Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Gradwasyon sang Ika-135 nga Klase sang Watchtower Bible School of Gilead

Gradwasyon sang Ika-135 nga Klase sang Watchtower Bible School of Gilead

Sang Septiembre 14, 2013, mga 10,500 ang nagtambong sa gradwasyon sang ika-135 nga klase sang Watchtower Bible School of Gilead sa educational center sang mga Saksi ni Jehova sa Patterson, New York. Ginahanas sini nga eskwelahan ang eksperiensiado nga mga ministro sang mga Saksi ni Jehova para mangin mas epektibo pa gid sa ila asaynment.

Si Guy Pierce nga miembro sang Nagadumala nga Hubon sang mga Saksi ni Jehova kag tsirman sang programa, naghatag sang iya nagabukas nga pamulongpulong base sa Mateo 28:19, 20: “Lakat kamo kag maghimo sang mga disipulo sa mga tawo sang tanan nga pungsod, . . . nga nagapanudlo sa ila nga tumanon ang tanan nga butang nga ginsugo ko sa inyo.”

Ginpadaku ni Brother Pierce nga ining ginsiling ni Jesus amo ang panugod sang isa ka hilikuton nga nagapadayon asta subong. Kon maghimo kita sing mga disipulo, ginatudluan naton ang mga tawo nga tumanon ang tanan nga sugo ni Jesus. Siempre, nalakip sa sini ang sugo nga ibantala “ining maayong balita sang ginharian.” (Mateo 24:14) Sa sining paagi, ang kada bag-o nga disipulo nangin manugbantala kag manunudlo sang Ginharian. Ano ang epekto sini? “Nagdamo ang populasyon [sang kalibutan],” siling ni Brother Pierce, “kag amo man ang katawhan sang Dios.”

“Ginhatag Nila ang Labaw Pa sa Ila Ikasarang.” Si Thomas Cheiky, nga miembro sang Komite sang Sanga sa United States, nagbase sang iya pamulongpulong sa 2 Corinto 8:1-4. Bisan pa imol sila katama, ang mga kongregasyon sa Macedonia sang unang siglo nagpangabay nga mahatag sila sa mga kauturan nga nagakinahanglan sa Jerusalem. Ginpakita man sang mga estudyante sang Gilead ang espiritu sang kaalwan kag pagkamasinakripisyuhon.

Sa amo man nga tion, makasalig kita nga ang mga taga-Macedonia nangin balanse sa ila paghatag. Wala sila naghatag sing sobra nga mapabay-an na nila ang ila pamilya ukon ang ila pag-alagad sa Dios. Gani, ginlaygayan ni Brother Cheiky ang mga estudyante nga ilugon ang mga taga-Macedonia kag mangin balanse sa ila paghatag.

“Tapos Na ang Pag-eskwela.” Ginpadaku naman ni Samuel Herd nga miembro sang Nagadumala nga Hubon kon ngaa dapat dumdumon sang mga estudyante ang ila eksperiensia sa Gilead School. Subong sang isa ka matahom nga ambahanon nga nabatian mo sang aga, kag ginakantakanta mo sa bug-os nga adlaw, ang hamili nga mga eksperiensia sa Gilead makabulig gihapon sa mga estudyante bisan tapos na ang pag-eskwela.

Ginpahanumdom ni Brother Herd ang mga estudyante nga wala sing limitasyon ang memorya sang Dios. Ginngalanan sang Dios ang binilyon ka bituon sa uniberso, kag wala gid sia sing nalipatan. (Salmo 147:4) Labi pa gid nga dumdumon niya ang panikasog sang mga estudyante sa ila paghanas sa Gilead! Nakatipon sila sing “mga bahandi sa langit.” Ara ini sa memorya ni Jehova kag indi makawat sang bisan sin-o.Mateo 6:20.

Ginadumdom gid sang Dios ang mga binuhatan kag gugma sang mga estudyante para sa iya, gani dapat lang nga pabaloran sang mga estudyante ang ila mga eksperiensia sa Gilead. “Kon isa ka adlaw nalipay ka bangod nadumduman mo ang inyo mga eksperiensia sa Gilead,” siling ni Brother Herd, “indi pagkalimti ang Isa nga ginhalinan sang imo kalipay—si Jehova. Indi matak-an sa pagdumdom sini nga mga butang. Kay ang benepisyo sini para sa imo mahimo nga indi mo gid malipatan.”

“Magpalugpay sa Indi Malaragway nga Gahom ni Jehova.” Ang instruktor sa Gilead nga si Sam Roberson nagpalig-on sa mga estudyante nga magsalig sa gahom ni Jehova sangsa kaugalingon nila nga kusog kon may bag-o nga mga kabudlayan. Suno sa Efeso 3:20 (Ang Biblia) ang Dios “makahimo suno sa gahom nga nagapanghikot sa aton sing lakas kabugana labaw sa tanan nga aton ginapangayo ukon ginahunahuna.” Ang iya gahom indi gid naton maintiendihan sing bug-os amo nga bisan ang ekspresyon nga ‘lakas kabugana sa aton ginahunahuna’ indi makalaragway sini kay suno sa bersikulo makahimo sia sing “labaw” sangsa sini.

Ginatanyag ni Jehova ang iya indi malaragway nga gahom sa tanan nga Cristiano. Pareho sia sa isa ka “gamhanan” ukon “makusog nga hangaway” kon may grabe nga kabudlayan. (Jeremias 20:11; Biblia sang Katilingban sang mga Kristiano) Ginpahanumdom ni Brother Roberson ang mga estudyante nga buligan sila ni Jehova nga maatubang ang bisan ano nga problema kag kabudlayan.

“Amligi ang Inyo Dignidad sa Pag-alagad sa Ginharian.” Ang isa pa ka instruktor sa Gilead nga si William Samuelson nagpaathag nga ang mga estudyante nakatigayon sing dignidad sa pag-alagad sa Ginharian sa duha ka paagi. Napamatud-an nila nga takus sila hatagan sing kadungganan bangod sa ila mga binuhatan antes sila nag-eskwela kag samtang nagaeskwela sila. Kag padayon sila nga ginapadunggan kag ginarespeto bangod ginarepresentar nila ang pinakamataas nga gobierno sa uniberso—ang Ginharian sang Dios.

Paano maamligan sang mga estudyante ang ila dignidad? Ginpalig-on sila ni Brother Samuelson nga padunggan si Jehova kag respetuhon ang iban, subong nga ginhatagan ni Jesus sing dignidad ang iya mga kaupod sadto bisan pa kinahanglan niya sila tadlungon kag laygayan. Ano ang resulta? Pareho kay apostol Pablo, ang mga estudyante labi nga makatigayon sing dignidad, kag magahimaya sa ila ministeryo indi sa ila kaugalingon.Roma 11:13, Biblia sang Katilingban sang mga Kristiano.

“Ang Awtoridad sang mga Kabayo Yara sa Ila Baba.” Si Michael Burnett, nga isa pa ka instruktor sang Gilead, nagpaathag kon paano kita nagapanghikot nahisuno sa katumanan sang Bugna 9:19. Ginahimo naton ini kon ginagamit naton ang aton natun-an sa Cristianong mga miting sa paghambal nga may awtoridad sa aton pagbantala. Dayon, gin-interbyu niya ang mga estudyante kag ginpa-reenact sa ila ang ila mga eksperiensia sa ministeryo samtang nagaeskwela sila sa Gilead. Halimbawa, ginpukaw sang isa ka estudyante ang interes sang isa ka gasoline boy paagi sa pagpamangkot, “San-o nagsugod kag natapos ang gintalana nga mga tion sang mga pungsod?” (Lucas 21:24) Sang magbalik sia, ginbuligan niya ang tawo nga masabat ini nga pamangkot paagi sa pagbinagbinag sang Daniel kapitulo 4, kag sang apendise sa libro nga Ano Gid ang Ginatudlo sang Biblia?

“Ang Ila Tagipusuon Ginpalig-on.” Gin-interbyu man ni Adrian Fernandez, nga miembro sang Komite sang Sanga sa United States, ang duha ka mag-asawa nga estudyante. Ginsaysay ni Brother Helge Schumi nga sa Biblia may rekord sang mga alagad ni Jehova nga nangin matinaastaason sang ginhatagan sang espesyal nga mga pribilehiyo, gani masami nga nalakip sa kurso sang Gilead ang laygay sa pagpabilin nga mapainubuson. (2 Cronica 26:16) Sing kaanggid, ginhinumdom man ni Brother Peter Canning ang isa ka laygay sa isa ka lektyur sa Gilead parte sa pagtuon sang lokal nga lenguahe: “Indi magpabugal. Mangin handa nga mahuy-an.” Nagpasalamat gid ining duha ka mag-asawa kay paagi sa kurso sang Gilead, napabakod sila para sa ila hilikuton kag napalig-on ang ila tagipusuon.Hebreo 13:9.

“Magkalipay Kamo Bangod ang Inyo Ngalan Nasulat sa Langit.” (Lucas 10:20) Si Geoffrey Jackson nga miembro sang Nagadumala nga Hubon amo ang naghatag sang panguna nga pamulongpulong sang programa. Indi pareho sa mga estudyante sang Gilead sadto, ang kalabanan sa maggradwar subong indi makabaton sang pinasahi nga mga asaynment ukon makaeksperiensia sang pagbantala sa mga lugar nga wala pa mabantalaan. Ano dapat ang ila reaksion?

Sang ang 70 ka disipulo nga ginpadala ni Jesus nagbalik halin sa ila pagbantala, nalipay gid sila kay nakapagua sila sing mga demonyo sa ngalan ni Jesus. (Lucas 10:1, 17) Suno kay Jesus makalilipay gid man ini nga mga eksperiensia, pero nagsiling sia: “Apang, indi kamo magkalipay sa sini, nga napasakop sa inyo ang mga espiritu, kundi magkalipay kamo bangod ang inyo ngalan nasulat sa langit.” (Lucas 10:20) Sa amo, ginpakita niya nga indi pirme mangin makalilipay ang ila mga eksperiensia. Gani dapat sila magkonsentrar, indi sa resulta, kundi sa ila katutom kay Jehova kag bangod ang ila mga ngalan “nasulat sa langit.”

“Ang gintudlo ni Jesus sa iya 70 ka disipulo maaplikar man sa aton,” siling ni Brother Jackson. Indi naton pag-ibase ang aton kalipay ukon ang aton katutom sa resulta sang aton ministeryo. Sa baylo, nagakalipay kita kag ginapamatud-an naton ang aton katutom paagi sa mabakod nga kaangtanan kay Jehova kag kapisan sa pag-alagad sa iya.

Bisan si Jesus nakaagi man sang makapaluya nga mga sitwasyon. Halimbawa, sang ginpakaon niya paagi sa milagro ang linibo ka tawo, nagsunod sila dayon sa iya. (Juan 6:10-14, 22-24) Pero wala madugay, madamo sa ila ang nasandad sa panudlo ni Jesus, kag sa baylo nga mangin mga disipulo niya, ginbiyaan nila sia. (Juan 6:48-56, 60, 61, 66) Sa pihak nga bahin, ang matutom nga mga apostoles nag-unong kay Jesus. Nangin maayo sila nga halimbawa kay nagpokus sila indi lamang sa resulta kundi sa ila katutom kag kaangtanan kay Jehova.Juan 6:67-69.

Konklusion. Pagkatapos mahatag ang ila mga diploma, ginbasa sang isa sa mga naggradwar ang sulat sa pagpasalamat sang bilog nga klase. Si Brother Pierce nagsiling nga ang katawhan sang Dios, lakip ang mga naggradwar sa Gilead, wala ginakilala nga pinasahi sang kalibutan. (Binuhatan 4:13; 1 Corinto 1:27-31) Pero, ginabaton ni Jehova ang aton dedikasyon kag ginahatagan niya kita sang iya balaan nga espiritu. Kag bisan pa mahimo nga indi importante kay Jehova ang aton edukasyon, si Brother Pierce nagsiling, “Importante sa iya ang aton pagkamainunungon, katutom, kag debosyon.”