Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Isa ka Libo ka Kingdom Hall kag Nagadugang Pa

Isa ka Libo ka Kingdom Hall kag Nagadugang Pa

Sang Agosto 2013, isa ka importante nga hitabo sa kasaysayan sang mga Saksi ni Jehova sa Pilipinas ang natabo sang nahuman ang ika-1,000 nga Kingdom Hall paagi sa isa ka pinasahi nga programa sang pagpatindog. Pareho sa sitwasyon sa iban nga pungsod, ang mga kongregasyon sa Pilipinas masami nga wala sing kuarta ukon eksperiensia para makatukod sang ila permanente nga Kingdom Hall. Sa sulod sang mga tinuig, ang iban nagatipon sa mga balay, kag ang iban naman sa magagmay nga mga tilipunan nga human sa kawayan.

Padayon nga nagadamo ang mga Saksi ni Jehova sa Pilipinas kag sa iban nga pungsod, kag mas madamo man nga Kingdom Hall ang kinahanglan. Gani sang 1999, ang Nagadumala nga Hubon sang mga Saksi ni Jehova naghimo sang isa ka programa para makapatindog sang mga Kingdom Hall sa mga lugar nga wala sing ikasarang. Sa idalom sini nga programa, ang lokal nga mga Saksi nagaamot sang masarangan nila, kag ginadugangan ini sang mga amot halin sa iban nga pungsod. Ang mga Saksi nga ginhanas sa konstruksion gin-organisar sa mga grupo kag gin-asayn para magbulig sa mga kongregasyon sa pagpatindog sang ila Kingdom Hall. Sang Nobiembre 2001, ining internasyonal nga programa ginsugdan sa Pilipinas.

Si Iluminado miembro sang kongregasyon sa Marilao, Bulacan, ang ika-1,000 nga Kingdom Hall nga ginpatindog. Nagsiling sia: “Naeksperiensiahan ko gid ang Cristiano nga paghiliutod. Kadamo gid sang nagboluntaryo—lalaki kag babayi, bata kag tigulang. Ululupod kami nga nagaobra bisan pa nagatagiti ang adlaw. Kapoy kami sa bilog-adlaw nga obra, pero nalipay kami kon makita namon ang resulta sang amon pagbuligay.”

Nagbilib man ang mga indi Saksi sa kapisan sang mga boluntaryo. Ang tag-iya sang trak nga nagdeliber sang balas kag graba sa ginapatindugan, nagsiling: “Daw mga subay kamo—kadamo gid sa inyo! Ang tanan nagabulig. Subong lang ako nakakita sini.”

Ang human na nga Kingdom Hall

Wala pa anom ka semana, nahuman na sang mga boluntaryo ang Kingdom Hall. Bangod sa madasig nga pagpatindog, ang kongregasyon padayon nga nakabuylog sing bug-os sa importante nga hilikuton nga pagwali sang maayong balita sang Ginharian sang Dios.Mateo 24:14.

Si Ellen nga miembro sina nga kongregasyon, nagsiling: “Indi na kami mag-igo sa daan namon nga Kingdom Hall, ang iban sa gua na lang nagapungko. Matahom kag mas komportable ang bag-o nga Kingdom Hall, gani labi kami nga nagabenepisyo sa pagtudlo kag pagpalig-on sa mga miting.”

Magtuon sing Dugang Pa

Naghalad sang Ila Kaugalingon sing Kinabubut-on sa Pilipinas

Hibalua kon ano ang nagpahulag sa pila nga maghalin sa ila obra, ibaligya ang pagkabutang, kag magkabuhi sing simple sa Pilipinas.