Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

May 3,000 Na ka Kingdom Hall sa Nigeria

May 3,000 Na ka Kingdom Hall sa Nigeria

Sang Sabado, Marso 1, 2014, malipayon nga nagtipon ang 823 ka tawo sa Assembly Hall sang mga Saksi ni Jehova sa Benin City para saksihan ang tumalagsahon nga hitabo sa Nigeria. Sugod sang 1999, sang nag-umpisa ang kahimusan nga magpatindog sing mga Kingdom Hall sa imol nga mga lugar, ang mga Saksi ni Jehova nakapatindog sing 3,000 ka Kingdom Hall sa sini nga pungsod.

Sadto

Ginpakita sa sini nga pagtilipon ang malip-ot nga kasaysayan parte sa pag-aman sing mga tilipunan para sa mga kongregasyon sa Nigeria halin sang dekada 1920. Sang primero, pribado nga mga balay kag gin-arkilahan nga mga pasilidad ang ila ginagamit. Ang pinakauna nga tilipunan sa Nigeria nga gingamit sing eksklusibo para sa mga miting sang mga Saksi ni Jehova amo ang tilipunan nga ginpatindog sa siudad sang Ilesa, sang mga 1935. Halin sang 1938 asta 1990, ang mga kongregasyon nagdamo sing halos 200 ka pilo, halin sa 14 nangin 2,681, kag madamo sa ila ang nabudlayan sa pagpangita sing tilipunan. May mga Kingdom Hall nga anom ka kongregasyon ang nagagamit. Ang iban naman gutok katama, nga nagatindog na lang ang iban sa gua kag nagatan-aw sa bintana para makapamati sa mga miting. Madamo man nga kongregasyon ang nagatipon sa mga balay kag mga kuarto sang eskwelahan.

Subong

Sang 1990, ginsuportahan sang sanga talatapan sang mga Saksi ni Jehova ang pagpatindog sang mga tilipunan paagi sa pagpahulam sing kuarta halin sa Kingdom Hall Fund. Dayon sang 1997, ginbuligan sang mga Regional Building Committee ang 105 ka kongregasyon sa pagpatindog ukon pagpakay-o sang ila tilipunan. Sang 1997 asta 1999, may 13 ka Kingdom Hall nga nahuman sa sulod lang sang 7 asta 15 ka adlaw.

Bisan ining ginpadasig nga pamaagi sa pagpatindog indi bastante para malagas ang pagdamo sang mga Saksi ni Jehova sa Nigeria. Sang Abril 1998, ginbulubanta sang sanga talatapan nga 1,114 pa ka Kingdom Hall ang kinahanglan sa pungsod.

Sa espesyal nga miting sa Benin City, ang miembro sang Komite sang Sanga sa Nigeria nga si Don Trost nagsiling sa mga nagtambong: “Daku katama ini nga trabaho! Naghunahuna kami, ‘Paano namon ini matapos?’” Sugod sang 1999, ini nga pamangkot nasabat sang ang mga Kingdom Hall Construction Group nga may anom asta walo ka miembro nagbulig sa mga kongregasyon sa bilog nga pungsod. Bangod sa ginpasimple nga mga desinyo, nakapatindog sila sing aberids nga 17 ka Kingdom Hall kada bulan sang nagligad nga 14 ka tuig.

Pagkatapos nahatagan sing komendasyon ang mga nagtambong bangod sini nga kadalag-an, ginpaathag ni Brother Trost nga madamo pa ang dapat himuon. Sang 2013, ang aberids nga kadamuon sang mga Saksi ni Jehova sa Nigeria nagdugang sing sobra 8,000. “Para maatipan ini nga pagdugang, kinahanglan ang 100 pa ka Kingdom Hall kada tuig,” siling niya. Sang 2013, nakalab-ot sa 351,000 ang mga Saksi sa sobra 5,700 ka kongregasyon sa Nigeria.

Magtuon sing Dugang Pa

Ngaa May mga Kingdom Hall ang mga Saksi ni Jehova kag Paano Ini Ginatukod?

Ngaa ginatawag nga Kingdom Hall ang amon tilipunan sa pagsimba? Hibalua kon paano ining simple nga mga tinukod mapuslanon sa amon mga kongregasyon.

Ngaa Wala Ginatawag sang mga Saksi ni Jehova nga Simbahan ang Ila Tilipunan?

Hibalua kon diin naghalin ang termino nga “Kingdom Hall of Jehovah’s Witnesses” kag kon ngaa amo ini ang amon ginagamit.