Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Pagtughong sang Dugo—Ang Ginasiling sang mga Doktor Subong

Pagtughong sang Dugo—Ang Ginasiling sang mga Doktor Subong

Sa sulod sang mga dekada, pirme ginapakalain ang mga Saksi ni Jehova bangod wala sila nagapatughong sang dugo. Nabase ini sa sugo sang Biblia nga ‘maglikaw sa dugo.’ Ugaling kon kaisa, nagasumpakil ini sa ginasiling sang mga doktor nga pinakamaayo para sa mga pasyente.Binuhatan 15:29.

Pero madamo subong nga may tinun-an sa medisina ang nagapati nga may maayo nga mga rason kon ngaa dapat likawan ang paggamit sang dugo sa pagbulong.

Ang isa ka isyu sang dyurnal nga Stanford Medicine Magazine sang 2013, nga publikasyon sang Stanford University School of Medicine, may espesyal nga report parte sa dugo. May bahin ini nga natig-uluhan “Pagbulong nga Wala sing Dugo—Ngaa Madamo Na ang Nagahimo Sini?” Ang awtor sini nga artikulo nga si Sarah C. P. Williams, nagsiling: “Sang nagligad nga dekada nakita sa nagadamo nga research, nga sa mga ospital sa bilog nga kalibutan, ginagamit pirme ang gindonar nga dugo, kag sa masami sobra sangsa kinahanglan sang pasyente—sa operating room man ukon sa ward.”

Ginsambit sang awtor si Patricia Ford, M.D., nga founder kag direktor sang The Center for Bloodless Medicine and Surgery sa Pennsylvania Hospital. Si Dr. Ford nagsiling: “Ang mga doktor sa kabilugan gintudluan nga mapatay ang mga tawo kon makulangan sang dugo, kag ang dugo amo gid ang makaluwas sing kabuhi . . . Husto ini sa pila ka kaso, * pero sa kalabanan nga pasyente kag sitwasyon indi ini matuod.”

Si Dr. Ford, nga nagabulong sang mga 700 ka Saksi ni Jehova kada tuig, nagsiling pa gid: “Madamo nga doktor nga naistorya ko . . . ang may sala nga pagpati nga ang mga pasyente mapatay kon indi pagtughungan . . . Napensar ko man ina anay. Pero natun-an ko nga puede mo mabulong ini nga mga pasyente sa simple nga mga pamaagi.”

Sang Agosto 2012, ginbalhag sang dyurnal nga Archives of Internal Medicine, ang resulta sang 28 ka tuig nga pagtuon sa mga pasyente nga gin-operahan sa tagipusuon sa isa ka ospital. Mas maayo ang kahimtangan sang mga pasyente nga Saksi ni Jehova sangsa mga pasyente nga may pareho nga kondisyon nga nagpatughong sang dugo. Diutay lang ang komplikasyon sa mga Saksi, mas madasig sila nga nag-ayo, kag madamo sa ila ang buhi gihapon pagligad sang 20 ka tuig kon ikumparar sa mga pasyente nga nagpatughong.

Ang artikulo sa The Wall Street Journal nga ginbalhag sang Abril 8, 2013, nagsiling: “Ang operasyon nga wala sing dugo—ang pag-opera nga wala nagagamit sang gindonar nga dugo—madugay na nga ginahimo sa mga pasyente nga wala nagapatughong bangod sa ila relihioso nga pagpati. Subong, madamo na nga ospital ang nagahimo sini . . . Ang mga doktor nga wala nagagamit sing dugo sa pag-opera nagsiling nga magluwas nga makakinot kay indi na kinahanglan magbakal, magtago, magproseso, magtesting, kag magtughong, malikawan pa sini nga pamaagi ang mga impeksion nga dala sang pagpatughong kag komplikasyon nga nagapatener sa mga pasyente sa ospital.”

Gani indi katingalahan nga si Robert Lorenz, ang direktor sa blood management sa Cleveland Clinic nagsiling: “Abi mo ginabuligan mo ang pasyente kon tughungan mo . . . Pero, ginapakita sang epekto sini nga baliskad ang nagakatabo.”

^ par. 5 Para mahibaluan mo ang pagtamod sang mga Saksi ni Jehova sa dugo, tan-awa ang artikulo nga “Mga Pirme Ginapamangkot—Ngaa Wala Kamo Nagapatughong sang Dugo?

Magtuon sing Dugang Pa

Ano ang Ginasiling sang Biblia Parte sa Pagpatughong sang Dugo?

Suno sa Biblia, ang Dios nagsugo nga ‘maglikaw sa dugo.’ Paano ini naaplikar sa aton subong?