Magdiretso sa kaundan

Magdiretso sa segundaryo nga menu

Mga Saksi ni Jehova

Hiligaynon

Ginpabakod sang Nagadumala nga Hubon ang mga Saksi sa Russia kag Ukraine

Ginpabakod sang Nagadumala nga Hubon ang mga Saksi sa Russia kag Ukraine

“Nabatyagan namon nga palangga gid kami!” Amo sini ang ginsiling sang isa ka babayi sa Ukraine nga nakapamati sa importante nga sulat nga ginbasa ni Stephen Lett sang Nagadumala nga Hubon sang mga Saksi ni Jehova. Isa sia sa 165,000 ka Saksi nga nakapamati sa pamulongpulong ni Brother Lett sang nagbisita ini sa pungsod sang Mayo 10 kag 11, 2014.

Ang pamulongpulong nga base sa Biblia kag pagbasa sina nga sulat gin-translate sa lima ka lenguahe kag gin-transmit sa mga 700 ka Kingdom Hall sa bilog nga Ukraine.

Sina man nga petsa, ginbasa ni Mark Sanderson, nga miembro man sang Nagadumala nga Hubon, ang amo gihapon nga sulat bilang bahin sang programa para sa amon mga kauturan sa bilog nga Russia. Ini nga programa gin-translate sa 14 ka lenguahe. Gin-transmit man ini sa 180,413 nga nagtambong sa sobra 2,500 ka kongregasyon sa Belarus kag Russia.

Ini nga sulat, nga naghalin sa Nagadumala nga Hubon, ginhimo para sa tanan nga kongregasyon sa Russia kag Ukraine. Ginbasa ini ni Brother Sanderson sa Russian nga lenguahe, amo nga ang sanga talatapan sa Russia nagsulat: “Natandog gid ang mga kauturan sa pag-ulikid sang Nagadumala nga Hubon sa sini nga bahin sang kalibutan. Nabatyagan namon tanan nga daw ginhakos kami sing hugot sang Nagadumala nga Hubon.”

Ini nga sulat ginhimo para malugpayan kag mapabakod ang mga Saksi sa mga lugar nga may ginamo sa pulitika. Ginapabakod sini ang mga kauturan nga magpadayon nga ‘indi bahin sang kalibutan’ paagi sa pagpabilin nga neutral sa mga isyu sa pulitika.—Juan 17:16.

Para mahimo ini, ginpabakod sang Nagadumala nga Hubon ang mga Saksi nga magpabilin nga malapit kay Jehova paagi sa pangamuyo, pagtuon, kag pagpamalandong sa Pulong sang Dios. Ang mga nagtambong ginpahanumdom nga bisan ano pa nga pagtilaw ang ila maatubang, makasalig sila sa wala nagakapaslawan nga promisa sang Dios nga mabasa sa Isaias 54:17: “Wala sing ginhimo nga hinganiban nga magmadinalag-on batok sa imo.”

Gintapos sang Nagadumala nga Hubon ang ila sulat sa pagsiling: “Palangga gid namon kamo tanan. Makasalig kamo nga ginapensar namon kamo pirme kag ginapangamuyo gid namon kamo kay Jehova.”

Parte sa sini nga pagbisita, ang sanga talatapan sang mga Saksi ni Jehova sa Ukraine nagsulat: “Ang mga kauturan daw indi gid makapati sa mahigugmaon nga pag-ulikid kag atension sa ila sang Nagadumala nga Hubon. Ang pagkadto nanday Brother Lett kag Sanderson sa Ukraine kag Russia sa pareho nga petsa maathag nga ebidensia sang paghiusa sang katawhan sang Dios kag ginpabatyag sini sa mga kauturan kon daw ano sila ka palangga ni Jehova kag ni Jesus. Tanan kami nagaugyon nga tayming gid ini nga pagbisita, kag napabakod gid kami nga magpadayon sa pag-alagad kay Jehova bisan ano pa nga kabudlayan ang magaabot sa amon.”

 

Magtuon sing Dugang Pa

SABAT SA MGA PAMANGKOT SA BIBLIA

Paghidait sa Bilog nga Kalibutan—Ngaa Daw Kabudlay Gid Matigayon?

Nagakapaslawan ang panikasog sang mga tawo nga matigayon ang paghidait sa kalibutan. Binagbinaga ang pila ka rason.

PIRME GINAPAMANGKOT

Ngaa Nagapabilin nga Neutral sa Pulitika ang mga Saksi ni Jehova?

Makatalagam bala sila sa seguridad sang pungsod?