios. Ginapatuman sang Dios nga dapat magpabawtismo ang isa ka tawo. Pero, may mga tikang pa nga dapat niya himuon antes sia mabawtismuhan para matigayon niya ang matinlo nga konsiensia base sa iya pagtuo sa halad ni Jesucristo. (1 Pedro 3:21) Gani, gintudlo ni Jesus nga ang iya mga disipulo dapat magpabawtismo.Mateo 28:19, 20.

Ang bawtismo sa tubig paghugas bala sa sala?

Indi. Ginatudlo sang Biblia nga ang makatinlo lang sa aton mga sala amo ang ginpatulo nga dugo ni Jesus. (Roma 5:8, 9; 1 Juan 1:7) Pero, para makabenepisyo sa halad ni Jesus, ang isa ka tawo dapat magtuo kay Jesus, magbag-o sang iya kabuhi, magsunod sa panudlo ni Jesus, kag magpabawtismo.Binuhatan 2:38; 3:19.

Ano ang pagpabunyag?

Ang termino nga “bunyag” kag “pagpabunyag” wala sa Biblia. Isa ini ka seremonya nga ginahimo sang iban nga relihion diin ang isa ka lapsag “ginabawtismuhan” (paagi sa pagwisik ukon pagbubo sang tubig sa iya ulo) kag ginahatagan sing ngalan.

Ginatudlo bala sang Biblia ang pagbawtismo sa mga lapsag?

Wala. Ang Cristiano nga bawtismo dapat himuon sang mga nakaintiende na kag nagapati sa “maayong balita tuhoy sa Ginharian sang Dios.” (Binuhatan 8:12) Nalakip sa sini ang pagpamati sa pulong sang Dios, pagbaton sini, kag paghinulsol—mga buhat nga indi pa mahimo sang isa ka lapsag.Binuhatan 2:22, 38, 41.

Isa pa, ginapakita sang Biblia nga ang magagmay nga kabataan sang mga Cristiano balaan, ukon matinlo sa mata sang Dios bangod sa katutom sang ila mga ginikanan. (1 Corinto 7:14) Kon husto ang pagbawtismo sa mga lapsag, indi na kinahanglan sini nga kabataan nga magdepende sa katutom sang iban. *

Sayop nga mga pagpati parte sa Cristiano nga bawtismo

Sayop nga pagpati: Ang pagwisik ukon pagbubo sang tubig sa isa ka tawo puede na ibulos sa pagpasalop sa tubig.

Kamatuoran: Ang mga bawtismo nga mabasa sa Biblia puro tanan pagpasalop sa tubig. Halimbawa, sang ginbawtismuhan sang disipulo nga si Felipe ang Etiopianhon, “naglusong” sila sa tubig. Pagkatapos ‘nagtakas sila sa tubig.’Binuhatan 8:36-39. *

Sayop nga pagpati: Ginapakita sang Biblia nga ang mga lapsag ginbawtismuhan man upod sa bilog nga panimalay. Halimbawa, nagsiling ini parte sa manugbilanggo sa Filipos: “Sia kag ang iya bug-os nga panimalay ginbawtismuhan.”Binuhatan 16:31-34.

Kamatuoran: Ining kasaysayan parte sa pagkumbertir sa manugbilanggo nagapakita nga naintiendihan sang mga ginbawtismuhan “ang pulong ni Jehova” kag “nagkasadya gid” sila. (Binuhatan 16:32, 34) Gani, masiling nga kon may mga lapsag gid man sa panimalay sang manugbilanggo wala ini ginbawtismuhan, kay indi pa sila makaintiende sang pulong ni Jehova.

Sayop nga pagpati: Gintudlo ni Jesus ang pagbawtismo sa mga lapsag sang nagsiling sia nga ang Ginharian ila sang magagmay nga kabataan.Mateo 19:13-15; Marcos 10:13-16.

Kamatuoran: Indi bawtismo ang ginaistoryahan sang ginhambal ini ni Jesus. Kundi ginapakita niya nga para makasulod sa Ginharian sang Dios, ang isa dapat mangin pareho sa bata nga mapainubuson kag mahapos tudluan.Mateo 18:4; Lucas 18:16, 17.

^ par. 3 Ang tinaga nga “bawtismo” naghalin sa Griego nga termino nga nagakahulugan sing “pagpasalop sa tubig. Tan-awa ang Theological Dictionary of the New Testament, Volume I, pahina 529.

^ par. 12 Siling sang The International Standard Bible Encyclopedia, “ang pagbawtismo sa lapsag indi mabasa sa B[ag-ong] T[estamento].” Nagsiling man ini nga ang seremonya naghalin sa “sala kag nasobrahan nga paghatag sing importansia sa kahulugan sang bawtismo,” nga ang bawtismo, makahugas sang sala.—Volume 1, pahina 416-417.

^ par. 15 Sa tig-ulo nga “Bawtismo (sa Biblia),” ang New Catholic Encyclopedia nagsiling: “Maathag nga ang paagi sang Bawtismo sa Simbahan sang una amo ang pagtum-oy.”—Volume 2, pahina 59.

Magtuon sing Dugang Pa

Ang Bawtismo kag ang Imo Relasyon sa Dios

Ano ang mga tikang nga kinahanglan para ang isa puede na sa Cristiano nga bawtismo? Tun-i kon ano ang ginasimbulo sini kag kon paano ini himuon.