Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Mga Video nga Nagapahalipay

Mga Video nga Nagapahalipay

“Nabatian gid ni Jehova ang tagipusuon sang mga ginikanan.” Amo sina ang paglaragway sang isa ka amay sa Malaysia sa mga animated video nga Mangin Abyan ni Jehova.

Sugod sang una ini nga ginpagua, ang mga Saksi ni Jehova nakahimo na sing madamo nga animated video parte kay Caleb kag sa iya pamilya. Ini nga mga video, nga matigayon na subong sa jw.org, nagatudlo sa mga bata sang moral kag espirituwal nga mga leksion. Halimbawa, ginatudlo sini kon ngaa indi magpangawat kag kon paano mangamuyo sa Dios.

Ang una nga video sini na-translate na sa 131 ka lenguahe, kag nakabulig gid ini sa mga bata sa bilog nga kalibutan.

Nanamian Gid Sila

Ang isa ka iloy nga may lima ka bata nagsiling: “Halin sang nagligad nga semana nga nabaton namon ang DVD nga Magpamati, Magtuman, kag Pakamaayuhon Ka, mga 50 ka beses na namon ini natan-aw.”

Ang 12 anyos nga si Millie nga taga-England, may 15 anyos nga magulang nga si Thomas nga may Down syndrome. Si Millie nagsulat: “Ara sa iPad ni Thomas ang mga video ni Caleb, para mapalantaw niya ini sa iya mga abyan sa eskwelahan. Nanamian gid sia sa mga kanta, kag madayaw ka gid sa iya pagkanta sini amo nga nakahibi ang isa ka utod nga babayi. Kanami gid sini tan-awon.”

Si Ava nga nagsiling nga ang edad niya 8 ka tuig, 9 ka bulan, kag 25 ka adlaw, nagsulat: “Si Caleb kag ang iya utod maayo gid magtudlo sa mga bata.”

Si Mikaylah nagsulat: “Anom ako ka tuig. Salamat gid sa DVD nga Magpamati, Magtuman, kag Pakamaayuhon Ka. Natun-an ko nga magtuman sa akon mga ginikanan bangod nalipay sini si Jehova.”

Mapuslanon Gid

Ang bataon pa nga animator nga indi Saksi ni Jehova nakatan-aw sang video nga Malain ang Magpangawat. Nagdayaw gid sia labi na sang nabal-an niya nga gamay lang nga grupo sang mga animator ang naghimo sini. Nagsiling sia: “May kilala ako nga mga tawo nga nagatrabaho sa dalagku kag magagmay nga mga animation studio, kag kon kaisa ginapamensar ko kon daw ano ayhan kon makaobra ako sa sina nga mga studio. Pero pagkatapos sang ila obra, ang ila nahimo nakapakadlaw kag nakalingaw sa mga tawo sa sulod lang sang pila ka oras, dayon wala na. Samtang ang inyo mga animation nagabag-o sang kabuhi sang mga bata, nagatudlo sa ila sang husto kag sala, kag nagabulig sa ila nga magdesisyon sing husto. Ang inyo ginahimo may katuyuan, kag nagabulig gid sa mga tawo.”

Nagaugyon gid sa sini ang mga ginikanan sa bilog nga kalibutan. Ang isa ka iloy nagsulat: “Ang akon tatlo ka tuig nga bata nga si Quinn nagatan-aw sang video nga Pagpakig-abyan kay Jehova. Sa tungatunga sang kanta, nagtulok sia sa akon, ginbutang ang iya gamay nga kamot sa iya dughan, kag naghambal: ‘Mama, nanamian gid ang akon heart sa kanta.’ ”