Magdiretso sa kaundan

Sin-o Ukon Ano “ang Alpha kag ang Omega”?

Sin-o Ukon Ano “ang Alpha kag ang Omega”?

Ang sabat sang Biblia

“Ang Alpha kag ang Omega” nagapatuhoy kay Jehova nga Dios, ang Labing Gamhanan. Tatlo ka beses ini nga mabasa sa Biblia.—Bugna 1:8; 21:6; 22:13. *

Ngaa gintawag sang Dios ang iya kaugalingon nga “ang Alpha kag ang Omega”?

Ang alpha kag ang omega amo ang una kag ang katapusan nga mga letra sa Griego nga alpabeto, ang lenguahe nga gingamit sa pagsulat sang bahin sang Biblia nga ginatawag sang kalabanan nga Bag-ong Katipan, kag lakip diri ang libro sang Bugna. Bangod amo ini ang una kag ang katapusan nga mga letra sa Griego nga alpabeto, ginapakita sini nga si Jehova gid lamang ang ginsuguran kag ang katapusan. (Bugna 21:6) Sia ang Labing Gamhanan nga Dios nga wala sing ginsuguran, kag sia gihapon ang Labing Gamhanan asta sa wala sing katapusan. Sia lamang ang isa nga “halin sa wala sing katubtuban tubtob sa wala sing katubtuban.”—Salmo 90:2.

Sin-o ‘ang nahauna kag ang katapusan’?

Ini nga termino ginapatuhoy sang Biblia kay Jehova nga Dios kag sa iya Anak nga si Jesus. Pero sarisari ang kahulugan sini. Binagbinaga ang duha ka halimbawa.

  • Sa Isaias 44:6, si Jehova nagsiling: “Ako ang nahauna kag ako ang katapusan. Magluwas sa akon wala na sing Dios.” Diri ginpakita ni Jehova nga sia ang matuod nga Dios nga wala sing katapusan; magluwas sa iya, wala na sing iban pa. (Deuteronomio 4:35, 39) Gani sa sini nga teksto, ang ekspresyon nga ‘ang nahauna kag ang katapusan’ pareho sing kahulugan sa “ang Alpha kag ang Omega.”

  • Dugang pa, ang termino nga “ang Nahauna [pro’tos, indi alpha] kag ang Katapusan [e’skha·tos, indi omega]” mabasa sa Bugna 1:17, 18 kag 2:8. Ginapakita sini nga mga bersikulo nga ang isa nga ginapatuhuyan diri napatay kag sang ulihi nabuhi liwat. Gani, ini nga mga bersikulo wala nagapatuhoy sa Dios kay ang Dios indi mapatay. (Habacuc 1:12) Pero si Jesus napatay kag ginbanhaw. (Binuhatan 3:13-15) Sia ang una nga tawo nga ginbanhaw nga nangin imortal nga espiritu nga tinuga sa langit, diin nagaistar sia subong “tubtob sa wala sing katubtuban.” (Bugna 1:18; Colosas 1:18) Dayon, si Jesus na ang nagbanhaw sang mga napatay pagkatapos sia mabanhaw. (Juan 6:40, 44) Gani, sia ang katapusan nga direkta nga ginbanhaw ni Jehova. (Binuhatan 10:40) Sa sini nga kahulugan, nagakaigo nga tawgon si Jesus nga “ang Nahauna kag ang Katapusan.”

Ang Bugna 22:13 pamatuod bala nga si Jesus “ang Alpha kag ang Omega”?

Indi. Ang humalambal sang Bugna 22:13 wala ginpakilala, kag madamo sing humalambal ini nga kapitulo. Parte sa sini nga bahin sang Bugna, si Professor William Barclay nagsiling: “Ang pagsulat sini indi pasunod; . . . kag mabudlay mahibaluan kon sin-o ang nagsiling sini.” (The Revelation of John, Volume 2, Revised Edition, pahina 223) Gani, “ang Alpha kag ang Omega” sa Bugna 22:13 amo gihapon nga persona nga ginhatagan sini nga titulo sa bilog nga libro sang Bugna—si Jehova nga Dios.

^ par. 3 Sa Biblia nga King James Version, ini nga ekspresyon mabasa sing apat ka beses. Ang isa sini makita sa Bugna 1:11. Pero sa kalabanan nga moderno nga translation, ini nga ekspresyon indi mabasa sa sini nga teksto kay wala ini sa pinakadumaan nga Griego nga mga manuskrito. Gindugang lang ini sa ulihi nga mga kopya sang Kasulatan.