Accessibility setting

Magpili sing lenguahe

Magdiretso sa segundaryo nga menu

Magdiretso sa kaundan

Mga Saksi ni Jehova

Hiligaynon

Pagbulig sa Nagaeskwela nga Kabataan sa Thailand

Pagbulig sa Nagaeskwela nga Kabataan sa Thailand

Sugod sang Disiembre 2012, ang mga Saksi ni Jehova sa Thailand naghimo sing espesyal nga kampanya para buligan ang mga estudyante nga mangin madinalag-on sa ila pag-eskwela. Beinte ka Saksi ang nagbisita sa mga eskwelahan sa Bangkok. Nagpakig-istorya sila sa superbisor sang kada eskwelahan kag ginhatagan ang mga manunudlo kag mga estudyante sing Oktubre 2012 nga Magmata! nga may tig-ulo sa kober nga “Kon Paano Ka Magmadinalag-on sa Imo Pag-eskwela.”

Nagmadinalag-on ini nga kampanya, kag ginhimo ini sang mga Saksi sa bilog nga pungsod. Sa sulod sang masunod nga isa ka tuig kag tunga, nakontak nila ang 830 ka eskwelahan kag nakita nila nga gusto gid sang mga estudyante kag mga manunudlo nga makabaton sang Magmata! Bangod sa kadamo sang order, katatlo ini gin-imprinta liwat. Ang una nga order sang Oktubre 2012 nga Magmata! mga 30,000 ka kopya. Pero madamo gid ang nanamian sini nga topiko, gani sobra 650,000 ka kopya sang magasin ang napanagtag!

Naapresyar gid sang mga administrador sang eskwelahan kag mga manunudlo ang Magmata! Ang isa ka manunudlo nagsiling, “Ang magasin makabulig sa amon mga estudyante nga mangin malapit pa gid sa ila pamilya kag maghimo sing goal para sa ila kaugalingon.” Ginlakip sang iban nga eskwelahan ini nga magasin sa kurikulum sang ila klase. Gingamit naman ini sang iban nga klase para sa ila reading exercise. Sa isa ka eskwelahan, ang mga estudyante ginpahimo sang report base sa impormasyon halin sa magasin, kag ginhatagan sing award ang mga may pinakamanami nga report.

Naapresyar sang isa ka babayi nga estudyante ang artikulo sa magasin nga “Kon Paano Masolbar ang Sobra nga Katambukon sang Kabataan.” Ginpaathag niya nga madamo ang nagaproblema bangod sa sobra nga katambukon kag nasaw-ahan ang iya mga abyan nga istoryahan ini nga topiko. Nagsiling sia, “Salamat sa paghatag sing laygay nga kinahanglan gid namon kag mahapos sundon.”

Naapresyar man sang mga ginikanan ang magasin. Sang may mga Saksi nga nagbisita sa balay sang isa ka iloy, ginpasalamatan gid niya ang magasin. Nagsiling sia, “May mga impormasyon ini nga makabulig sa akon bata nga makatuon sing maayo sa eskwelahan.”

Si Mr. Pichai Petratyotin, nga spokesman sang mga Saksi ni Jehova sa Thailand, nagsiling: “Ginapadaku sang Magmata! ang wala nagadaan nga kaalam nga makita sa Biblia, nga mapuslan gid sang mga tawo subong. Nagapati gid ang mga Saksi ni Jehova sa balor sang edukasyon, gani gusto gid namon nga mabaton sang tanan ining wala sing bayad nga magasin.”

Magtuon sing Dugang Pa

Kon Paano Ka Magmadinalag-on sa Imo Pag-eskwela

Makabenepisyo gid ikaw sa imo pag-eskwela. Sa sini nga serye, binagbinagon naton ang lima ka paagi agod magmadinalag-on.

Sobra Bala Kadamo ang Imo Asaynment?

Daw malumos ka na bala sa imo asaynment? Ano ang makabulig sa imo?