Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Pagwali sa Ubay sang Xingu River

Pagwali sa Ubay sang Xingu River

Sang una nga mga inadlaw sang Hulyo 2013, isa ka grupo sang 28 ka Saksi ni Jehova sa Brazil ang naglakat halin sa São Félix do Xingu pakadto sa teritoryo sang mga Cayapo kag Yuruna Indians. Nagsakay sila sa 15 metros nga baruto, kag ginsubay pailaya ang Xingu River, nga nagailig sing 2,092 kilometros paaminhan pakadto sa Amazon River.

Naglakbay ini nga grupo para iwali ang Ginharian sang Dios sa mga baryo sa ubay sang suba. Sang ikatlo nga adlaw, nakalab-ot sila sa baryo sang Kokraimoro. Nagayuhum gid ang mga pumuluyo didto sa pag-abiabi sa ila. Grabe gid ang pagkumpaskumpas sang isa ka babayi. Gani, ginpaathag sang amon guide: “Ang buot silingon sang iya kumpas: ‘Dali kamo diri. Gusto gid namon kamo tanan makilala!’”

Gin-istorya sang mga Saksi ang tanan—ang iban sa Portuges kag ang iban paagi sa mga senyas kag kumpas. Ang de-kolor nga piktyur sa mga publikasyon nga base sa Biblia nga dala nila nakabulig gid, kag madamo nga pumuluyo didto ang nagbaton sang mga balasahon, ilabi na sang brosyur nga Pamatii ang Dios.

Si Gerson, nga isa ka espesyal payunir sa São Félix do Xingu, naghinumdom sang reaksion sang isa ka taga-didto sang mabaton sini ang libro nga Ang Akon Libro sang mga Sugilanon sa Biblia: “Gintan-aw niya ini kag gin-uyatan sing hugot; daw indi na gid niya ini pagbuy-an.”

Ang mga Saksi ni Jehova nagbilin sing mga 500 ka libro, magasin, kag mga brosyur sa mabinatunon nga mga pumuluyo sa ubay sang suba. Sa Kawatire, ang mga pumuluyo nanamian gid magpamati sa mga promisa sang Biblia parte sa paraiso diri sa duta. “Ang pagkabuhi sang mga tawo sa Paraiso pareho gid sa aton,” haumhaum ni Tonjaikwa, nga isa ka maabiabihon nga Cayapo Indian.

Madamo sa banwa sang São Félix do Xingu ang nakahibalo parte sa sini nga paglakbay. Si Simone, nga isa sa nag-upod, nagsiling nga may pila sa ila lugar nga nabalaka kay basi sia kag iya mga kaupdanan indi pagpasudlon sa mga baryo. Pero wala sing problema. “Gin-abiabi gid nila kami,” siling ni Simone, “kag nawalihan namon ang tanan.”

Magtuon sing Dugang Pa

Naghalad sang Ila Kaugalingon sing Kinabubut-on—Sa Brazil

Basaha ang makapalig-on nga mga eksperiensia sang pila nga nagsaylo sa iban nga lugar para mag-alagad sing bug-os sa Dios.