Magdiretso sa kaundan

Magdiretso sa secondary menu

Mga Saksi ni Jehova

Hiligaynon

Kon May Trahedya, Ginapahulag Kami sang Gugma nga Magbulig

Kon May Trahedya, Ginapahulag Kami sang Gugma nga Magbulig

Sa tion sang kabudlayan, ang mga Saksi ni Jehova nagabulig sa ila mga kauturan kag sa iban. Pagpakita ini sang ila gugma, isa ka tanda nga nagapakilala sa matuod nga mga Cristiano.​—Juan 13:35.

Makita sa ubos ang parsyal nga listahan sang mga nahatag nga bulig sa sulod sang 12 ka bulan asta sa tungatunga sang 2012. Wala nalakip diri ang espirituwal kag emosyonal nga bulig nga pirme ginahatag sa mga biktima. Ang mga Disaster Relief Committee nga gintangdo sang amon mga branch office amo ang nagaorganisar sa pagbulig sa mga biktima. Dugang pa, nagabulig man ang lokal nga mga kongregasyon.

Japan

Japan. Sang Marso 11, 2011, isa ka mabaskog nga linog nga nagresulta sa tsunami ang naghalit sa ginatos ka libo ka tawo sa naaminhan nga Japan. Ang mga Saksi ni Jehova sa bilog kalibutan maalwan nga naghatag sang ila kuarta, ikasarang, kag pagkabutang para makabulig sa mga nahalitan. Tan-awa ang amon video parte sa bulig nga ginhatag sa mga nahalitan sang linog sa Japan.

Brazil: Ginatos ka tawo ang napatay bangod sang baha, landslide, kag mudslide. Gilayon nga nagpadala ang mga Saksi ni Jehova sing 42 ka tonelada nga pagkaon, 20,000 ka bottled water, 10 ka tonelada nga bayo, kag 5 ka tonelada nga suplay sang pangtinlo, mga bulong, kag iban pa.

Congo (Brazzaville): Sang naglupok ang bodega sang mga armas, 4 ka balay sang mga Saksi ni Jehova ang nawasak gid kag 28 pa ka balay sang mga Saksi ang naguba. Ginhatagan sing pagkaon kag bayo, kag gin-amuma sang mga Saksi sa sina nga lugar ang mga pamilya nga nahalitan.

Congo (Kinshasa): May ginpadala nga mga bulong para sa mga biktima sang kolera. May ginhatag nga mga bayo sa mga biktima sang baha bangod sang mabunok nga ulan. May ginhatag nga serbisyo medikal, binhi para itanom, kag tonelada nga bayo sa mga biktima sa refugee camp.

Venezuela: Grabe ang baha kag mudslide bangod sang mabunok nga ulan. Ang mga disaster relief committee nagbulig sa 288 ka apektado nga Saksi. Sobra 50 ka bag-o nga balay ang gintukod. Ginbuligan man sang mga relief committee ang mga nagaistar sa lugar nga mahimo lapawan sang nagataas nga tubig sang Lake Valencia.

Philippines

Philippines: Grabe ang baha sa pila ka bahin sang pungsod bangod sang mga bagyo. Ang sanga nagpadala sing pagkaon kag bayo para sa mga biktima, kag ang mga Saksi sa sini nga lugar nagbulig sa pagpaninlo sang naghubas na ang tubig.

Canada: Sang natapos ang grabe nga sunog sa kagulangan sa Alberta, ang Slave Lake Congregation nakabaton sing daku nga donasyon halin sa mga Saksi sa rehiyon para ibulig sa pagtinlo. May sobra pa nga kuarta, gani gindonar sang kongregasyon ang sobra katunga sini para ibulig sa mga biktima sang trahedya sa iban nga bahin sang kalibutan.

Côte d’Ivoire: Antes, sa tion, kag pagkatapos sang inaway sa sini nga lugar, ang mga naapektuhan ginhatagan sing serbisyo medikal, kinahanglanon nga mga suplay, kag ginhimuan sing ilistaran.

Fiji: Grabe ang pagbaha bangod sang mabaskog nga mga ulan, gani nahalitan ang kaumhan nga ginakuhaan sing pagkaon kag palangabuhian sang halos 192 ka Saksi nga pamilya. Ginpadal-an sila sing suplay sang pagkaon.

Ghana: Ang mga biktima sang baha sa nasidlangan nga rehiyon sang pungsod ginpadal-an sang pagkaon, binhi, kag gin-obrahan sang ilistaran.

United States: Ginguba gid sang mga buhawi ang 66 ka balay sang mga Saksi sa tatlo ka estado kag 12 ka balay sang mga Saksi ang nawasak gid. Bisan pa may insurance ang kalabanan nga tag-iya sining mga balay, ginhatagan sila gihapon sing pinansial nga bulig.

Argentina: Ang mga kongregasyon sang mga Saksi ni Jehova nagbulig sa mga nagaistar sa bagatnan nga bahin sang pungsod nga naguba ang ila balay bangod sang abo nga ginabuga sang bulkan.

Mozambique: Ginsuplayan sang pagkaon ang sobra 1,000 ka tawo nga naapektuhan sang tigpalamangag.

Nigeria: Ginhatagan sing pinansial nga bulig ang beinte kuatro ka Saksi nga nasamaran bangod sa aksidente sa bus. Madamo man ang ginbuligan sa aminhan nga bahin sang pungsod nga nadulaan sing balay bangod sa pag-ilinaway sang relihioso nga mga grupo.

Benin: Ginhatagan sing nga mga bulong, bayo, muskitero, matinlo nga tubig, kag gin-obrahan sing ilistaran ang mga biktima sang grabe nga pagbaha.

Dominican Republic

Dominican Republic: Pagkatapos sang Hurricane Irene, naghatag sing materyal nga bulig ang mga kongregasyon sa sini nga lugar kag nagbulig sa pagkay-o sang mga balay nga naguba.

Ethiopia: Ang duha ka lugar nga may tigpalamangag kag ang isa ka lugar nga may baha, ginpadal-an sing pondo para ibulig sa mga kinahanglanon sang mga naapektuhan.

Kenya: May ginhatag nga pondo para sa mga biktima sang tigpalamangag.

Malawi: May ginhatag nga bulig sa mga nagaistar sa Dzaleka refugee camp.

Nepal: Naguba gid ang balay sang isa ka Saksi bangod sang landslide. Gin-obrahan sia sing temporaryo nga ilistaran, kag ginbuligan sia sang kongregasyon sa ila lugar.

Papua New Guinea: Ginsunog sang mga arsonista ang walo ka balay sang mga Saksi. Gani naghimo sing kahimusan para patindugan sila liwat sang balay.

Romania: Nadulaan sang balay ang pila ka Saksi bangod sang pagbaha. Gani ginbuligan sila para patindugan liwat sang balay.

Mali: Ang mga taga-Senegal nagpadala sing pondo para sa mga wala sing pagkaon kay napierde ang ila ani bangod sang tigpalamangag.

Sierra Leone: Ang Saksi nga mga doktor halin sa France nagbulig sa mga Saksi ni Jehova nga nagaistar sa mga lugar nga nahalitan sang inaway sadto.

Thailand: Grabe gid ang halit sang baha sa pila ka probinsia sang pungsod. Ginkay-o kag gintinluan sang mga relief team ang 100 ka balay kag 6 ka Kingdom Hall.

Czech Republic: Naguba ang pila ka balay bangod sang pagbaha sa Czech Republic. Nagbulig ang mga Saksi halin sa Slovakia.

Sri Lanka: Halos natapos na ang pagbulig sa mga biktima sang tsunami.

Sudan: May ginpadala nga mga pagkaon, bayo, sapatos, kag mga trapal para sa mga Saksi ni Jehova nga nagbiya sa ila mga balay bangod sang inaway sa pungsod.

Tanzania: Bangod sang grabe nga pagbaha, 14 ka pamilya ang nadulaan sang pagkabutang. Ang mga kongregasyon sa sini nga lugar nagdonar sang mga bayo kag kinahanglanon sa balay. Isa ka balay ang ginpatindog liwat.

Zimbabwe: Bangod sang tigpalamangag, grabe ang gutom sa isa ka lugar sa pungsod. Ginhatagan sing pagkaon kag kuarta ang mga naapektuhan.

Burundi: Ginbuligan ang mga ara sa refugee camp, kag ginpadal-an sang serbisyo medikal.