Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Pag-imprinta sa Bilog nga Kalibutan—Pagbulig sa mga Tawo nga Makatuon Parte sa Dios

Pag-imprinta sa Bilog nga Kalibutan—Pagbulig sa mga Tawo nga Makatuon Parte sa Dios

Sa bilog nga kalibutan, ginabasa sang mga tawo ang mga publikasyon sang mga Saksi ni Jehova. Minilyon ang nagabasa sini nga literatura sa ila mga gadyet ukon kompyuter, pareho sang ginahimo mo subong. Pero, mahimo makibot ka kon mahibaluan mo ang kasangkaron sang amon pag-imprinta. Sang 2013, nagabalhag kami sang base sa Biblia nga mga literatura sa mga 700 ka lenguahe kag ginapanagtag ini sa 239 ka pungsod.

Antes sang 1920, nagapaimprinta kami sa iban nga imprintahan. Pero sina nga tuig, ginsugdan namon ang pag-imprinta sang amon mga magasin kag buklet sa gamay nga bilding nga gin-arkilahan namon sa Brooklyn, New York. Diri kami nagsugod, pero subong may ara na kami 15 ka imprintahan sa Africa, Asia, Australia, Europe, North America, kag South America.

Ang Amon Pinakaimportante nga Libro

Siempre, ang pinakaimportante nga libro nga ginaimprinta namon amo ang Biblia. Sang 1942, ang una nga Biblia nga gin-imprinta namon amo ang Ingles nga King James Version. Sugod sang 1961, ang mga Saksi ni Jehova naka-translate kag nakabalhag sang kompleto nga isa ka volume sang Bag-ong Kalibutan nga Badbad sang Balaan nga Kasulatan. Sang 2013, nakahimo na kami sing sobra 184 milyones ka kopya sini nga Biblia sa 121 ka lenguahe.

Pero indi lang ini parte sa kadamuon. Ang mga Biblia nga ginahimo namon mabakod gid. Ang papel nga ginagamit acid free para indi ini magdalag, kag gin-bind ini sing maayo. Sa amo nahuman ang isa ka Biblia nga indi dali maguba bisan pa adlaw-adlaw gamiton.

Iban Pa nga Publikasyon

Nagaimprinta man kami sang mga publikasyon nga nagabulig sa mga tawo nga maintiendihan ang Biblia. Binagbinaga ang kadamuon sang pila sini sang 2013:

  • Ang Lalantawan, ang amon panguna nga dyurnal, ginaimprinta sa sobra 210 ka lenguahe kag amo ang may pinakadaku nga sirkulasyon sa bilog nga kalibutan. Ang kada gua sini nga may 16 ka pahina, ginaimprinta sa mga 45,000,000 ka kopya.

  • Ang Magmata! nga kaupod nga magasin sang Ang Lalantawankag nagapangaduha man sa sini kon sirkulasyon ang hambalan—ginaimprinta sa 99 ka lenguahe. Ang kada gua sini ginaimprinta sa mga 44,000,000 ka kopya.

  • Ang Ano Gid ang Ginatudlo sang Biblia? nga libro nga may 224 ka pahina kag mahumok nga kober gindesinyo gid para buligan ang mga bumalasa nga maintiendihan ang panguna nga mga panudlo sang Biblia. Sugod sang 2005, sobra 214 milyones ka kopya sini ang naimprinta sa sobra 240 ka lenguahe.

  • Ang Pamatii ang Dios nga brosyur, may 32 ka pahina kag gindesinyo para sa indi tanto kabalo magbasa. Ginasugid sini ang simple nga mga kamatuoran sang Biblia paagi sa matahom nga mga piktyur kag malip-ot nga mga paathag. Sobra na 42 milyones ka kopya ang naimprinta sa sobra 400 ka lenguahe.

Magluwas sa sini nga mga publikasyon, ang mga Saksi ni Jehova nagaimprinta man sing mga libro, brosyur, kag tract para buligan ang mga nagatuon sa Biblia nga ma-research ang ila mga pamangkot, maatubang ang mga problema, kag mangin malipayon ang ila pamilya. Sang 2012, ang mga imprintahan sang mga Saksi ni Jehova nakabalhag sing sobra 1.3 bilyones ka magasin kag 80 milyones ka libro kag Biblia.

Sang 2012, ang mga imprintahan sang mga Saksi ni Jehova nakabalhag sing sobra 1.3 bilyones ka magasin kag 80 milyones ka libro kag Biblia

Ang mga bisita nga naga-tour sa amon mga imprintahan nagadayaw gid sa ila nakita nga kapisan sang mga nagahimo sini nga literatura. Ining mga lalaki kag babayi nagahatag sang ila tion kag kusog. Sang magkadto sila sa Bethel, nga nagakahulugan “Balay sang Dios,” ang kalabanan sa ila wala sing eksperiensia sa pag-imprinta. Pero, paagi sa in-house training program, kag pag-obra sa lugar diin mas madali sila mahanas, maayo gid ang resulta. Halimbawa, kinaandan na lang diri nga ang hoben nga mga lalaki nga beintehon pa lang, nagaopereyt na sang high-speed nga mga imprintahan nga makabalhag sing 16 pahina nga magasin sa kadasigon nga 200,000 kada oras.

Diin Nagahalin ang Ginagasto sa Sini?

Sa bilog nga kalibutan, ang hilikuton sang mga Saksi ni Jehova ginasuportahan sang boluntaryo nga mga donasyon. Ang Agosto 1879 nga gua sang Zion’s Watch Tower, nga Ang Lalantawan na subong, nagsiling: “Nagapati kami nga ang ‘Zion’s Watch Tower’ ginasakdag ni JEHOVA, kag gani indi ini magpakilimos ukon makitluoy sing bulig sa mga tawo.” Amo gihapon sini ang amon pagpati.

Ngaa ginahatagan namon sing daku nga tion, kuarta, kag panikasog ini nga hilikuton? Kay man, kon mabasa mo ang isa sa minilyon ka Biblia kag libro nga ginhimo sa amon mga imprintahan ukon kon mabasa mo ini nga publikasyon online, nagalaum kami nga makabulig ini sa imo nga mangin suod pa gid sa Dios.

Magtuon sing Dugang Pa

Ano Gid ang Ginatudlo sang Biblia?

Ini nga libro sa pagtuon sa Biblia ginhimo para buligan ka nga matun-an ang ginasiling sang Biblia sa sarisari nga topiko, pareho sang rason kon ngaa nagaantos kita, kon ano ang nagakatabo sa mga patay, kon paano mangin malipayon ang pamilya, kag madamo pa.

Mga Publikasyon

Tan-awa ang bag-o nga mga materyal nga gin-post.